இந்தியா–பாகிஸ்தான் போட்டி இல்லையா? T20 உலகக் கோப்பையே இப்போ கேள்விக்குறி?
2026 T20 உலகக் கோப்பையில் இருந்து பாகிஸ்தான் விலகக்கூடும் என்ற அறிவிப்பு, பெரும் சர்ச்சையை ஏற்படுத்தியுள்ளது. இந்த ஒற்றைப் போட்டியின் நிச்சயமற்ற தன்மை, உலகக் கோப்பையின் எதிர்காலத்தையே கேள்விக்குறியாக்கியுள்ளது.
2026 ஆம் ஆண்டு நடைபெற உள்ள T20 உலகக் கோப்பையின் முக்கியத்துவமே தற்போது கேள்விக்குறியாக மாறியுள்ளது. காரணம், கிரிக்கெட் உலகில் மிகப்பெரிய வர்த்தக மதிப்பைக் கொண்ட இந்தியா–பாகிஸ்தான் போட்டி நடைபெறுமா என்ற சந்தேகம். பாகிஸ்தான் தரப்பிலிருந்து வெளியாகியுள்ள சமீபத்திய அறிவிப்பு, இந்தப் போட்டியிலிருந்து விலகும் முடிவை எடுத்துள்ளதாகக் கூறுவதால், உலகக் கோப்பையின் வருமான அடித்தளமே குலுங்கும் சூழல் உருவாகியுள்ளது. இந்தியா–பாகிஸ்தான் மோதல் என்பது வெறும் ஒரு கிரிக்கெட் போட்டி அல்ல. உலகம் முழுவதும் உள்ள ரசிகர்கள் டிவி, மொபைல், டிஜிட்டல் தளங்களில் குவியும் ஒரே போட்டி இதுதான்.
கடந்த உலகக் கோப்பை வரலாற்றைப் பார்த்தால், இந்த ஒரு போட்டிக்காகவே பல நாடுகளில் விடுப்பு எடுத்து ரசிகர்கள் வீட்டிலேயே அமர்ந்து போட்டியை பார்த்த சம்பவங்களும் உண்டு. இந்தப் போட்டி இல்லாமல் போனால், டிக்கெட் விற்பனை முதல் உலகளாவிய பார்வையாளர் எண்ணிக்கை வரை அனைத்திலும் பெரிய வீழ்ச்சி ஏற்படும். வருமானக் கோணத்தில் பார்க்கும்போது, இந்த ஒரே போட்டி ஒளிபரப்பாளர்கள் மற்றும் டிஜிட்டல் பங்குதாரர்களுக்கு தங்கச் சுரங்கமாகும். விளம்பர வருமானம், ஸ்பான்சர் ஒப்பந்தங்கள், லைவ் ஸ்ட்ரீமிங் உரிமைகள் என ஒரே இந்தியா–பாகிஸ்தான் போட்டி மூலம் நூற்றுக்கணக்கான கோடி ரூபாய் சுழலுகிறது.
இந்த மோதல் நடைபெறாத சூழலில், ஒளிபரப்பு நிறுவனங்கள் சர்வதேச கிரிக்கெட் கவுன்சில் (ICC) மீது இழப்பீடு கோரி அழுத்தம் தரக்கூடும் என்பது குறிப்பிடத்தக்கது. இந்த நிலையில், பாகிஸ்தான் அரசின் நிலைப்பாட்டை தொடர்ந்து, பாகிஸ்தான் கிரிக்கெட் வாரியம் (பிசிபி) மீது கடும் நடவடிக்கை எடுக்க ஐசிசி ஆலோசித்து வருவதாக தகவல்கள் தெரிவிக்கின்றன. உலகக் கோப்பையில் இருந்து நீக்கம், நிதி பங்கீட்டை நிறுத்துதல் உள்ளிட்ட தண்டனைகள் பரிசீலனையில் இருப்பதாகக் கூறப்படுகிறது.
இது பாகிஸ்தான் கிரிக்கெட்டுக்கு நேரடி நிதி நஷ்டமாக மட்டுமல்ல, எதிர்கால தொடரிலும் பெரிய பின்னடைவை ஏற்படுத்தும். உலகக் கிரிக்கெட் ரசிகர்கள் அவளுடன் எதிர்பார்த்து காத்திருக்கும் இந்த மோதல் நடக்குமா, இல்லையா என்பது இன்னும் உறுதி செய்யப்படவில்லை. ஆனால் ஒன்று மட்டும் தெளிவாக இருக்கிறது. 2026 T20 உலகக் கோப்பை என்ற உலகளாவிய தொடரின் கவனம், வருமானம் மற்றும் தாக்கம் அனைத்தும் இந்த ஒரே போட்டியை மையமாகக் கொண்டே நகர்கிறது. ICC எடுக்கும் அடுத்தடுத்த முடிவுகள், பாகிஸ்தான் தரப்பின் நிலைப்பாட்டை மாற்றுவது தான் தற்போது உலகக் கிரிக்கெட் அரங்கின் மிகப்பெரிய எதிர்பார்ப்பாக மாறியுள்ளது.
