உங்கள் போனில் இந்த வசதி இருக்கா? அவசர காலத்தில் உயிரை காப்பாற்றும் கூகுள் ELS - அவசியம் தெரிஞ்சுக்கோங்க!

Google கூகுள் இந்தியாவில் ELS சேவையை அறிமுகப்படுத்தியுள்ளது. அவசர காலங்களில் 112-க்கு அழைக்கும்போது துல்லியமான இருப்பிடத்தை இது பகிரும்.

Image Credit : Gemini

Google கூகுளின் உயிர்காக்கும் புதிய முயற்சி

இந்தியாவில் உள்ள கோடிக்கணக்கான ஆண்ட்ராய்டு பயனர்களுக்குப் பயனளிக்கும் வகையில், கூகுள் நிறுவனம் தனது 'எமர்ஜென்சி லொகேஷன் சர்வீஸ்' (Emergency Location Service - ELS) என்னும் புதிய சேவையை அதிகாரப்பூர்வமாக அறிமுகப்படுத்தியுள்ளது. அவசர காலங்களில் பயனர்கள் உதவி கோரும்போது, அவர்களின் துல்லியமான இருப்பிடத்தைக் காவல்துறை மற்றும் மருத்துவக் குழுவினருக்குத் தெரிவிப்பதே இந்த சேவையின் முக்கிய நோக்கமாகும்.

Image Credit : Getty

துல்லியமான இருப்பிடத்தைக் காட்டும் தொழில்நுட்பம்

ஒரு பயனர் 112 போன்ற அவசர எண்களைத் தொடர்பு கொள்ளும்போது, இந்த ELS தானாகவே செயல்படத் தொடங்கும். இது ஜிபிஎஸ் (GPS), வை-பை (Wi-Fi) மற்றும் மொபைல் நெட்வொர்க் தரவுகளைப் பயன்படுத்தி, அழைப்பவர் இருக்கும் இடத்தைத் துல்லியமாகக் கணிக்கும். ஆண்ட்ராய்டின் மெஷின் லேர்னிங் தொழில்நுட்பம் மூலம் செயல்படும் இந்த வசதி, 50 மீட்டர் சுற்றளவுக்குள் பயனர் எங்கு இருக்கிறார் என்பதைத் துல்லியமாகக் காட்டிவிடும். இதனால் அவசர உதவிப் படையினர் விரைவாகச் சம்பவ இடத்திற்குச் செல்ல முடியும்.

Image Credit : Getty

உத்தரப் பிரதேசத்தில் முதல் பயன்பாடு

இந்தச் சேவை இந்தியா முழுவதும் அறிமுகப்படுத்தப்பட்டாலும், உத்தரப் பிரதேச மாநிலம் இதை முழுமையாகச் செயல்பாட்டுக்குக் கொண்டுவந்த முதல் மாநிலமாகத் திகழ்கிறது. அங்குள்ள UP112 கட்டுப்பாட்டு அறையுடன் இணைந்து கூகுள் செயல்படுகிறது. இதன் மூலம், யாரேனும் அவசர உதவிக்கு அழைத்தால், அவர்களின் இருப்பிடம் உடனடியாகக் கட்டுப்பாட்டு அறைக்குத் தெரியும் வகையில் ஏற்பாடு செய்யப்பட்டுள்ளது.

Image Credit : Getty

கட்டணம் இல்லை, தனி ஆப் தேவையில்லை

இந்தச் சேவையின் சிறப்பம்சமே இதன் எளிமைதான். இதற்காகப் பயனர்கள் தனியாக எந்தவொரு செயலியையும் (App) பதிவிறக்கம் செய்யத் தேவையில்லை. ஆண்ட்ராய்டு 6 (Android 6.0) அல்லது அதற்கு மேற்பட்ட வெர்ஷனில் இயங்கும் அனைத்து போன்களிலும் இது தானாகவே இருக்கும். மேலும், இந்தச் சேவைக்குக் கூடுதல் கட்டணம் எதுவும் கிடையாது.

Image Credit : Getty

தனியுரிமை மற்றும் பாதுகாப்பு

பயனர்களின் தனியுரிமைக்கு (Privacy) முக்கியத்துவம் அளிக்கும் வகையில் இந்தச் சேவை வடிவமைக்கப்பட்டுள்ளது. நீங்கள் 112 அல்லது பிற அவசர எண்களை அழைக்கும்போது மட்டுமே இந்தச் சேவை செயல்படும். மற்ற நேரங்களில் உங்கள் இருப்பிடம் கண்காணிக்கப்படாது. அழைப்பு துண்டிக்கப்பட்டவுடன் இருப்பிடப் பகிர்வும் நின்றுவிடும் என கூகுள் தரப்பில் தெரிவிக்கப்பட்டுள்ளது.