கில்லுக்கு செம சான்ஸ்... பிராட்மேன் சாதனையை முறியடிக்க முடியுமா?
இந்திய கேப்டன் சுப்மன் கில், இங்கிலாந்துக்கு எதிரான டெஸ்ட் தொடரில் அபாரமாக விளையாடி வருகிறார். இரண்டு டெஸ்டுகளில் 585 ரன்கள் குவித்துள்ள அவர், டான் பிராட்மேனின் ஒரு தொடரில் 974 ரன்கள் என்ற சாதனையை முறியடிப்பாரா என்ற எதிர்பார்ப்பு எழுந்துள்ளது.
சுப்மன் கில்லின் அபாரமான பேட்டிங்
இந்தியா - இங்கிலாந்து இடையேயான ஐந்து போட்டிகள் கொண்ட டெஸ்ட் தொடரின் முதல் இரண்டு டெஸ்ட் போட்டிகளிலேயே, இந்திய அணியின் கேப்டன் சுப்மன் கில் கிரிக்கெட் உலகின் கவனத்தை ஈர்த்துள்ளார். ரோஹித் ஷர்மாவை அடுத்து டெஸ்ட் கேப்டனாக பொறுப்பேற்ற கில், பேட்டிங் திறமையை முழுமையாக வெளிப்படுத்தி அணியை முன்னின்று வழிநடத்தி வருகிறார்.
25 வயதான சுப்மன் கில், 2வது டெஸ்டின் இரண்டு இன்னிங்ஸ்களிலும் 269 மற்றும் 161 ரன்கள் எடுத்ததன் மூலம், ஒரு டெஸ்ட் போட்டியில் (430) அதிக ரன்கள் எடுத்தவர்கள் பட்டியலில் கிரஹாம் கூச்சிற்குப் பிறகு இரண்டாவது இடத்தைப் பிடித்தார்.
இரண்டு டெஸ்டில் 585 ரன்கள்
முதல் இரண்டு டெஸ்டுகளில் மட்டுமே, சுப்மன் கில் ஒரு இரட்டை சதம் மற்றும் இரண்டு சதங்கள் உட்பட, 585 ரன்கள் குவித்துள்ளார். சராசரியாக 146.25 ரன்கள். இத்தொடரில் தற்போது இரண்டாவது அதிக ரன் எடுத்தவர் இங்கிலாந்து விக்கெட் கீப்பர்-பேட்ஸ்மேன் ஜேமி ஸ்மித், அவர் 356 ரன்கள் எடுத்துள்ளார்.
ஏற்கனவே எட்க்பாஸ்டன் டெஸ்டில் பல சாதனைகளை முறியடித்திருக்கும் சுப்மன் கில், டான் பிராட்மேனின் ஒரு டெஸ்ட் தொடரில் 974 ரன்கள் என்ற இமாலய சாதனையை முறியடிக்க வாய்ப்பு இருப்பதாக கிரிக்கெட் ரசிகர்கள் கருதுகின்றனர்.
டான் பிராட்மேனின் 1930ஆம் ஆண்டு சாதனை
ஆஸ்திரேலிய பேட்டிங் ஜாம்பவான் டான் பிராட்மேன், டெஸ்ட் கிரிக்கெட்டில் அதிக சராசரி, அதிக இரட்டை சதங்கள், முதல் தர கிரிக்கெட்டில் அதிக சராசரி, ஒரே நாளில் முச்சதம், ஒரு டெஸ்ட் தொடரில் 974 ரன்கள் என பல சாதனைகளுக்குச் சொந்தக்காரர்.
1930ஆம் ஆண்டு இங்கிலாந்துக்கு எதிரான ஆஷஸ் தொடரில், பிராட்மேன் தனது உச்சகட்ட ஃபார்மில் இருந்தார். ஐந்து போட்டிகள் கொண்ட தொடரில் அவர் தனி ஆளாக ஆதிக்கம் செலுத்தினார். பந்துவீச்சை துவம்சம் செய்து எளிதாக ரன் குவித்தார். ஏழு இன்னிங்ஸ்களில் 139.14 சராசரியுடன் 4 சதங்கள் உட்பட 974 ரன்கள் எடுத்தார்.
1930ஆம் ஆண்டு ஆஷஸ் தொடரில் டான் பிராட்மேனின் ஆதிக்கம் எந்த அளவுக்கு இருந்தது என்றால், இரண்டாவது அதிக ரன் எடுத்தவரான இங்கிலாந்தின் ஹெர்பர்ட் சுட்க்ளிஃப் 436 ரன்கள் மட்டுமே அடித்திருந்தார். இது பிராட்மேனின் மொத்த ரன்களில் பாதிக்கும் குறைவாகும். இது அப்போது 22 வயதே ஆன பிராட்மேனின் இணையற்ற திறமையைக் காட்டுகிறது.
டான் பிராட்மேனுக்கு முன், ஒரு டெஸ்ட் தொடரில் அதிக ரன்கள் எடுத்த சாதனை இங்கிலாந்தின் ஜாம்பவான் பேட்ஸ்மேன் வாலி ஹம்மண்ட் வசம் இருந்தது. அவர் 1928/29 ஆஷஸ் தொடரில் ஆஸ்திரேலியாவுக்கு எதிராக ஒன்பது இன்னிங்ஸ்களில் 113.12 சராசரியுடன் 905 ரன்களைக் குவித்தார். இதில் 4 சதங்களும் அடங்கும்.
பிராட்மேன் ஹம்மண்டின் சாதனையை முறியடித்த பிறகு, எந்த ஒரு பேட்ஸ்மேனும் ஒரு டெஸ்ட் தொடரில் 900 ரன்களையே நெருங்கவில்லை.
கில் பிராட்மேனின் சாதனையை முறியடிப்பாரா சுப்மன் கில்?
ஆண்டர்சன்-டெண்டுல்கர் கோப்பை தொடரில் சுப்மன் கில் பேட்டிங்கில் மிகவும் சிறப்பாக செயல்பட்டு வருகிறார். ஆனால், டான் பிராட்மேன் சாதனையை நெருங்குவதே மிகப்பெரிய சவால்தான். இந்திய கேப்டன் தனது சிறப்பான ஃபார்மை மீதமுள்ள மூன்று டெஸ்டுகளிலும் தொடர்ந்தால் மட்டுமே அது சாத்தியம். ஒவ்வொரு முறை களமிறங்கும்போதும் ரன்களைக் குவித்து பெரிய ஸ்கோர் அடித்தால் மட்டுமே பிராட்மேனின் சாதனைக்கு அருகில் செல்ல முடியும்.
பிராட்மேன் சாதனையை முறியடிக்கும் வாய்ப்பு
நடந்துவரும் இங்கிலாந்து டெஸ்ட் தொடரில், சுப்மன் கில் இரண்டு டெஸ்ட் போட்டிகளில் 146.25 என்ற பேட்டிங் சராசரியைக் கொண்டுள்ளார். இது பிராட்மேனின் சாதனையை சேஸ் செய்ய வலுவான அடித்தளமாக உள்ளது. பிராட்மேனின் சாதனையை முறியடிக்க அவர் அடுத்த மூன்று டெஸ்ட் போட்டிகளில் இன்னும் 390 ரன்கள் அடிக்க வேண்டும். ஒரு போட்டிக்கு சராசரியாக குறைந்தது 130 ரன்கள் அல்லது ஒரு இன்னிங்ஸ்க்கு 65 ரன்கள் எடுக்க வேண்டும்.
முன்னாள் இந்திய கேப்டன் திலீப் வெங்சர்க்கர், சுப்மன் கில் டான் பிராட்மேனின் சாதனையை முறியடிப்பாரா என்று இப்போதே கணிக்க முடியாது என்கிறார். ஏனெனில் அவர் அந்த சாதனையை முறியடிக்க இன்னும் 390 ரன்கள் தேவை என்றும் ஒரு தனிப்பட்ட மைல்கல்லுக்காக விளையாடக்கூடாது என்றும் அவர் கூறியுள்ளார்.
