ZIM vs IND: ஜிம்பாப்வே ஒருநாள் தொடரிலிருந்து காயத்தால் விலகிய வாஷிங்டன் சுந்தருக்கு மாற்று வீரர் அறிவிப்பு

ஜிம்பாப்வேவுக்கு எதிரான ஒருநாள் தொடரிலிருந்து காயத்தால் விலகிய வாஷிங்டன் சுந்தருக்கு மாற்று வீரராக ஷபாஸ் அகமது சேர்க்கப்பட்டுள்ளார். 

ஆசிய கோப்பை கிரிக்கெட் தொடர் ஆகஸ்ட் 27 முதல் செப்டம்பர் 11 வரை ஐக்கிய அரபு அமீரகத்தில் நடக்கிறது. அந்த தொடரில் ரோஹித் சர்மா தலைமையிலான இந்திய மெயின் அணி ஆடவுள்ளது.

அதனால் ஜிம்பாப்வே சுற்றுப்பயணத்துக்கான கேஎல் ராகுல் தலைமையிலான இந்திய அணியில் இளம் வீரர்கள் இடம்பெற்றுள்ளனர். 

இந்த ஜிம்பாப்வே தொடருக்கான இந்திய அணியில் தமிழகத்தை சேர்ந்த வாஷிங்டன் சுந்தரும் இடம்பிடித்திருந்தார். காயத்தால் அவதிப்பட்டு வந்த அவர் காயத்திலிருந்து மீண்டு இங்கிலாந்தில் உள்நாட்டு போட்டிகளில் ஆடிவந்த நிலையில், ஜிம்பாப்வே தொடருக்கான இந்திய அணியில் மீண்டும் இடம்பிடித்திருந்தார்.

இதையும் படிங்க - சூப்பர் கிங்ஸ் அணியின் கேப்டனாக ஃபாஃப் டுப்ளெசிஸ் நியமனம்..! ஹெட்கோச் ஸ்டீஃபன் ஃப்ளெமிங்

வரும் 18, 20, 22 ஆகிய தேதிகளில் இந்தியா - ஜிம்பாப்வே இடையே 3 ஒருநாள் போட்டிகள் நடக்கவுள்ள நிலையில், இந்த தொடருக்கான இந்திய அணியில் இடம்பெற்றிருந்த சுந்தர் காயத்தால் விலகியுள்ளார்.  இங்கிலாந்தில் நடந்துவரும் ராயல் லண்டன் ஒருநாள் கோப்பை தொடரில் ஆடிவந்த வாஷிங்டன் சுந்தர் காயமடைந்தார். அதனால் ஜிம்பாப்வே தொடருக்கான இந்திய அணியிலிருந்து விலகியுள்ளார்.

அவருக்கு மாற்று வீரராக பெங்காலை சேர்ந்த இடது கை ஸ்பின் ஆல்ரவுண்டரான ஷபாஸ் அகமது தேர்வு செய்யப்பட்டுள்ளார். 27 வயதான ஷபாஸ் அகமது 26 லிஸ்ட் ஏ போட்டிகளில் ஆடி, 662 ரன்கள் அடித்துள்ளார்; 26 விக்கெட்டுகளையும் வீழ்த்தியுள்ளார். ஐபிஎல்லில் ஷபாஸ் அகமது ஆர்சிபி அணியில் ஆடிவருகிறார்.

இதையும் படிங்க - ஒரு இடம் தான் இருக்கு.. இந்திய டி20 அணியில் தினேஷ் கார்த்திக்கிடம் இடத்தை இழக்கும் ரிஷப் பண்ட்..?

ஜிம்பாப்வே ஒருநாள் தொடருக்கான இந்திய அணி:

கேஎல் ராகுல் (கேப்டன்), ஷிகர் தவான் (துணை கேப்டன்), ருதுராஜ் கெய்க்வாட், ஷுப்மன் கில், தீபக் ஹூடா, ராகுல் திரிபாதி, இஷான் கிஷன் (விக்கெட் கீப்பர்), சஞ்சு சாம்சன் (விக்கெட் கீப்பர்), ஷபாஸ் அகமது, ஷர்துல் தாகூர், குல்தீப் யாதவ், அக்ஸர் படேல், ஆவேஷ் கான், பிரசித் கிருஷ்ணா, முகமது சிராஜ், தீபக் சாஹர்.