Drooling: தூங்கும்போது ஜொள்ளு வடியுதா? அலட்சியம் வேண்டாம்.. காரணமும் தீர்வும் இதோ!
Drooling: தூங்கும்போது சில நேரங்களில் ஜொள்ளு வடிவது சாதாரண விஷயம்தான். ஆனால், இது தினமும் நடந்தாலோ அல்லது வேறு சில அறிகுறிகள் இருந்தாலோ அலட்சியப்படுத்த வேண்டாம். இதற்கான காரணத்தையும் தீர்வையும் பார்ப்போம்.
தூங்கும்போது ஜொள்ளு வடியுதா? அலட்சியம் வேண்டாம்
இரவில் நன்றாக தூங்கி காலையில் எழுந்திருக்கும்போது, தலையணையில் ஜொள்ளு வடிந்திருப்பதை கவனித்திருக்கிறீர்களா? நம்மில் பலரும் இதை சாதாரண விஷயம் என்று நினைத்து விட்டுவிடுவோம். தூங்கும்போது வாய் திறந்திருப்பது அல்லது மூக்கு அடைப்பு இதற்கு முக்கிய காரணமாக இருக்கலாம். ஆனால், தினமும் இப்படி நடந்தால் அதற்கான காரணத்தை தெரிந்துகொள்வது ரொம்ப முக்கியம். அலர்ஜி, பல் மற்றும் ஈறு பிரச்சனைகள், சில மருந்துகளின் பக்கவிளைவுகள், தூக்கத்தின்போது ஏற்படும் சுவாசப் பிரச்சனைகள் கூட இதற்கு காரணமாக இருக்கலாம்.
தூங்கும்போது ஏன் ஜொள்ளு வடிகிறது?
வாயில் எச்சில் சுரப்பது உடலின் ஒரு சாதாரண செயல்பாடு. உணவை மெல்லவும், விழுங்கவும், வாயின் ஆரோக்கியத்தை பாதுகாக்கவும் எச்சில் உதவுகிறது. நாம் முழித்திருக்கும்போது நமக்கே தெரியாமல் எச்சிலை விழுங்கிவிடுவோம். ஆனால், தூங்கும்போது விழுங்கும் செயல்பாடு குறைவதால், எச்சில் வாயில் தங்கி வெளியே வழிகிறது.
குறிப்பாக, ஒருக்களித்து படுப்பவர்கள் அல்லது குப்புற படுப்பவர்களுக்கு தலையணையில் ஜொள்ளு வடியும் வாய்ப்பு அதிகம். அதனால், சில நேரங்களில் நாம் தூங்கும் பொசிஷன் கூட இதற்கு காரணமாக இருக்கலாம். ஆனால், இது மட்டுமே காரணம் என்று சொல்ல முடியாது.
மூக்கு அடைப்பு மற்றும் அலர்ஜி
சளி, தூசு அலர்ஜி அல்லது சைனஸ் பிரச்சனையால் மூக்கு அடைக்கும்போது, மூக்கு வழியாக சுவாசிப்பது சிரமமாக இருக்கும். அந்த நேரத்தில், தூக்கத்திலும் வாய் வழியாகவே சுவாசிப்போம். இதனால் வாய் திறந்திருப்பதால் ஜொள்ளு வெளியே வடிய வாய்ப்பு அதிகம். மூக்கு அடைப்பு அடிக்கடி வந்தாலோ அல்லது நீண்ட நாட்களாக இருந்தாலோ மருத்துவரை பார்ப்பது நல்லது. பிரச்சனையின் காரணத்தை தெரிந்து சரியான சிகிச்சை எடுத்தால், தூக்கமும் நன்றாக வரும்.
பல் மற்றும் ஈறுகளின் ஆரோக்கியம்
வாய்க்குள் இருக்கும் சில பிரச்சனைகள் கூட ஜொள்ளு அதிகமாக வடிய காரணமாகலாம். பல் மற்றும் ஈறுகளில் ஏற்படும் வீக்கம், வாய் தொற்று அல்லது விழுங்குவதில் உள்ள சிரமங்கள் இதில் அடங்கும். சில மருந்துகளின் பக்கவிளைவுகளாலும் எச்சில் சுரப்பது அதிகரிக்கலாம். புதிதாக ஏதாவது மாத்திரை சாப்பிட ஆரம்பித்த பிறகு இந்த பிரச்சனை வந்தால், மருத்துவரிடம் சொல்லுங்கள். மருத்துவரின் ஆலோசனை இல்லாமல் மாத்திரையை நிறுத்த வேண்டாம்.
குறட்டை விட்டால் கவனம் தேவை
ஜொள்ளு வடிவதோடு சேர்த்து சத்தமாக குறட்டை விடுவது, தூக்கத்தின் நடுவே மூச்சுத் திணறல் ஏற்படுவது, அடிக்கடி முழிப்பு வருவது அல்லது காலையில் எழுந்ததும் சோர்வாக உணர்வது போன்ற அறிகுறிகள் இருந்தால் அதை அலட்சியப்படுத்தக் கூடாது. இவை 'ஸ்லீப் அப்னியா'எனப்படும் தூக்கம் தொடர்பான சுவாசப் பிரச்சனையின் அறிகுறிகளாக இருக்கலாம். இந்த நிலையில், தூங்கும்போது சுவாசம் அடிக்கடி நிற்கலாம் அல்லது குறையலாம். இப்படிப்பட்ட அறிகுறிகள் இருந்தால் உடனே மருத்துவ பரிசோதனை செய்துகொள்வது அவசியம்.
இரவில் ஜொள்ளு வடிவதை குறைக்க என்ன செய்ய வேண்டும்?
மூக்கின் ஆரோக்கியம்: அலர்ஜி அல்லது மூக்கு அடைப்பு பிரச்சனை இருந்தால் சரியான மருத்துவ ஆலோசனை பெறுங்கள்.
தூங்கும் பொசிஷன்: ஒருக்களித்து படுக்கும்போது ஜொள்ளு அதிகமாக வடிந்தால், உங்களுக்கு வசதியான தூங்கும் பொசிஷன் பற்றி மருத்துவரிடம் கேட்கலாம்.
வாய் சுத்தம்: தினமும் இரண்டு முறை பல் துலக்குவது மற்றும் பல், ஈறு பிரச்சனைகளுக்கு சரியான சிகிச்சை பெறுவது முக்கியம்.
தூக்கத்தின் தரம்: தினமும் சரியான நேரத்திற்கு தூங்கும் பழக்கத்தை ஏற்படுத்திக் கொள்ளுங்கள்.
அறிகுறிகளை கவனியுங்கள்: ஜொள்ளு வடியும் பிரச்சனை தொடர்ந்து இருந்தாலோ அல்லது விழுங்குவதில் சிரமம், இருமல், மூச்சுத் திணறல் போன்ற பிரச்சனைகள் இருந்தாலோ மருத்துவரை அணுகுங்கள்.
