Ladies Finger with Rice: வெண்டைக்காயை கொத்தாக கட்டி சாதத்தோடு வேகவைப்பது ஏன்? இந்த வித்தியாசமான முறையின் ரகசியம் இதுதான்!

Ladies Finger with Rice: வெண்டைக்காயை கொத்தாகக் கட்டி சாதத்துடன் வேகவைப்பது ஏன் தெரியுமா? இந்த முறையின் சுவாரஸ்யம், நன்மைகள் மற்றும் சத்துக்கள் பற்றி இந்த தொகுப்பில் பார்க்கலாம்.

Image Credit : Gemini Ai

வெண்டைக்காயை கொத்தாகக் கட்டி சாதத்துடன் வேகவைப்பது ஏன் தெரியுமா?

பார்க்கவே வித்தியாசமாக இருக்கு ஆனா வெண்டைக்காயை இப்படியும் சமைக்கலாமா? என்று நீங்கள் ஆச்சரியப்படுவீர்கள். வழக்கமாக வெண்டைக்காயை நறுக்கி எண்ணெயில் வதக்கித்தான் சாப்பிடுவோம். ஆனால் வங்காளத்தில், சாதம் வேகும் அதே பாத்திரத்தில் வெண்டைக்காயை ஒரு கொத்தாகக் கட்டி வைத்து வேகவைக்கும் பாரம்பரிய முறை இருக்கிறது.

இதற்குப் பின்னால் வெறும் வித்தியாசமான சமையல் யுக்தி மட்டுமல்ல. எரிபொருள் மிச்சம், குறைந்த எண்ணெய், எளிய சமையல், காய்கறியை வீணாக்காமல் முழுமையாகச் சாப்பிடுவது போன்ற பல காரணங்களும் இருக்கின்றன.

Image Credit : Gemini Ai

ஒற்றை பானை முறை என்றால் என்ன?

ஒரே பாத்திரத்தில் சாதமும் காய்கறியும் ஒன்றாக வேகவைப்பதுதான் ஒற்றை பானை முறை (One-pot cooking).

வங்காள சமையலில் இதற்கு Bhate அல்லது Sheddho என்ற சமையல் பாணி உள்ளது. சாதம் சமைக்கப்படும் பாத்திரத்தில் காய்கறியை முழுதாக அல்லது பெரிய துண்டுகளாக வைத்து வேகவைத்து, பின்னர் அதை சாதத்துடன் சேர்த்து சாப்பிடுவார்கள்.

இதனால்,

• தனியாக காய்கறி வேகவைக்க வேண்டியதில்லை
• தனியாக பாத்திரம் பயன்படுத்த வேண்டியதில்லை
• எண்ணெய் மிகவும் குறைவாகவே தேவைப்படலாம்
• அடுப்பு/எரிபொருள் மிச்சமாகும்
• காய்கறி வேகும் நீர் வீணாகாமல் உணவின் ஒரு பகுதியாகிறது.

Image Credit : Gemini Ai

எப்படி இந்த முறையில் சமைக்கிறார்கள்?

• பச்சை வெண்டைக்காய்களை நன்றாகக் கழுவ வேண்டும்.
• முக்கியமாக வெண்டைக்காயை நன்றாகத் துடைத்து ஈரமில்லாமல் வைத்துக்கொள்ள வேண்டும்.
• வெண்டைக்காய் காம்புப் பகுதியை முழுவதுமாக நீக்கிவிடாமல், சற்றுக் குறைத்து ஒன்றாக சேர்த்து ஒரு கொத்தாக கட்ட வேண்டும்.
• வழக்கம்போல் அரிசியை தண்ணீருடன் பாத்திரத்தில் வைத்து வேக வைக்க வேண்டும்.
• சாதம் வேகும் நிலையில், வெண்டைக்காய் கொத்தை சாதத்தின் மேல் வைக்கலாம்.
• மூடி வைத்து சாதத்துடன் வெண்டைக்காயும் நன்றாக வேகட்டும்.
• வெந்ததும் வெண்டைக்காயை தனியாக எடுத்து, உப்பு மற்றும் விருப்பத்திற்கேற்ப சிறிதளவு கடுகு எண்ணெய் சேர்த்து பிசைந்து சாப்பிடலாம்.
• வங்காள பாரம்பரியத்தில் வேகவைத்த காய்கறிகளை உப்பு, கடுகு எண்ணெய் போன்றவற்றுடன் பிசைந்து சாதத்துடன் சாப்பிடும் நடைமுறை உள்ளது.

Image Credit : Gemini Ai

சத்துக்கள் வீணாகாமல் தடுக்க

பாத்திரத்தில் தனியாக வெண்டைக்காயை வேக வைத்து அந்தத் தண்ணீரை வடிகட்டினால், அதிலுள்ள சத்துக்கள் அனைத்தும் வீணாகிவிடும். ஆனால் சாதப் பானையின் நீராவியிலும் கொதிநிலையிலும் காய் வேகுவதால், அதன் சத்துக்கள் முழுமையாகக் காய்க்குள்ளேயே தக்கவைக்கப்படுகின்றன.

காம்புடன் முழுதாகச் சாதத்தில் வேக வைக்கும் போது அதன் உள்ளே இருக்கும் வழுவழுப்புத் தன்மை வெளியே வராது.

வெண்டைக்காயை நறுக்கி சாதத்தில் போட்டால், அதில் உள்ள மியூசிலேஜ் (Mucilage) என்ற வழுவழுப்புத் தன்மை சாதம் முழுவதையும் கொழகொழப்பாக மாற்றிவிடும். இதனால் சாதம் சாப்பிட முடியாதபடி குழைந்துவிடும்.

வெண்டைக்காயின் காம்புப் பகுதியை நீக்காமல், முழுசாகக் கொத்தாகக் கட்டிப் போடுவதால், அதன் கொழகொழப்பு சாதத்திற்குள் பரவாமல், காய் தனியாக நன்றாக வெந்துவிடும்.

வெண்டைக்காயை நூலால் கட்டுவது ஏன்?

காய்களை தனித்தனியாகப் போட்டால் சாதத்தை வடிக்கும் போதோ அல்லது எடுக்கும் போதோ காய் உடைந்து சாதத்தோடு கலந்துவிடும். நூலால் கொத்தாகக் கட்டிப் போடும்போது, சாதம் வெந்ததும் அந்த நூலைப் பிடித்து அப்படியே காய்களைச் சேதமில்லாமல் தனியாக எடுத்துவிடலாம்.

அதன் பிறகு, வெந்த வெண்டைக்காயில் லேசாக உப்பும், மிளகாய்த்தூளும் அல்லது தயிரும் சேர்த்துப் பிசைந்து வெண்டைக்காய் மசியல் அல்லது துவையல் போலச் செய்து சாதத்திற்குத் தொட்டுக் கொள்ளப் பயன்படுத்துவார்கள்.

வெண்டைக்காய் எளிதில் குழைந்துவிடக் கூடாது என்பதற்காகவும், அதன் சத்துக்கள் வீணாகாமல் இருக்கவும் இந்த முறை பயன்படுத்தப்படுகிறது.

சுருக்கமாகச் சொன்னால், சாதமும் வெந்து, சத்துக்களும் வீணாகாமல், அதே சமயம் சோறு கொழகொழப்பாக மாறாமல் காய்கறியையும் வேகவைக்க இந்த அருமையான முறையை பயன்படுத்துகின்றனர்.