அதிமுக - தவெக மறைமுக கூட்டணி அம்பலம்! திமுகவுக்காக விஜய்யை டோட்டலாக டேமேஜ் செய்த வன்னி அரசு!

தமிழக வெற்றிக் கழகத்தின் இரண்டாவது மாநில மாநாட்டில், நடிகர் விஜய் திமுக, பாஜக மட்டுமல்லாது அதிமுகவையும் விமர்சித்தார். தூத்துக்குடி துப்பாக்கிச்சூடு சம்பவம் குறித்து விஜய் மௌனம் காத்தது ஏன் என வன்னி அரசு கேள்வி எழுப்பியுள்ளார்.

Image Credit : x

தவெக விஜய்

மதுரையில் நடிகர் விஜய்யின் தமிழக வெற்றிக் கழகத்தின் இரண்டாவது மாநில மாநாடு நடைபெற்றது. இதில், அக்கட்சியின் தலைவர் விஜய் இதுவரை திமுக, பாஜக மட்டுமே விமர்சித்து வந்த நிலையில் இம்முறை அதிமுகவையும் விமர்சித்திருந்தார். இந்நிலையில் தூத்துக்குடி துப்பாக்கிச்சூட்டில் கொல்லப்பட்ட தங்கை ஸ்னோலின் குறித்து பேசிய விஜய் மறந்தும் கூட, துப்பாக்கிச்சூடு நடத்தி படுகொலை செய்த அதிமுக குறித்து வாய் திறக்காதது ஏனோ? என வன்னி அரசு கேள்வி எழுப்பியுள்ளார்.

Image Credit : Asianet News

விஜய்

இதுதொடர்பாக விடுதலைச் சிறுத்தைகள் கட்சியின் துணை பொதுச்செயலாளர் வன்னி அரசு வெளியிட்டுள்ள எக்ஸ் தளத்தில்: தவெக இரண்டாவது மாநாடு வெற்றிகரமாக முடிந்ததாக அறிவித்து விட்டார்கள். முதல் மாநாட்டை விட கூடுதல் நேரம் எடுத்து பேசியுள்ளார் விஜய். இந்த மாநாட்டிலும் கொள்கை எதிரி பாஜக என்றும் அரசியல் எதிரி திமுக என்றும் மீண்டும் மீண்டும் தெளிவு படுத்தி விட்டார். கொள்கை எதிரி பாஜக குறித்து விஜய் பேசும் போது, பொத்தாம் பொதுவாக பேசுகிறாரே தவிர, குறிப்பாக பேசவில்லை. தற்போது கொண்டுவந்துள்ள சனநாயக விரோத மசோதாவான, மக்களால் தேர்ந்தெடுக்கப்பட்ட முதல்வரை ஆளுநர் நீக்குவதற்கு அதிகாரம் குறித்து வாயே திறக்கவில்லை.

Image Credit : F/Vanni Arasu

வன்னி அரசு

பொய் வழக்கு போட்டு 30 நாட்கள் சிறைப்படுத்தி சனநாயகத்தை அச்சுறுத்தும் அம்மசோதா குறித்து விஜய் வாய் திறக்காதது ஏன்? தேர்தல் ஆணையத்தின் வழி வாக்குகளை திருடும் ஆபத்து குறித்து பேசாமல் போனது ஏன்? பேசிய அரை மணிநேத்துக்கும் மேலான உரையில், சாதி ஆணவப்படுகொலைகளை தடுத்து நிறுத்த தனிச்சட்டம் வேண்டுமா? வேண்டாமா? என்பது குறித்து பேசாதது ஏனோ? தூத்துக்குடி துப்பாக்கிச்சூட்டில் கொல்லப்பட்ட தங்கை ஸ்னோலின் குறித்து பேசிய விஜய் மறந்தும் கூட, துப்பாக்கிச்சூடு நடத்தி படுகொலை செய்த அதிமுக குறித்து வாய் திறக்காதது ஏனோ?

Image Credit : Asianet News

அதிமுக - தவெக மறைமுக கூட்டணி

திமுகவுக்கும் பாஜகவுக்கும் மறைமுக கூட்டணி என குற்றச்சாட்டு சொல்லும் விஜய் அதற்கான ஆதாரத்தை வெளியிடாமல், எடப்பாடி பழனிச்சாமி அவர்கள் முன் மொழிந்ததை வழிமொழிந்ததன் மூலம் அதிமுகவும் தவெகவும் தான் மறைமுக கூட்டணியாக இருப்பது அம்பலமாகிறது. அந்த கூட்டணியில் பாஜகவும் இருப்பதால், அதிமுக- பாஜக கூட்டணியின் மறைமுக கூட்டணி பார்ட்னராகவே விஜய் செயல்படுகிறார் என்பது தான் இந்த மாநாட்டு செய்தி. மற்றபடி இந்த மாநாடு விஜய்யின் லென்த்தான டயலாக் மாநாடு அவ்வளவு தான் என தெரிவித்துள்ளார்.