இந்திய ரயில்வேயில் எத்தனை லட்சம் காலியிடங்கள் உள்ளது ? RTI கேள்விக்கு கிடைத்த அதிர்ச்சி பதில்

உலகிலேயே 4-வது பெரிய ரயில்வே அமைப்பாக கருதப்படும் இந்திய ரயில்வேயில் பணியாளர் பற்றாக்குறை நிலவுவதாகவும், லட்சக்கணக்கான காலியிடங்கள் நிரப்பப்படாமல் உள்ளதாகவும் குற்றச்சாட்டு முன்வைக்கப்படுகிறது. 

இந்திய ரயில்வே என்பது நாட்டின் மிகப்பெரிய பொதுத்துறை போக்குவரத்து நிறுவனம் ஆகும். நாடு முழுவதும் லட்சக்கணக்கான பயணிகள் ரயிலில் பயணிக்கின்றனர். உலகிலேயே 4-வது பெரிய ரயில்வே அமைப்பாக கருதப்படும் இந்திய ரயில்வேயில் பணியாளர் பற்றாக்குறை நிலவுவதாகவும், லட்சக்கணக்கான காலியிடங்கள் நிரப்பப்படாமல் உள்ளதாகவும் குற்றச்சாட்டு முன்வைக்கப்படுகிறது. 

ஜூன் 2023 நிலவரப்படி ரயில்வேயில் சுமார் 2.74 லட்சம் பணியிடங்கள் காலியாக உள்ளன, அவற்றில் 1.7 லட்சத்திற்கும் அதிகமானவை பாதுகாப்பு பிரிவில் உள்ளன என்று RTI மூலம் கேட்கப்பட்ட கேள்விக்கு பதில் அளிக்கப்பட்டுள்ளது.

மத்தியப் பிரதேசத்தைச் சேர்ந்த ஆர்டிஐ ஆர்வலர் சந்திர சேகர் கவுர் என்பவர் தாக்கல் செய்த கேள்விக்கு இந்திய ரயில்வே பதிலளித்துள்ளது. அதில், குரூப் சி பிரிவில் லெவல் 1 உட்பட 2,74,580 பணியிடங்கள் காலியாக உள்ளதாக ரயில்வே தெரிவித்துள்ளது.

இதில் பாதுகாப்புப் பிரிவில் மொத்தம் 1,77,924 காலியிடங்கள் உள்ளன. 01.06.2023 நிலவரப்படி, இந்திய ரயில்வேயில் காலியாக உள்ள குரூப்-சி (நிலை-1 உட்பட) காலியாக உள்ள மொத்த அரசிதழ் அல்லாத பணியிடங்களின் எண்ணிக்கை: 2,74,580 என்று ரயில்வே அமைச்சகம் தெரிவித்துள்ளது.

2022 டிசம்பரில், ரயில்வேயில் 3.12 லட்சம் அரசிதழ் அல்லாத பணியிடங்கள் காலியாக உள்ளதாக ரயில்வே அமைச்சர் அஷ்வினி வைஷ்ணவ் நாடாளுமன்றத்தில் தெரிவித்திருந்தார் என்பது குறிப்பிடத்தக்கது.