சென்னையில் தண்ணீர் பிரச்சினைக்கு புதிய தீர்வு! ரூ.120 கோடியில் சூப்பர் திட்டம்!

சென்னை மாநகராட்சி மழைநீர் சேகரிப்பு மற்றும் நிலத்தடி நீர்மட்டத்தை உயர்த்த 41 குளங்களை ரூ. 120 கோடியில் சீரமைக்கிறது. இப்பணிகள் பருவமழைக்கு முன்பு முடிக்கப்படும்.

Image Credit : our own

சென்னை மாநகராட்சி

பருவமழைக்கு முன்பு, மழைநீரை சேகரிக்கவும் நிலத்தடி நீர் மட்டத்தை உயர்த்தவும், பெருநகர சென்னை மாநகராட்சி ரூ. 120 கோடி செலவில் 41 குளங்களை சீரமைக்க திட்டமிட்டுள்ளது.

சென்னை மாநகராட்சிக்கு உட்பட்ட பகுதியில் தற்போது 250 குளங்கள் பராமரிக்கப்பட்டு வருகின்றன. இவற்றில், நிலத்தடி நீர் மட்டத்தைச் செறிவூட்டவும், மழைநீர் சேமிப்புத் திறனை அதிகரிக்கவும், அனைத்துக் குளங்களையும் பருவமழை தொடங்குவதற்கு முன்னதாகவே சீரமைக்க மாநகராட்சி தீவிரமாகப் பணியாற்றி வருகிறது.

Image Credit : our own

41 குளங்களைச் சீரமைக்க ரூ. 120 கோடி

இது குறித்து மாநகராட்சி அதிகாரி ஒருவர் கூறுகையில், “ஏற்கனவே 179 குளங்களில், தூர்வாருதல், ஆழப்படுத்துதல், பழுது பார்த்தல், அழகுபடுத்துதல், பாதுகாப்பு வேலி அமைத்தல், மண் அரிப்பைத் தடுக்க தடுப்புச் சுவர் அமைத்தல் உள்ளிட்ட பணிகள் முடிவடைந்துள்ளன. தற்போது, மேலும் 35 குளங்களில் சீரமைப்புப் பணிகள் நடைபெற்று வருகின்றன. எஞ்சிய 41 குளங்களைச் சீரமைக்க ரூ. 120 கோடிக்கு டெண்டர்கள் விடப்பட்டுள்ளன. 

மாநகராட்சி ஆணையர் குமரகுருபரன், அந்தந்த மண்டலங்களில் உள்ள துணை ஆணையர்களை நேரடியாகப் பணிகளை மேற்பார்வையிட அறிவுறுத்தியுள்ளார். இந்தப் பணிகள் பருவமழைக்கு முன் முடிக்கப்படும். குளங்களின் கொள்ளளவு அதிகரிப்பதால், அதிக மழைநீரைச் சேமித்து நிலத்தடி நீர் மட்டம் உயர உதவும்" என்று தெரிவித்தார்.

Image Credit : google

திருவீதி அம்மன் கோவில் குளம் சீரமைப்பு

திரு.வி.க. நகர் பகுதி மக்களின் கோரிக்கைகளுக்குச் செவிசாய்த்து, சமீபத்தில் திருவீதி அம்மன் கோவில் குளத்தைச் சென்னை மாநகராட்சி சீரமைத்தது. அங்கு நூற்றுக்கணக்கான முதியவர்கள், கர்ப்பிணிப் பெண்கள் உள்ளிட்டோர் தினமும் காலை மற்றும் மாலை நேரங்களில் நடைப்பயிற்சி மேற்கொள்வது வழக்கம்.

அக்குளத்தில் சேதமடைந்திருந்த மிதவை நீரூற்று சீரமைக்கப்பட்டு, தடுப்புச் சுவருக்கு வர்ணம் பூசப்பட்டது. மேலும், 10 சிசிடிவி கேமராக்கள், நவீன உடற்பயிற்சிக் கருவிகளான எலிப்டிக்கல் கிராஸ் ட்ரெயினர்கள், ஹிப் ட்விஸ்டர்கள், சைக்கிளிங் உள்ளிட்ட பல்வேறு வசதிகளும் இளைஞர்களுக்காக அமைக்கப்பட்டுள்ளன.