Women's T20 World Cup: சரித்திர சாதனை படைத்த தீப்தி சர்மா.. 350 விக்கெட்டுகள்.. யாரும் செய்யாத சாதனை!

Women's T20 World Cup: மகளிர் டி20 உலகக்கோப்பையில் பாகிஸ்தானுக்கு எதிராக 5 விக்கெட் வீழ்த்திய தீப்தி சர்மா புதிய வரலாற்று சாதனையை படைத்துள்ளார். 350 விக்கெட்டுகள் வீழ்த்திய முதல் வீராங்கனை என்ற பெருமை பெற்றுள்ளார். 

Image Credit : X/BCCIWomen

இந்திய அணி வெற்றி

மகளிர் டி20 உலகக்கோப்பையில் நடைபெற்ற ஆட்டத்தில் இந்திய அணி பாகிஸ்தானை 64 ரன்கள் வித்தியாசத்தில் துவம்சம் செய்து அபார வெற்றி பெற்றது. இந்த போட்டியில் முதலில் பேட்டிங் செய்த இந்திய அணி 20 ஓவர்களில் 6 விக்கெட் இழப்பிற்கு 170 ரன்கள் குவித்தது. ஸ்மிருதி மந்தனா வெறும் 44 பந்துகளில் 9 பவுண்டரி, 2 சிக்சர்களுடன் 68 ரன்கள் விளாசினார். கேப்டன் ஹர்மன்பிரீத் கவுர் 36 ரன்கள் எடுத்தார். ரிச்சா கோஷ் 17 பந்துகளில் 5 பவுண்டரி, 1 சிக்சருடன் 34 ரன்கள் நொறுக்கினார். பாகிஸ்தான் தரப்பில் சாடியா இக்பால், பாத்திமா சனா தலா 2 விக்கெட்டுகளை வீழ்த்தினார்கள்.

தீப்தி சர்மா சூப்பர் பவுலிங்

பின்பு 171 ரன்கள் எடுத்தால் வெற்றி என்ற இலக்குடன் ஆடிய பாகிஸ்தான் அணி இந்தியா பந்துவீச்சை தாக்குப்பிடிக்க முடியாமல் 17 ஓவர்களில் 106 ரன்களுக்கு சுருண்டு படுதோல்வி அடைந்தது. இந்திய அணி தரப்பில் தீப்தி சர்மா தனது மேஜிக் ஸ்பின் பவுலிங்கால் 4 ஓவர்களில் 10 ரன்கள் மட்டுமே கொடுத்து 5 விக்கெட்களை சாய்த்து சாதனை படைத்தார். ஸ்ரீ சரணி 4 ஓவரில் 21 ரன்கள் கொடுத்து 3 விக்கெட் வீழ்த்தினார்.

Image Credit : Getty

முதல் பெண் ஸ்பின்னர் என்ற சாதனை

இந்த போட்டியில் 5 விக்கெட்டுகளை வீழ்த்தியதன் மூலம், சர்வதேச கிரிக்கெட்டில் 350 விக்கெட்டுகளை கடந்த முதல் பெண் சுழற்பந்து வீச்சாளர் என்ற உலக சாதனையை தீப்தி படைத்தார். தீப்தி ச‌ர்மா இதுவரை இந்தியாவுக்காக 275 சர்வதேச போட்டிகளில் விளையாடியுள்ளார். இதில் 145 டி20, 124 ஒருநாள் மற்றும் 6 டெஸ்ட் போட்டிகள் அடங்கும். டி20 போட்டிகளில் 166 விக்கெட்டுகளுடன், அதிக விக்கெட் வீழ்த்தியவர் என்ற பெருமையை பெற்றுள்ளார்.

இது 4வது உலகக்கோப்பை

கடந்த ஆண்டு நடந்த ஐசிசி மகளிர் ஒருநாள் உலகக் கோப்பை 2025 தொடரில் 22 விக்கெட்டுகளை வீழ்த்தினார். அதன் இறுதிப் போட்டியில் 5 விக்கெட்டுகளை கைப்பற்றி, 'தொடர் நாயகி' விருதையும் வென்றார். பந்துவீச்சில் மட்டுமல்ல, ஃபீல்டிங்கிலும் தீப்தி ச‌ர்மா தனது 'கோல்டன் ஆர்ம்' மூலம் அசத்தினார். ஒரு முக்கிய பாகிஸ்தான் பேட்டரை ரன் அவுட் செய்து ஆட்டத்தின் போக்கை மாற்றினார். இது தீப்திக்கு நான்காவது டி20 உலகக் கோப்பை. இந்த முறை கோப்பையை வெல்ல இந்திய அணி தீவிரமாக உள்ளது.