Aadhaar App: உங்க ஆதார் பயோமெட்ரிக்கை பத்திரமாக 'லாக்' செய்வது எப்படி? முழு விவரம் இதோ!

Aadhaar App: ஆதார் செயலியில் உங்கள் கைரேகை மற்றும் பயோமெட்ரிக் விவரங்களை பாதுகாப்பாக 'லாக்' செய்வது எப்படி? இந்த செய்தியில் முழுமையாக விரிவாக பார்க்கலாம்.

Image Credit : UIDAI

ஆதார் செயலி புதிய சாதனை

ஆதார் கார்டு வைத்திருப்பவர்களுக்கு ஒரு முக்கிய அப்டேட் வந்துள்ளது. மத்திய அரசின் அதிகாரப்பூர்வ ஆதார் செயலி (Aadhaar App) தற்போது 4 கோடி பதிவிறக்கங்களைக் கடந்து புதிய சாதனை படைத்துள்ளது. வீட்டில் இருந்தபடியே முகவரி, மொபைல் எண் போன்ற விவரங்களை மாற்றுவது முதல், பயோமெட்ரிக் விவரங்களைப் பூட்டி வைப்பது வரை பல முக்கிய சேவைகளை இந்த ஒரே செயலி மூலம் பெற முடியும்.

மத்திய பத்திரிகை தகவல் அலுவலகம் (PIB) வெளியிட்டுள்ள அறிக்கையின்படி, இந்த செயலியின் முக்கிய அம்சமான பயோமெட்ரிக் லாக்/அன்லாக் வசதியை இதுவரை 1.91 கோடிக்கும் அதிகமான முறை மக்கள் பயன்படுத்தியுள்ளனர். இது ஆதார் பயனர்களின் தரவுப் பாதுகாப்புக்குக் கிடைத்திருக்கும் கூடுதல் பலம் என்றே சொல்லலாம்.

Image Credit : Gemini

பயோமெட்ரிக் லாக்; ஆதார் பாதுகாப்புக்கு புதிய கவசம்

பயோமெட்ரிக் லாக் என்பது உங்கள் கைரேகை, கருவிழி மற்றும் முக அங்கீகாரம் போன்ற பயோமெட்ரிக் தகவல்களை வேறு யாரும் தவறாகப் பயன்படுத்தாமல் தடுக்கும் ஒரு பாதுகாப்பு ஏற்பாடு ஆகும். உங்கள் ஆதார் எண்ணை வேறு எங்காவது அங்கீகாரத்திற்காகப் பயன்படுத்தும்போது, உங்கள் பயோமெட்ரிக் விவரங்கள் தேவைப்படும். ஆனால், நீங்கள் இந்த வசதியைப் பயன்படுத்தி உங்கள் பயோமெட்ரிக்கை 'லாக்' செய்துவிட்டால், வேறு யாராலும் அதை அங்கீகரிக்க முடியாது. அப்படி யாராவது முயற்சி செய்தால், அவர்களுக்கு '330' என்ற பிழைக் குறியீடு (Error Code) மட்டுமே திரையில் தோன்றும். இதன் மூலம் உங்கள் அனுமதியின்றி உங்கள் ஆதார் தவறாகப் பயன்படுத்தப்படுவது முற்றிலும் தடுக்கப்படுகிறது.

Image Credit : Insatgram

ஆதார் செயலியை பதிவிறக்கம் செய்து பயன்படுத்துவது எப்படி?

இந்த வசதியைப் பெறுவது மிகவும் எளிது. உங்கள் ஆண்ட்ராய்டு போனில் கூகுள் பிளே ஸ்டோர் அல்லது ஐபோனில் ஆப்பிள் ஆப் ஸ்டோருக்குச் சென்று, 'Aadhaar (by UIDAI)' எனத் தேடி செயலியைப் பதிவிறக்கம் செய்துகொள்ளலாம். செயலியை நிறுவிய பிறகு, உங்கள் பதிவு செய்யப்பட்ட விவரங்கள் மற்றும் MPIN-ஐ உள்ளிட்டு உள்நுழைய வேண்டும். 

செயலியின் முகப்புத் திரையில் 'Biometrics Unlocked' என்ற ஆப்ஷன் தெரியும், அதை கிளிக் செய்து 'Confirm Biometrics Lock' என்பதைத் தட்டினால் போதும், உங்கள் பயோமெட்ரிக் விவரங்கள் உடனடியாகப் பூட்டப்படும். மீண்டும் தேவைப்படும்போது, இதே செயலியில் 'Biometrics Locked' ஐகானைத் தட்டி, 'Confirm Unlock Biometrics' கொடுத்தால், தற்காலிகமாகத் திறந்து கொள்ளலாம்.

மொபைல் எண்ணை நீங்கள் இழந்தால்?

ஒரு முக்கியமான விஷயத்தை கவனத்தில் கொள்ள வேண்டும்; இந்த செயலியுடன் இணைக்கப்பட்ட மொபைல் எண்ணையோ அல்லது போனையோ நீங்கள் இழந்தால், அதை மீட்டெடுக்கும் வரை செயலி மூலம் ஆதார் சேவைகளைப் பயன்படுத்த முடியாது. ஆதாருடன் மொபைல் எண்ணை பதிவு செய்துள்ள அனைத்து இந்தியக் குடிமக்களும் இந்த பயோமெட்ரிக் லாக் வசதியைப் பயன்படுத்தலாம்.