ஸ்பின்னிற்கு சாதகமான ஆடுகளங்களில் ரோஹித் சர்மா மட்டும் ஜொலிப்பது எப்படி..? முகமது கைஃப் விளக்கம்

ஸ்பின்னிற்கு சாதகமான ஆடுகளங்களில் எப்படி பேட்டிங் ஆடவேண்டும் என்று வளர்ந்துவரும் கிரிக்கெட் வீரர்கள் ரோஹித் சர்மாவின் பேட்டிங்கை பார்த்து கற்றுக்கொள்ள வேண்டும் என்று முகமது கைஃப் கூறியுள்ளார். 

இந்தியா - ஆஸ்திரேலியா இடையேயான 4 டெஸ்ட் போட்டிகள் கொண்ட தொடரின் முதலிரண்டு போட்டிகளிலும் இந்திய அணி அபார வெற்றி பெற்று 2-0 என தொடரில் முன்னிலை வகிக்கிறது. இந்த டெஸ்ட் தொடரின் மீது மிகுந்த எதிர்பார்ப்பு நிலவியது. இந்த தொடர் மிகக்கடுமையான போட்டியாக இருக்கும் என எதிர்பார்க்கப்பட்டது. ஆனால் முதலிரண்டு போட்டிகளிலும் ஆஸ்திரேலிய அணி முழுமையாக இந்திய அணியிடம் சரணடைந்து படுதோல்விகளை அடைந்தது.

நாக்பூரில் நடந்த முதல் டெஸ்ட்டில் இன்னிங்ஸ் மற்றும் 132 ரன்கள் வித்தியாசத்தில் அபார வெற்றி பெற்ற இந்திய அணி, 2வது டெஸ்ட்டில் 6 விக்கெட் வித்தியாசத்தில் வெற்றி பெற்றது. முதல் 2 டெஸ்ட் போட்டிகளிலும் தோற்று இந்த தொடரை வெல்லும் வாய்ப்பை ஆஸ்திரேலிய அணி இழந்துவிட்டது. 

ஸ்பின்னிற்கு சாதகமான இந்திய ஆடுகளங்களில் டெஸ்ட் போட்டிகளில் ஜெயிக்க ஸ்பின் தான் முக்கியமான அஸ்திரம் என்பதை உணர்ந்து நேதன் லயன், டாட் மர்ஃபி, குன்னெமன், அஷ்டான் அகர் என 4 ஸ்பின்னர்களுடன் இந்தியாவிற்கு வந்த ஆஸ்திரேலிய அணி, முதல் டெஸ்ட்டில் அணி தேர்வில் தவறிழைத்துவிட்டது. 2வது டெஸ்ட்டில் அந்த அணியின் ஸ்பின்னர்கள் சிறப்பாக செயல்பட்டனர். ஸ்பின்னை பயன்படுத்துவதில் ஓரளவிற்கு தேறிய ஆஸ்திரேலிய அணி, இந்திய ஸ்பின்னர்களை எதிர்கொள்வதில் கோட்டைவிட்டது.

அஷ்வின் மற்றும் ஜடேஜாவின் சுழலை சமாளிக்க முடியாமல் இந்திய அணியிடம் 2 போட்டிகளிலும் மண்டியிட்டு சரணடைந்தது. 2வது டெஸ்ட்டில் ஆஸ்திரேலிய அணியின் கை ஓங்கியிருந்தது. ஆனால் ஒரே செசனில் 9 விக்கெட்டுகளை இழந்து, அதில் 7 விக்கெட்டுகளை ஜடேஜாவிடம் இழந்து படுதோல்வி அடைந்தது. ஆஸ்திரேலிய அணியின் நட்சத்திர வீரர்களான ஸ்மித், லபுஷேன் கூட திணறுகின்றனர். 

ஆஸ்திரேலிய வீரர்கள் தீவிரமான பயிற்சி செய்தும் ஸ்பின்னை எதிர்கொள்ள திணறும் நிலையில், இந்திய அணியின் முன்னணி வீரர்களான கோலி, புஜாரா ஆகியோரும் திணறும் நிலையில், ரோஹித் சர்மா ஸ்பின்னர்கள் மீது ஆதிக்கம் செலுத்தி அடித்து ஆடி முதல் டெஸ்ட்டில் சதமடித்து 120 ரன்களை குவித்தார். 2வது டெஸ்ட்டிலும் நன்றாகவே தொடங்கினார். ஆனால் 2 இன்னிங்ஸ்களிலும் பெரிய ஸ்கோர் அடிக்கவில்லை.

இந்த தொடரில் முதல் 2 போட்டிகளில் 183 ரன்களை குவித்து, அதிக ரன்களை குவித்த வீரராக ரோஹித் சர்மா திகழ்கிறார். ரோஹித் சர்மா ஸ்பின்னர்களை செட்டில் ஆகவிடாமல், அடித்து ஆடி ஸ்கோர் செய்வதால் தான், மற்ற வீரர்கள் திணறிய போதிலும், அவரால் ஜொலிக்க முடிந்தது. ஸ்பின்னர்களுக்கு பெரியளவில் மதிப்பு கொடுக்காமல், தனது திறமை மீது நம்பிக்கை வைத்து அடித்து ஆடியதால் தான், மற்ற வீரர்கள் அனைவருமே திணறிய போதிலும், ரோஹித் சர்மாவால் ஜொலிக்க முடிந்தது. 

ஸ்பின்னிற்கு சாதகமான ஆடுகளங்களில் எப்படி ஆடவேண்டும் என்று வளர்ந்துவரும் வீரர்கள் ரோஹித் சர்மாவின் பேட்டிங்கை பார்த்து கற்றுக்கொள்ள வேண்டும் என்று முகமது கைஃப் கருத்து கூறியுள்ளார்.

இதுகுறித்து பேசிய முகமது கைஃப், ரோஹித் சர்மா நல்ல ஃபார்மில் உள்ளார். நிறைய ரன்களை அடித்துவருகிறார். ஸ்பின்னிற்கு சாதகமான ஆடுகளங்களில் எப்படி பேட்டிங் ஆடவேண்டும் என்பதை ஆடியே காட்டுகிறார். லாங் ஆனில் ஃபீல்டரே நின்றாலும் கூட, அவரது தலைக்கு மேல் தூக்கி சிக்ஸர் அடிக்கிறார் ரோஹித். லாங் ஆனில் ஃபீல்டர் நின்றாலும் தனது திறமை மீது நம்பிக்கை வைத்து சிக்ஸர் அடிக்கிறார். வளர்ந்துவரும் ஒவ்வொரு கிரிக்கெட் வீரரும், ரோஹித் சர்மா பந்தை எந்த திசையில் எப்படி அடிக்கிறார் என்பதை பார்க்க வேண்டும். ரோஹித் சர்மா ஆடும் விதத்தை பார்க்கையில், கடைசி 2 டெஸ்ட் போட்டிகளிலும் அவர் அபாரமாக ஆடுவார் என்று நம்புவதாக முகமது கைஃப் தெரிவித்துள்ளார்.