- Home
- Sports
- Sports Cricket
- சஞ்சு சாம்சன் - The New King of T20: வெறும் 5 போட்டியில் தொடர் நாயகன் விருது.. சேட்டனின் சாதனை
சஞ்சு சாம்சன் - The New King of T20: வெறும் 5 போட்டியில் தொடர் நாயகன் விருது.. சேட்டனின் சாதனை
Sanju Samson: 2026 உலகக்கோப்பை தொடர் இந்திய அணிக்கு மட்டுமல்ல தொடக்க ஆட்டக்காரர் சஞ்சு சாம்சனுக்கும் மிக முக்கியமான போட்டியாக அமைந்துள்ளது. அதிக சிக்சர், அதிக ரன்கள் என பல சாதனைகளை படைத்து சஞ்சு தனது பலத்தை நிரூபித்துள்ளார்.
போராடி இடத்தை பெற்ற சஞ்சு
இந்திய கிரிக்கெட் வரலாற்றில் பல போராட்டங்களுக்குப் பிறகு ஒரு வீரர் தனது திறமையை உலக அரங்கில் நிரூபிப்பது என்பது அரிதான ஒன்று. அந்த வரிசையில், 2026 ஐசிசி டி20 உலகக்கோப்பைத் தொடர் சஞ்சு சாம்சனின் வாழ்நாள் சாதனையாக அமைந்துவிட்டது. பல ஆண்டுகளாக அணியில் நிரந்தர இடம் கிடைக்காமல் தவித்து வந்த சஞ்சு, இந்த உலகக்கோப்பையில் இந்திய அணியின் தூணாக நின்று கோப்பையை வென்று கொடுத்துள்ளார்.
தொடர் நாயகனாக விஸ்வரூபம்
இந்தத் தொடர் முழுவதும் சஞ்சு சாம்சன் காட்டிய நிதானமும், அதே நேரத்தில் அவர் வெளிப்படுத்திய அதிரடியும் கிரிக்கெட் உலகையே வியப்பில் ஆழ்த்தியது. 2014-ல் விராட் கோலி படைத்த 'ஒரு தொடரில் அதிக ரன்கள்' என்ற சாதனையை முறியடித்து, மொத்தம் 321 ரன்களை சஞ்சு குவித்தார். வெறும் 5 போட்டிகளில் மட்டுமே களம் இறக்கப்பட்ட சஞ்சு இந்த சாதனையைப் படைத்துள்ளார் என்பது குறிப்பிடத்தக்கது. இதன் மூலம், ஒரு டி20 உலகக்கோப்பை தொடரில் அதிக ரன்கள் எடுத்த இந்திய வீரர் என்ற புதிய சரித்திரத்தைப் படைத்தார்.
இறுதிப்போட்டியில் உலக சாதனை
நியூசிலாந்துக்கு எதிராக நடைபெற்ற விறுவிறுப்பான இறுதிப்போட்டியில், தொடக்க ஆட்டக்காரராக களமிறங்கிய சஞ்சு, அபிஷேக் ஷர்மா ஜோடி ஆட்டத்தின் போக்கையே மாற்றியது. இந்தப் போட்டியில் சஞ்சு விளாசிய 89 ரன்கள், டி20 உலகக்கோப்பை இறுதிப்போட்டி வரலாற்றிலேயே ஒரு வீரர் எடுத்த அதிகபட்ச ரன்களாகப் பதிவானது. இதன் மூலம் 2012-ல் மார்லன் சாமுவேல்ஸ் படைத்த (85 ரன்கள்) சாதனையை சஞ்சு தகர்த்தார்.
புள்ளிவிவரங்களின் நாயகன்
சஞ்சு சாம்சனின் இந்த அதிரடி ஆட்டம் வெறும் ரன்களோடு நின்றுவிடவில்லை. அவரது புள்ளிவிவரங்கள் வியக்கத்தக்க வகையில் அமைந்திருந்தன. இந்தத் தொடரில் சஞ்சுவின் சராசரி 80.25 ஆக இருந்தது. மிக முக்கியமாக, 199.37 என்ற அசுரத்தனமான ஸ்டிரைக் ரேட்டில் ரன்களைக் குவித்தார். மேலும் ஒரு உலகக்கோப்பை தொடரில் அதிக சிக்ஸர்கள் விளாசிய வீரர் என்ற பெருமையை 24 சிக்ஸர்களுடன் தன்வசப்படுத்தினார்.
நாக்-அவுட் ஸ்பெஷலிஸ்ட்: அரைஇறுதி மற்றும் இறுதிப்போட்டி என இரண்டிலும் அரைசதம் கடந்து, நெருக்கடியான நேரங்களில் ஜொலிக்கும் 'பிக் மேட்ச் பிளேயர்' என்பதை நிரூபித்தார்.
விடாமுயற்சியின் வெற்றி
2024 டி20 உலகக்கோப்பை அணியில் சஞ்சு இடம்பெற்றிருந்தாலும், ஒரு போட்டியில் கூட விளையாட அவருக்கு வாய்ப்பு வழங்கப்படவில்லை. ஆனால், மனம் தளராத சஞ்சு, உள்நாட்டுப் போட்டிகளிலும், ஐபிஎல் தொடரிலும் காட்டிய சீரான ஆட்டத்தினால் 2026 அணியில் மீண்டும் இடம்பிடித்தார். இந்த முறை வெறும் வீரராக மட்டுமல்லாமல், தொடரை வென்று கொடுத்த கதாநாயகனாக (Player of the Tournament) உருவெடுத்துள்ளார்.
இந்திய அணிக்கு மூன்றாவது முறையாக டி20 உலகக்கோப்பையை பெற்றுத் தந்ததில் சஞ்சு சாம்சனின் பங்கு ஈடுஇணையற்றது. "சஞ்சு சாம்சனுக்கு போதிய வாய்ப்புகள் வழங்கப்படவில்லை" என்ற பல ஆண்டுகால விமர்சனத்திற்கு, தனது பேட் மூலமாகவே அவர் பதிலடி கொடுத்துள்ளார். இந்த 2026 உலகக்கோப்பை 'சஞ்சுவின் சகாப்தம்' என்று கிரிக்கெட் வரலாற்றில் பொன்னெழுத்துக்களால் பொறிக்கப்படும்.
