- Home
- Tamil Nadu News
- VS Babu : கட்சியைத் தாண்டிய பாசம்... வி.எஸ். பாபு உடலை தோளில் சுமந்த முதல்வர் விஜய்! இறுதி ஊர்வலத்தில் நடந்த நெகிழ்ச்சி சம்பவம்!
VS Babu : கட்சியைத் தாண்டிய பாசம்... வி.எஸ். பாபு உடலை தோளில் சுமந்த முதல்வர் விஜய்! இறுதி ஊர்வலத்தில் நடந்த நெகிழ்ச்சி சம்பவம்!
VS Babu's Funeral : கொளத்தூர் தொகுதி தவெக எம்.எல்.ஏ வி.எஸ்.பாபு மரணமடைந்ததை அடுத்து அவரின் இறுதி ஊர்வலத்தில் கலந்துகொண்டார் முதல்வர் விஜய். அதைப்பற்றி பார்க்கலாம்.

VS Babu's Funeral
சென்னை கொளத்தூர் தொகுதியின் தவெக எம்எல்ஏவாக இருந்தவர் வி.எஸ். பாபு. திடீரென ஏற்பட்ட உடல்நலப் பாதிப்பால் கடந்த செப்டம்பர் 9-ம் தேதி அமைந்தகரையில் உள்ள எம்ஜிஎம் மருத்துவமனையில் அனுமதிக்கப்பட்டார். அவருக்கு நுரையீரல் தொற்றுக்காக சுமார் 70 நாட்களாக மருத்துவர்கள் சிகிச்சை அளித்து வந்தனர்.
இந்நிலையில், நேற்று வியாழக்கிழமை அவருக்கு திடீர் மாரடைப்பு ஏற்பட்டது. இதையடுத்து அவர் உயிரிழந்ததாக மருத்துவமனை நிர்வாகம் அதிகாரப்பூர்வமாக அறிவித்தது. அவரது மறைவு தமிழக அரசியல் வட்டாரத்திலும் தவெக தொண்டர்கள் மத்தியிலும் பெரும் சோகத்தை ஏற்படுத்தியது.
இதனைத் தொடர்ந்து, பெரம்பூரில் உள்ள அவரது இல்லத்தில் பொதுமக்கள் அஞ்சலிக்காக உடல் வைக்கப்பட்டது. முதல்வர் ஜோசப் விஜய், அமைச்சர்கள், சட்டமன்ற உறுப்பினர்கள் மற்றும் காங்கிரஸ், விடுதலைச் சிறுத்தைகள் கட்சி, மதிமுக உள்ளிட்ட பல்வேறு கட்சிகளைச் சேர்ந்த தலைவர்கள் நேரில் சென்று வி.எஸ். பாபுவின் உடலுக்கு அஞ்சலி செலுத்தினர்.
வி.எஸ். பாபுவின் உடலை தோளில் சுமந்த முதல்வர் விஜய்!
இன்று வெள்ளிக்கிழமை மாலை அவரது இறுதிச்சடங்குகள் நடைபெறும் என அறிவிக்கப்பட்டிருந்தது. அதன்படி, உறவினர்கள் இறுதிச்சடங்குகளை முடித்த பின்னர், அவரது உடல் தகனம் செய்வதற்காக திருவிக நகர் மின் மயானத்துக்கு ஊர்வலமாக எடுத்துச் செல்லப்பட்டது.
அப்போது, வி.எஸ். பாபுவின் உடலை வீட்டிலிருந்து உறவினர்கள் வெளியே கொண்டு வந்தனர். அந்த நேரத்தில் முதல்வர் விஜய் முன்னே வந்து அவரது உடலைத் தனது தோளில் சுமந்து சென்றார். பின்னர் மலர்களால் அலங்கரிக்கப்பட்ட வாகனத்தில் உடல் வைக்கப்பட்டு இறுதி ஊர்வலம் புறப்பட்டது.
இந்த ஊர்வலத்தில் முதல்வர் விஜய், அமைச்சர்கள், எம்எல்ஏக்கள், கூட்டணிக் கட்சித் தலைவர்கள் மற்றும் தவெக தொண்டர்கள் உள்ளிட்ட ஏராளமானோர் கலந்துகொண்டனர். வாகனத்தின் பின்னால் முதல்வர் விஜய்யும் மற்றவர்களுடன் நடந்து சென்று தனது இறுதி மரியாதையைச் செலுத்தினார்.
மகன்களுக்கு ஆறுதல் கூறிய விஜய்!
இறுதி ஊர்வலத்தின்போது வி.எஸ். பாபுவின் மகன்கள் தந்தையை இழந்த துயரத்தில் கதறி அழுதனர். அப்போது அவர்களிடம் நெருக்கமாகச் சென்ற முதல்வர் விஜய், அவர்களைத் தனது தோளில் சாய்த்து ஆறுதல் கூறினார். திருவிக நகர் மின் மயானம் வரை நடந்து சென்ற அவர், இறுதிச்சடங்குகளிலும் பங்கேற்றார்.
இதுவரை எந்த சிஎம்மும் செய்யாத செயல் விஎஸ் பாபு இறுதி ஊர்வலத்தில் விஜய்
#ThalapathyVijay #CMVijay #VSBabu #Vijay #TamilNaduCM #TamilNaduPolitics #Humanity #Respect #FinalJourney #EmotionalMoment #TamilPolitics #TVK #TVKGovernment #PoliticalNews #TamilNadu https://t.co/F0QQCxDLQY
— பாசில் கிளியனூர் (@kiliyanurfazil) November 20, 2026
மின் மயானத்தில் உறவினர்கள் மேற்கொண்ட இறுதிச் சடங்குகளைத் தொடர்ந்து வி.எஸ். பாபுவின் உடல் தகனம் செய்யப்பட்டது. உடலைத் தோளில் சுமந்தும், துயரத்தில் இருந்த குடும்பத்தினருக்கு ஆறுதல் அளித்தும் முதல்வர் விஜய் இறுதி ஊர்வலத்தில் பங்கேற்ற சம்பவம் அங்கிருந்தவர்களிடையே நெகிழ்ச்சியை ஏற்படுத்தியது.
VS Babu Passes Away : ஸ்டாலினையே தோற்கடித்தவர்... கொளத்தூர் எம்.எல்.ஏ வி.எஸ்.பாபு காலமானார்














