Sai Sudharsan: சிஎஸ்கேவை கதற விட்ட தமிழன்! விராட் கோலி சாதனையை சமன் செய்த சாய் சுதர்சன்!

Sai Sudharsan: ஐபிஎல் 2026 வாழ்வா சாவா போட்டியில் சிஎஸ்கே குஜராத் அணிக்கு எதிராக படுதோல்வியை சந்தித்து தொடரில் இருந்து வெளியேறியது. தமிழகத்தை சேர்ந்த சாய் சுதர்சன் சிஎஸ்கே பவுலிங்கை சிதறடித்து புது சாதனை ஒன்று படைத்துள்ளார்.

Image Credit : ANI

சிஎஸ்கே படுதோல்வி

ஐபிஎல் தொடரில் பிளே ஆஃப் வாய்ப்பைத் தக்கவைக்க வேண்டிய வாழ்வா-சாவா போட்டியில், குஜராத் டைட்டன்ஸ் அணியிடம் சிஎஸ்கே படுதோல்வி அடைந்து, பிளே ஆஃப் சுற்றுக்குச் செல்லாமலேயே தொடரிலிருந்து வெளியேறியது. இந்த போட்டியில் முதலில் பேட்டிக்ன் செய்த குஜராத் அணி 20 ஓவர்களில் 4 விக்கெட் இழப்பிற்கு 229 ரன்கள் எடுத்தது. 

சாய் சுதர்சன், கேப்டன் சுப்மன் கில் மற்றும் ஜோஸ் பட்லர் ஆகியோரின் அரைசதம் அடித்தனர். சாய் சுதர்சன் 53 பந்துகளில் 84 ரன்கள் எடுத்தார். சுப்மன் கில் 37 பந்துகளில் 64 ரன்கள் அடித்தார். ஜோஸ் பட்லர் 27 பந்துகளில் 57 ரன்களுடனும் ஆட்டமிழக்காமல் இருந்தார்.

பின்பு 230 ரன்கள் என்ற இமாலய இலக்கைத் துரத்திய சிஎஸ்கே 13.4 ஓவர்களில் 140 ரன்களுக்கு ஆல் அவுட் ஆனது. இதன் மூலம் 89 ரன்கள் வித்தியாசத்தில் சென்னை அணி படுதோல்வியைச் சந்தித்தது. சஞ்சு சாம்சன் கோல்டன் டக் ஆகி அதிர்ச்சி அளித்தார். ஷிவம் துபே 17 பந்துகளில் 47 ரன்கள் எடுத்து டாப் ஸ்கோரராக இருந்தார். மேத்யூ ஷார்ட் 14 பந்துகளில் 24 ரன்களும், கேப்டன் ருதுராஜ் கெய்க்வாட் 7 பந்துகளில் 16 ரன்களும், அன்ஷுல் கம்போஜ் 8 பந்துகளில் 19 ரன்களும் எடுத்தனர்.

Image Credit : PTI

முகமது சிராஜ் ஆட்டநாயகன்

குஜராத் தரப்பில் முகமது சிராஜ், ககிசோ ரபாடா, ரஷித் கான் ஆகியோர் தலா 3 விக்கெட்டுகளை வீழ்த்தினர். இந்தத் தோல்வியின் மூலம், 14 போட்டிகளில் 6 வெற்றி, 8 தோல்விகளுடன் 12 புள்ளிகள் பெற்று 7-வது இடத்தைப் பிடித்த சென்னை அணி, இந்த சீசனை முடித்துக் கொண்டது. அதே வேளையில் 18 புள்ளிகளுடன் குஜராத் அணி முதல் குவாலிஃபையர் போட்டிக்கு மிக அருகில் உள்ளது. ஐபிஎல் வரலாற்றில் ரன்கள் அடிப்படையில் சென்னை அணி சந்திக்கும் மிகப்பெரிய தோல்வி இதுவாகும்.

Image Credit : ANI

சாய் சுதர்சன் சாதனை

இந்த போட்டியில் அசத்திய குஜராத் வீரர் தமிழகத்தை சேர்ந்த சாய் சுதர்சன் நடப்பு ஐபிஎல் தொடரில் 600க்கும் அதிகமான ரன்கள் அடித்துள்ளார். அடுத்தடுத்து இரண்டு சீசன்களில் 600-க்கும் அதிகமான ரன்களை அடித்து சாதனை படைத்துள்ளார். இதன் மூலம், கிறிஸ் கெய்ல், டேவிட் வார்னர், கே.எல். ராகுல் மற்றும் விராட் கோலி போன்ற ஜாம்பவான்கள் மட்டுமே இருந்த பிரத்யேக பட்டியலில் சாய் சுதர்சனும் இணைந்துள்ளார். 

அதுமட்டுமல்லாமல், மற்றொரு முக்கிய IPL சாதனையையும் அவர் சமன் செய்துள்ளார். ஒரே சீசனில் தொடர்ச்சியாக ஐந்து முறை 50-க்கும் அதிகமான ரன்களை அடித்த நான்காவது வீரர் என்ற பெருமையை அவர் பெற்றுள்ளார். இதற்கு முன்பு வீரேந்திர சேவாக், ஜோஸ் பட்லர் மற்றும் வார்னர் ஆகியோர் இந்த சாதனையை படைத்துள்ளனர்.