- Home
- Tamil Nadu News
- ICU-வில் எச்.ராஜா.. மருத்துவமனைக்கு சென்று நலம் விசாரித்த ஸ்டாலின், உதயநிதி.. பாஜகவினர் நெகிழ்ச்சி!
ICU-வில் எச்.ராஜா.. மருத்துவமனைக்கு சென்று நலம் விசாரித்த ஸ்டாலின், உதயநிதி.. பாஜகவினர் நெகிழ்ச்சி!
எச்.ராஜா குடும்பத்தினரிடம் பேசிய முதல்வர் ஸ்டாலின், எந்த உதவி கேட்டாலும் அரசு செய்து தர தயாராக இருப்பதாகவும் தெரிவித்துள்ளார். எச்.ராஜாவின் உடல்நிலை குறித்து மருத்துவர்களிடமும் முதல்வர் கேட்டறிந்தார்.
எச்.ராஜாவுக்கு உடல்நலக்குறைவு
தனியார் தொலைக்காட்சி ஒன்றில் நடைபெற்ற விவாத நிகழ்ச்சியில் பங்கேற்ற பாஜக தேசிய செயற்குழு உறுப்பினர் எச்.ராஜா, மேடையிலேயே எதிர்பாராத விதமாக திடீரென மயங்கி விழுந்தார். அவர் நிலைதடுமாறி கீழே விழப் பார்த்தபோது, அங்கிருந்த நிகழ்ச்சியின் நெறியாளர் உடனடியாகச் செயல்பட்டு அவரைத் தாங்கிப் பிடித்தார். அவருக்கு அங்கேயே அவருக்கு முதலுதவி சிகிச்சைகள் வழங்கப்பட்டன.
அப்பல்லோ மருத்துவமனையில் சிகிச்சை
முதலுதவிக்குப் பிறகும் அவர் இயல்பு நிலைக்குத் திரும்புவதில் சிரமம் இருந்ததால், உடனடியாக அருகில் இருந்த மருத்துவமனைக்குக் கொண்டு செல்லப்பட்டார். அங்கு அவருக்கு தீவிர சிகிச்சை அளிக்கப்பட்டு மேல் சிகிச்சைக்காக சென்னை அப்பல்லோ மருத்துவமனையில் அனுமதிக்கப்பட்டார். எச்.ராஜாவுக்கு பக்கவாதம் ஏற்பட்டதாகவும் அவர் தீவிர சிகிச்சை பிரிவில் தொடர்ந்து சிகிச்சை பெற்று வருவதாகவும் தகவல் வெளியாகி உள்ளது.
உடல் நலம் விசாரித்த ஸ்டாலின், உதயநிதி
இந்த நிலையில், திமுக தலைவரும், தமிழக முதல்வருமான மு.க.ஸ்டாலின், துணை முதல்வர் உதயநிதி ஸ்டாலின் ஆகியோர் சென்னை அப்பல்லோ மருத்துவமனைக்கு சென்று எச்.ராஜாவின் உடல்நிலை குறித்து அவரது குடும்பத்தினரிடம் நலம் விசாரித்ததாக தகவல் வெளியாகி உள்ளது. எச்.ராஜா குடும்பத்தினரிடம் பேசிய முதல்வர் ஸ்டாலின், எந்த உதவி கேட்டாலும் அரசு செய்து தர தயாராக இருப்பதாகவும் தெரிவித்துள்ளார். எச்.ராஜாவின் உடல்நிலை குறித்து மருத்துவர்களிடமும் முதல்வர் கேட்டறிந்தார்.
அரசியல் நாகரீகம்; பாஜகவினர் நெகிழ்ச்சி
அரசியல் களத்தில் திமுகவும், பாஜகவும் பாம்பும், கீரியுமாக உள்ளன. இரு கட்சிகளும் அரசியல்ரீதியாக ஒருவரையொருவர் கடுமையாக விமர்சித்து வருகின்றன. இதேபோல் எச்.ராஜாவும் தொடர்ந்து திமுக அரசை கடுமையாக விமர்சித்து வந்தார். ஆனால் அரசியல் நாகரீகம் கருதி ஸ்டாலினும், உதயநிதியும் எச்.ராஜாவிடம் குடும்பத்தினரிடம் நலம் விசாரித்து இருப்பது பாஜகவினர்களிடம் நெகிழ்ச்சியை ஏற்படுத்தியுள்ளது.
அரசியல் களம் தாண்டி எச்.ராஜாவும், ஸ்டாலினுக்கும் நெருக்கம்
'இதுதான் தமிழ்நாடு; இதுதான் திமுகவின் குணம்' என உடன்பிறப்புகளும் கருத்துகளை தெரிவித்து வருகின்றனர். அரசியல் களம் என்பதை தாண்டி ஸ்டாலின் குடும்பத்துக்கும், எச்.ராஜா குடும்பத்துக்கும் தனிப்பட்ட முறையில் நெருக்கம் உள்ளதும், எச்.ராஜாவின் பல்வேறு குடும்ப நிகழ்வுகளில் ஸ்டாலின் கலந்து கொண்டுள்ளதும் குறிப்பிடத்தக்கது.
