Pillow Hygiene: அடிக்கடி சளி, இருமலா? நீங்க தூங்குற 'பழைய தலையணை' காரணமா? டாக்டர்ஸ் வார்னிங்!

Pillow Hygiene: நாம் பயன்படுத்தும் பழைய தலையணைகளூம், நீண்ட நாட்களாக துவைக்காமல் பயன்படுத்தும் தலையணைகளும் நோய் எதிர்ப்பு சக்தி குறைய காரணமாக மருத்துவர்கள் எச்சரிக்கின்றனர். இதற்கு என்ன தீர்வு? என செய்தியில் விரிவாக பார்க்கலாம். 

Image Credit : Getty

பழைய தலையணையால் குறையும் நோய் எதிர்ப்பு சக்தி

நாம் அன்றாடம் பயன்படுத்தும் படுக்கை விரிப்புகளையும், தலையணை உறைகளையும் துவைப்பதில் காட்டும் ஆர்வத்தை, தலையணையை சுத்தம் செய்வதில் காட்டுவதில்லை. ஆனால், நாம் அலட்சியமாக நினைக்கும் அந்தப் பழைய தலையணைதான் நமது நோய் எதிர்ப்பு சக்தியைக் (Immune System) குறைத்து, பல நோய்களுக்குக் காரணமாக அமைகிறது என மருத்துவ நிபுணர்கள் எச்சரிக்கின்றனர்.

Image Credit : Getty

பாக்டீரியாக்களின் கூடாரமாகும் தலையணை

பிரபல மருத்துவ நிபுணர் டாக்டர் தரங் கிருஷ்ணா அவர்களின் கூற்றுப்படி, தலையணைகளில் நாம் அறியாமலேயே சேரும் தூசு, இறந்த சரும செல்கள் மற்றும் வியர்வை போன்றவை பாக்டீரியா மற்றும் பூஞ்சைகளின் (Fungi) வளர்ச்சிக்குச் சாதகமான சூழலை உருவாக்குகின்றன. 

தினமும் 6 முதல் 8 மணி நேரம் நாம் தூங்கும்போது, இந்தத் தூசுகளையும் கிருமிகளையும் தொடர்ந்து சுவாசிக்கிறோம். இது உடலுக்குள் மெல்ல மெல்ல இன்ஃபெக்‌ஷனை ஏற்படுத்தி, ஒட்டுமொத்த நோய் எதிர்ப்பு மண்டலத்தையும் பலவீனப்படுத்துகிறது. இதன் விளைவாக, அடிக்கடி சளி, இருமல் மற்றும் ஒவ்வாமை (Allergy) போன்ற பிரச்சனைகள் ஏற்படுகின்றன.

Image Credit : Getty

முகப்பரு முதல் சுவாசப் பிரச்சனைகள் வரை...

சுத்தமில்லாத தலையணையைப் பயன்படுத்துவதால் பல்வேறு முக்கிய பாதிப்புகள் ஏற்படுகின்றன.

சருமப் பாதிப்புகள்: தலையணையில் உள்ள அழுக்குகளும் எண்ணெய்ப் பசையும் முகத்தில் படுவதால் கடுமையான முகப்பருக்கள் (Acne) மற்றும் சரும அலர்ஜிகள் தோன்றும்.

சுவாசக் கோளாறுகள்: ஆஸ்துமா, சைனஸ் போன்ற நீண்டகால சுவாசப் பிரச்சனைகள் உள்ளவர்களுக்குப் பழைய தலையணைகள் பாதிப்பை இருமடங்காக்கும்.

Image Credit : Getty

தலையணையை எப்போது மாற்ற வேண்டும்?

கிருமிகளின் பாதிப்பில் இருந்து தப்பிக்கவும், ஆரோக்கியத்தை மேம்படுத்தவும் மருத்துவர்கள் சில எளிய வழிமுறைகளைப் பரிந்துரைக்கின்றனர்.

6 மாத விதிமுறை: ஒவ்வொரு 6 மாதங்களுக்கு ஒருமுறை பழைய தலையணைகளை மாற்றிவிட்டுப் புதிய தலையணைகளைப் பயன்படுத்துவது மிகவும் நல்லது.

உறைகளை மாற்றுங்கள்: தலையணை உறைகளை (Pillow Covers) வாரத்திற்கு இரண்டு முறையாவது கட்டாயம் துவைத்து மாற்ற வேண்டும்.

இயற்கை கிருமிநாசினி: வாரம் ஒருமுறை தலையணையை நல்ல வெயிலில் காய வைக்க வேண்டும். சூரிய ஒளியில் உள்ள புற ஊதாக் கதிர்கள் தலையணையில் இருக்கும் பாக்டீரியாக்களை இயற்கையாகவே அழித்துவிடும். 

சுத்தமான படுக்கை அறை என்பது நல்ல தூக்கத்திற்கு மட்டுமல்ல, நல்ல ஆரோக்கியத்திற்கும் அடித்தளமாகும். எனவே, உங்களது பழைய தலையணைகளை உடனே மாற்றி, நோய் எதிர்ப்புச் சக்தியைக் காத்திடுங்கள்.