இவரை தெரியுமா? வாட்ஸ்ஆப்பில் வரும் ஒற்றைப் புகைப்படம்... க்ளிக் செய்தால் ஒட்டுமொத்த பணமும் அவுட்!

முன்பின் தெரியாத எண்களிலிருந்து வாட்ஸ்ஆப்பில் வரும் மங்கலான புகைப்படங்களைப் பதிவிறக்கம் செய்வதன் மூலம் பயனர்களின் வங்கிக் கணக்கில் உள்ள ஒட்டுமொத்த பணத்தையும் திருடும் அதிநவீன சைபர் மோசடி குறித்து சைபர் பாதுகாப்புத் துறை எச்சரிக்கை விடுத்துள்ளது.

Image Credit : Chatgpt

வங்கிக் கணக்கை காலி செய்யும் புதிய மால்வேர் மோசடி

முன்பின் தெரியாத நபர்களிடமிருந்து வாட்ஸ்ஆப்பில் வரும் புகைப்படங்களை பதிவிறக்கம் செய்வதன் மூலம், ஸ்மார்ட்போன்களில் தீம்பொருளை (மால்வேர்) நிறுவி, வங்கிக் கணக்கில் உள்ள பணத்தை முழுமையாகத் திருடும் புதிய வகை சைபர் மோசடி குறித்து சைபர் பாதுகாப்புத் துறை தீவிர எச்சரிக்கை விடுத்துள்ளது.

Image Credit : chatgpt

வாட்ஸ்ஆப்பில் வரும் மங்கலான புகைப்படங்களை கிளிக் செய்யாதீர்கள்

கடந்த சில மாதங்களாக இணையக் குற்றவாளிகள் அப்பாவி பொதுமக்களையும் அவர்களின் வங்கிக் கணக்குகளையும் குறிவைத்து அதிநவீன நுணுக்கமான மோசடிகளில் ஈடுபட்டு வருகின்றனர். இதில் இந்திய அளவிலும் உலக அளவிலும் உள்ள வாட்ஸ்ஆப் பயனர்களைக் குறிவைத்து ஒரு புதிய மோசடி அரங்கேறி வருகிறது.

வழக்கமாக எப்படி இருக்கிறீர்கள்? நலமாக இருப்பீர்கள் என நம்புகிறேன் என்பது போன்ற நலம் விசாரிக்கும் தகவலுடன், இவரைத் தெரியுமா? என்ற கேள்வியோடு ஒரு மங்கலான புகைப்படம் வாட்ஸ்ஆப்பில் அனுப்பப்படுகிறது.

இதுவரை சைபர் பாதுகாப்பு விழிப்புணர்வுகளில் சந்தேகத்திற்குரிய லிங்குகளை (links) கிளிக் செய்ய வேண்டாம் என்று மட்டுமே கூறப்பட்டு வந்ததால், இது வெறும் புகைப்படம்தானே என்று நினைத்து பலரும் ஆர்வத்தில் அதைத் திறந்து பார்க்க முயல்கின்றனர். ஆனால், அந்தப் புகைப் படத்தை கிளிக் செய்தால், பயனர்களின் வங்கிக் கணக்கில் ஒற்றை ரூபாய் கூட மிச்சமில்லாமல் திருடப்படும் அபாயம் உள்ளதாக எச்சரிக்கப்படுகிறது.

Image Credit : Chatgpt

மோசடி எவ்வாறு அரங்கேறுகிறது?

அறிமுகமில்லாத புதிய எண்ணிலிருந்து வாட்ஸ்ஆப் எண்ணுக்கு நலம் விசாரிப்பது போலவோ, வாழ்த்துச் செய்தி, மீம், விடுமுறைக் கொண்டாட்டம் அல்லது விளம்பரம் போன்ற வடிவிலோ ஒரு மங்கலான புகைப்படம் வரும். அந்தப் புகைப்படத்தைப் பதிவிறக்கம் செய்ய கிளிக் செய்தவுடன், பயனருக்குத் தெரியாமலேயே ஒரு ஆபத்தான மால்வேர் அல்லது மோசடி ஆப் ஸ்மார்ட்போனில் பதிவிறக்கம் ஆகிவிடும்.

அவ்வாறு ஊடுருவும் தீம்பொருள், செல்போனில் உள்ள முக்கிய தகவல்கள் மோசடியாளர்களுக்கு அனுப்பத் தொடங்கும். மேலும், ஸ்மார்ட்போனில் உள்ள வங்கிச் செயலிகளுக்குள் (Banking Apps) ஊடுருவி, கடவுச்சொற்களைத் (Passwords) திருடி, கணக்கில் உள்ள பணத்தை உடனடியாகப் பரிமாற்றம் செய்ய மோசடியாளர்களுக்கு வழிவகுக்கும்.

எனவே, முன்பின் தெரியாத நபர்களிடமிருந்து வரும் தகவல்கள், லிங்குகள், புகைப்படங்கள் அல்லது கிளிக் செய்யும் வடிவில் வரும் எந்தவொரு பைலையும் எக்காரணம் கொண்டும் திறக்கவோ கிளிக் செய்யவோ வேண்டாம் என்று பொதுமக்களுக்குக் கண்டிப்பான அறிவுறுத்தல் விடுக்கப்பட்டுள்ளது.

Image Credit : Chatgpt

மோசடியைத் தவிர்க்க செய்ய வேண்டிய முன்னெச்சரிக்கை நடவடிக்கைகள்

வாட்ஸ்ஆப் செயலியில் Settings பகுதிக்குச் சென்று, Storage and Data என்ற பிரிவைத் தேர்ந்தெடுக்கவும். அதில் உள்ள Media auto-download வசதியை முழுமையாக ஆஃப் (Off) செய்ய வேண்டும். மொபைல் டேட்டா (When using mobile data), வை-ஃபை (When connected on Wi-Fi), மற்றும் ரோமிங் (When roaming) என அனைத்து நிலைகளிலும் படங்கள் தானாகப் பதிவிறக்கம் ஆவதை அணைத்து வைக்கவும்.

ஸ்மார்ட்போன்களைப் பயன்படுத்தும் முதியவர்கள், தொழில்நுட்ப அறிவு குறைவாக உள்ளவர்கள் மற்றும் எழுதப் படிக்கத் தெரியாதவர்களுக்கும் இந்த ஆபத்து மற்றும் தடுப்பு முறைகள் குறித்து விழிப்புணர்வை ஏற்படுத்த வேண்டும்.