IND vs BAN: இன்னும் 6 தான் – புதிய சாதனையை நோக்கி குஜராத் ஹீரோ ரவீந்திர ஜடேஜா – கொண்டாட காத்திருக்கும் டீம்ஸ்!

ரவீந்திர ஜடேஜா கிரிக்கெட் சாதனைகள்: உலகின் நம்பர் 1 டெஸ்ட் ஆல்ரவுண்டராக இருக்கும் இந்திய நட்சத்திர கிரிக்கெட் வீரர் ரவீந்திர ஜடேஜா தனது சர்வதேச கிரிக்கெட் வாழ்க்கையில் மிகப்பெரிய மைல்கல்லை எட்டும் திசையில் சென்று கொண்டிருக்கிறார். இதுவரை இரட்டை சதம் அடித்த ஜடேஜா, 300 விக்கெட்டுகள் எடுக்க 6 விக்கெட்டுகள் தொலைவில் இருக்கிறார்.

செப்டம்பர் 19 முதல் இந்தியா மற்றும் வங்கதேச அணிகள் இடையே 2 போட்டிகள் கொண்ட டெஸ்ட் தொடர் நடைபெற உள்ளது. இந்தத் தொடருக்கான இந்திய அணி இன்னும் அறிவிக்கப்படவில்லை. இருப்பினும், வங்கதேச அணிக்கு எதிரான டெஸ்ட் தொடரில் ஜடேஜா விளையாடுவார் எனத் தகவல் வெளியாகியுள்ளது. இந்தத் தொடரில் 6 இந்திய கிரிக்கெட் வீரர்கள் மட்டுமே அடைய முடிந்த 300 விக்கெட்டுகளை அவர் எடுக்க வாய்ப்புள்ளது. 

ஜடேஜாவின் 300 விக்கெட்டுகள்.. 

இந்தியா-வங்கதேசம் இடையே நடைபெறும் டெஸ்ட் தொடரில் ஜடேஜா மேலும் 6 விக்கெட்டுகளை வீழ்த்தினால், ரெட் பால் கிரிக்கெட்டில் 300 டெஸ்ட் விக்கெட்டுகளை எட்டிய சாதனையை படைப்பார். ஜடேஜா இதுவரை 72 டெஸ்டுகளில் விளையாடி 294 விக்கெட்டுகளை வீழ்த்தியுள்ளார். 300 விக்கெட்டுகளை எடுத்தால், டெஸ்டுகளில் 300 அல்லது அதற்கு மேற்பட்ட விக்கெட்டுகளை வீழ்த்திய 7ஆவது இந்திய பந்துவீச்சாளர் என்ற பெருமையைப் பெறுவார். 

300+ விக்கெட்டுகளை வீழ்த்திய இந்திய பந்துவீச்சாளர்கள்

இதுவரை இந்தியா தரப்பில் 6 பந்துவீச்சாளர்கள் மட்டுமே டெஸ்டுகளில் 300 அல்லது அதற்கு மேற்பட்ட விக்கெட்டுகளை வீழ்த்தியுள்ளனர். இந்தப் பட்டியலில் அனில் கும்ப்ளே (619 விக்கெட்டுகள்) முதலிடத்தில் உள்ளார். அதைத் தொடர்ந்து ரவிச்சந்திரன் அஸ்வின் (516 விக்கெட்டுகள்) 2ஆவது இடத்தில் உள்ளார்.

மூன்றாவது இடத்தில் இந்திய அணியின் முன்னாள் கேப்டன் கபில் தேவ் (434 விக்கெட்டுகள்) உள்ளார். நான்காவது இடத்தில் முன்னாள் சுழற்பந்து வீச்சாளர் ஹர்பஜன் சிங் (417 விக்கெட்டுகள்) இருக்க, 5ஆவது இடத்தில் வேகப்பந்து வீச்சாளர் இஷாந்த் சர்மா (311 விக்கெட்டுகள்) உள்ளார். ஆறாவது இடத்தில் முன்னாள் சுழற்பந்து வீச்சாளர் ஜாகிர் கான் (311 விக்கெட்டுகள்) உள்ளார். 

ஜடேஜாவின் 'இரட்டை' சத மைல்கல்.. 

ஜடேஜா விக்கெட்டுகளுடன் டிரிபிள் சதம் அடிப்பதுடன் மற்றொரு இரட்டை சத சாதனையையும் படைக்க வாய்ப்புள்ளது. ஜடேஜா இதுவரை ஒருநாள் போட்டிகளில் 197 போட்டிகளில் விளையாடியுள்ளார். மேலும் 3 போட்டிகளில் விளையாடினால், 200 ஒருநாள் போட்டிகளில் விளையாடிய இந்திய கிரிக்கெட் ஜாம்பவான்களின் பட்டியலில் இணைவார்.

இந்திய கேப்டன் ரோகித் சர்மா, நட்சத்திர பேட்ஸ்மேன் விராட் கோலி உள்ளிட்ட 14 இந்திய கிரிக்கெட் வீரர்கள் மட்டுமே இதுவரை 200 அல்லது அதற்கு மேற்பட்ட ஒருநாள் போட்டிகளில் விளையாடியுள்ளனர். இந்தியா தரப்பில் அதிக ஒருநாள் போட்டிகளில் விளையாடிய சாதனை சச்சின் டெண்டுல்கர் பெயரில் உள்ளது. அவர் தனது கிரிக்கெட் வாழ்க்கையில் 463 ஒருநாள் போட்டிகளில் விளையாடியுள்ளார்.

ரவீந்திர ஜடேஜாவின் சர்வதேச கிரிக்கெட் வாழ்க்கை

ஜடேஜா தனது சர்வதேச கிரிக்கெட் வாழ்க்கையை 2009 ஆம் ஆண்டு இலங்கை அணிக்கு எதிரான ஒருநாள் போட்டியில் தொடங்கினார். ஒருநாள் போட்டியில் அறிமுகமான ஒரு நாள் கழித்து ஜட்டு பாய் டி20 சர்வதேச போட்டியில் அறிமுகமாகும் வாய்ப்பைப் பெற்றார். 2012 ஆம் ஆண்டு இங்கிலாந்து அணிக்கு எதிராக ஜடேஜா தனது முதல் டெஸ்ட் போட்டியில் விளையாடினார்.

டெஸ்ட் கிரிக்கெட்டில் ஜடேஜா 294 விக்கெட்டுகளை வீழ்த்தியுள்ளார். ஒருநாள் போட்டிகளில் 220 விக்கெட்டுகளும், டி20 போட்டிகளில் 54 விக்கெட்டுகளும் வீழ்த்தியுள்ளார். இந்த ஆண்டு டி20 உலகக் கோப்பையை வென்ற இந்திய அணியில் ஜடேஜா இடம் பெற்றிருந்தார். இந்த மெகா தொடருக்குப் பிறகு டி20 கிரிக்கெட்டில் இருந்து ஓய்வு பெறுவதாக ஜடேஜா அறிவித்தார்.