Lenin Pandiyan Review : சிவாஜி பேரன் ஹீரோவாக பாஸ் ஆனாரா? ஃபெயில் ஆனாரா? லெனின் பாண்டியன் விமர்சனம்

Lenin Pandiyan Movie Review : பாலசந்திரன் இயக்கத்தில் சிவாஜி கணேசனின் பேரன் தர்ஷன் ஹீரோவாக நடித்துள்ள லெனின் பாண்டியன் திரைப்படத்தின் முழு விமர்சனத்தை இங்கே பார்க்கலாம்.

Image Credit : X

லெனின் பாண்டியன் விமர்சனம்

சிவகங்கை மாவட்டத்தைப் பின்னணியாகக் கொண்டு, மணற்கொள்ளை, அரசியல் அதிகாரம் மற்றும் சாமானிய மனிதனின் போராட்டம் ஆகியவற்றை மையமாக வைத்து உருவாகியுள்ள திரைப்படம் ‘லெனின் பாண்டியன்’. அதிகாரத்துக்கு எதிராக அறம் எப்படி குரல் கொடுக்கிறது என்பதை கதைக்களமாகக் கொண்டுள்ள இப்படம், நீதிமன்றப் போராட்டத்தையும் முக்கியமான களமாகக் கொண்டுள்ளது. இப்படத்தின் மூலம் சிவாஜி கணேசனின் பேரன் தர்ஷன் நாயகனாக அறிமுகமாகி உள்ளார். மேலும் இதில் ரோஜா, கங்கை அமரன் ஆகியோர் முக்கிய கதாபாத்திரத்தில் நடித்துள்ளனர். பாலச்சந்திரன் இயக்கி உள்ளார். இளையராஜா இசையமைத்துள்ளார். இதன் விமர்சனத்தை பார்க்கலாம்.

Image Credit : X

கதை என்ன?

படத்தின் நாயகன் தர்ஷன் கணேசன், காவல்துறையில் கான்ஸ்டபிளாக பணியாற்றுகிறார். காவல் நிலையத்தில் பெரிய அளவில் மதிப்போ, மரியாதையோ இல்லாமல் சாதாரண நிலையில் இருக்கும் அவருடைய வாழ்க்கை, சிவகங்கை பகுதியில் நடைபெறும் மணற்கொள்ளை பிரச்சினையால் எதிர்பாராத திருப்பத்தை சந்திக்கிறது.

மணற்கொள்ளையால் பாதிக்கப்படும் எளிய மனிதராக கங்கை அமரன் வருகிறார். தனக்கு ஏற்பட்ட பிரச்சினையை அவர் நீதிமன்றம் வரை எடுத்துச் செல்கிறார். அந்தப் போராட்டத்தில் தர்ஷன் கணேசனும் அவருக்கு ஆதரவாக நிற்கிறார். இதன்பிறகு அதிகார பலம் ஒருபுறமும், அறம் மறுபுறமும் நிற்க, இறுதியில் வெற்றி யாருக்கு என்பதே படத்தின் மீதிக்கதை.

Image Credit : X

நடிகர்களின் பங்களிப்பு

தர்ஷன் கணேசன் கதாபாத்திரத்திற்கு தேவையான நடிப்பை வழங்க முயற்சி செய்துள்ளார். சில காட்சிகளில் அவரது நடிப்பு கவனம் ஈர்த்தாலும், இன்னும் சிறப்பான நடிப்பை வெளிப்படுத்தியிருக்கலாம் என்ற எண்ணம் ஏற்படுகிறது.

ஸ்ரீரிட்டா ராவ் தனது கதாபாத்திரத்தை இயல்பாகக் கையாண்டு பாராட்டைப் பெறுகிறார். கங்கை அமரன் சில காட்சிகளில் நடிப்பில் தடுமாறினாலும், பல முக்கியமான தருணங்களில் கதாபாத்திரத்துக்கு நியாயம் செய்துள்ளார். ரோஜா தனக்கு வழங்கப்பட்ட பாத்திரத்தை சிறப்பாக கையாண்டிருக்கிறார்.

படத்தில் குறைவான காட்சிகளிலேயே தோன்றினாலும் ஜார்ஜ் மரியன் தனது அனுபவமான நடிப்பால் கவனம் ஈர்க்கிறார். அதேபோல் ஆடுகளம் நரேன், போஸ் வெங்கட், யுகேந்திரன் உள்ளிட்ட நடிகர்களும் தங்களுக்கு வழங்கப்பட்ட கதாபாத்திரங்களில் சிறப்பாக செயல்பட்டுள்ளனர்.

Image Credit : X

லெனின் பாண்டியன் படத்தின் பிளஸ் - மைனஸ் என்ன?

இளையராஜாவின் இசை படத்தின் உணர்வுகளை வலுப்படுத்தும் வகையில் அமைந்துள்ளது. பல காட்சிகளுக்கு இசை கூடுதல் உயிர் கொடுக்கிறது. ஏ.எம்.எட்வின் சகே தனது ஒளிப்பதிவின் மூலம் கதையின் களத்தையும் சூழலையும் திறம்பட பதிவு செய்துள்ளார்.

படத்தின் மிகப்பெரிய பலமாக இருப்பது அதன் அழுத்தமான கதைக்களம். அரசியல் அதிகாரத்துக்கும் அறத்துக்கும் இடையிலான மோதலை மையப்படுத்தியிருப்பது சுவாரஸ்யத்தை ஏற்படுத்துகிறது. குறிப்பாக இயக்குநர் பாலசந்திரன் எழுதியுள்ள வசனங்களில் ஆழமான கருத்துகள் இடம்பெற்றுள்ளன.

ஆனால், கதைக்கு இருக்கும் வலிமை திரைக்கதையில் முழுமையாக வெளிப்படவில்லை. சில காட்சிகளுக்கு இடையிலான இணைப்பு இயல்பாக இல்லாதது போல் தெரிகிறது. அதேபோல், சில கதாபாத்திரங்களின் செயல்பாடுகளிலும் இயல்புத்தன்மை குறைவாக இருப்பது படத்தின் ஓட்டத்தை பாதிக்கிறது.