இந்தியா vs இங்கிலாந்து.. சஞ்சு சாம்சனின் பலவீனம்.. வலைவிரிக்கும் ஆர்ச்சர்.. சேட்டன் தப்புவாரா?

India vs England T20 WC 2026: இங்கிலாந்துக்கு எதிராக சஞ்சு சாம்சனின் பேட்டிங் ரெக்கார்டு அவ்வளவு சிறப்பாக இல்லை. ஐந்து இன்னிங்ஸ்களில் அவர் வெறும் 51 ரன்கள் மட்டுமே எடுத்துள்ளார். 

Image Credit : x

இந்தியா vs இங்கிலாந்து அரையிறுதி போட்டி

டி20 உலகக் கோப்பை 2வது அரையிறுதியில் இந்தியாவும், இங்கிலாந்தும் இன்று மோதுகின்றன. இந்திய அணி எளிதாக வெற்றி பெற்று பைனலுக்கு செல்லும் என எதிர்பார்க்கப்படுகிறது. ஆனால் இந்திய அணிக்கும் ரசிகர்களுக்கும் ஒரு பெரிய தலைவலி தொடங்கியுள்ளது. அது வான்கடே மைதானத்தில் இங்கிலாந்து வேகப்பந்து வீச்சாளர் ஜோஃப்ரா ஆர்ச்சரின் பந்துவீச்சை சஞ்சு சாம்சன் எப்படி எதிர்கொள்வார் என்பதுதான்.

ஆர்ச்சருக்கு எதிராக தடுமாறிய சஞ்சு சாம்சன்

சஞ்சு சாம்சனை அதிகம் திணறடித்த பந்துவீச்சாளர்களில் இங்கிலாந்தின் வேகப்பந்து வீச்சாளர் ஜோஃப்ரா ஆர்ச்சரும் ஒருவர். ஆர்ச்சருக்கு எதிராக விளையாடிய ஐந்து இன்னிங்ஸ்களில் சஞ்சு சாம்சன் மூன்று முறை ஆட்டமிழந்துள்ளார். ஆர்ச்சருக்கு எதிராக சஞ்சுவின் பேட்டிங் சராசரி வெறும் 8.33 ஆகும். 

ஆர்ச்சர் வீசிய 23 பந்துகளில் 13 பந்துகளில் சஞ்சு ஒரு ரன் கூட எடுக்க முடியவில்லை. வான்கடே பிட்ச்சில் கிடைக்கும் கூடுதல் பவுன்ஸைப் பயன்படுத்தி ஷார்ட் பால்கள் மூலம் சஞ்சுவை ஆட்டமிழக்கச் செய்ய இங்கிலாந்து அணி திட்டமிட்டுள்ளது.

Image Credit : Getty

இங்கிலாந்துக்கு எதிராக மோசமான ரிக்கார்ட்

இதேபோல், சாம் கரனும் ஐபிஎல் தொடரில் சஞ்சுவை இரண்டு முறை ஆட்டமிழக்கச் செய்துள்ளார். மற்ற அணிகளுக்கு எதிராக சிறப்பாக விளையாடினாலும், இங்கிலாந்துக்கு எதிராக சஞ்சு சாம்சனின் பேட்டிங் ரெக்கார்டு அவ்வளவு சிறப்பாக இல்லை. ஐந்து இன்னிங்ஸ்களில் அவர் வெறும் 51 ரன்கள் மட்டுமே எடுத்துள்ளார்.

 கடந்த ஆண்டு இங்கிலாந்துக்கு எதிராக நடந்த ஐந்து போட்டிகள் கொண்ட டி20 தொடரில் சஞ்சு 26, 5, 3, 1, மற்றும் 16 ரன்கள் எடுத்திருந்தார். இங்கிலாந்துக்கு எதிராக சஞ்சுவின் பேட்டிங் சராசரி 10.20 மற்றும் ஸ்டிரைக் ரேட் 118.60 மட்டுமே.

கூடுதல் பாஸ்ட் பவுலர்

சஞ்சுவின் ஷார்ட் பால் பலவீனத்தைக் கருத்தில் கொண்டு, இங்கிலாந்து அணி கூடுதல் வேகப்பந்து வீச்சாளரைச் சேர்க்க ஆலோசித்து வருகிறது. தகவல்களின்படி, ஜோஷ் டங் அணியில் அறிமுகமாகும் வாய்ப்புள்ளது. இதற்கு முன்பு, வேகப்பந்து வீச்சாளர்களான சாகிப் மஹ்மூத் மற்றும் மார்க் வுட் ஆகியோரும் ஷார்ட் பால்கள் மூலம் சஞ்சுவின் விக்கெட்டை வீழ்த்தியுள்ளனர்.

Image Credit : Getty

சராசரி மிகவும் குறைவு

ஆஸ்திரேலியா, நியூசிலாந்து மற்றும் இலங்கை அணிகளுக்கு எதிராகவும் சஞ்சுவின் சராசரி 15க்கும் குறைவாகவே உள்ளது. ஆனால், வெஸ்ட் இண்டீஸுக்கு எதிராகக் காட்டிய சிறப்பான ஃபார்மை இங்கிலாந்துக்கு எதிராகவும் தொடர்வார் என ரசிகர்கள் எதிர்பார்க்கின்றனர். கொல்கத்தாவில் வெளிப்படுத்திய அந்தப் போராட்ட குணத்தை வான்கடேவிலும் சஞ்சு வெளிப்படுத்தினால், இந்தியா இறுதிப் போட்டிக்குச் செல்லும் பாதை எளிதாகும்.

Image Credit : Getty

கணிப்புகளை தவிடுபொடியாக்குவாரா சஞ்சு?

சூப்பர்-8 சுற்றில் வெஸ்ட் இண்டீஸுக்கு எதிரான வாழ்வா சாவா போட்டியில் 196 ரன்கள் என்ற கடினமான இலக்கைத் துரத்திய இந்திய அணிக்கு சஞ்சு சாம்சன், வெறும் 50 பந்துகளில் ஆட்டமிழக்காமல் 97 ரன்கள் அடித்து, 4 பந்துகள் மீதமிருந்த நிலையில் அணியை வெற்றி பெறச் செய்தார். தற்போது அரையிறுதியிலும் சஞ்சு அதே ஃபார்மை தொடர வேண்டும் என்பதே இந்திய ரசிகர்களின் விருப்பமாக உள்ளது.