Poori : ஹோட்டல் மாதிரி புசு புசுனு பூரி செய்யனுமா? இந்த டிப்ஸ் ஃபாலோ பண்ணுங்க!
How to make crispy Poori : பூரி எல்லாருக்கும் பிடிக்கும். ஆனா ஹோட்டல்ல செய்யுற மாதிரி புஸ்ஸுனு, மொறுமொறுனு வீட்ல வர்றது இல்லையா? கவலைப்படாதீங்க, சில சிம்பிள் டிப்ஸ் ஃபாலோ பண்ணா போதும், நீங்களும் அசத்தலாம்.
How to make crispy poori
பூரி என்றாலே குழந்தைகள் முதல் பெரியவர்கள் வரை அனைவருக்கும் பிடித்தமான உணவு. வார இறுதி நாட்களில் அல்லது வீட்டில் விசேஷமான சமையல் செய்யும்போது பலரின் முதல் தேர்வாக இருப்பது பூரிதான். ஆனால், வீட்டில் செய்யும் பூரி ஹோட்டலில் கிடைப்பது போல நன்றாக உப்பாமல் போவது அல்லது சீக்கிரமே சாஃப்டாகிவிடுவது போன்ற பிரச்சினைகள் சிலருக்கு இருக்கும். உண்மையில், பூரியை சரியான பதத்தில் தயாரித்து, எண்ணெயின் சூட்டையும் கவனித்தால் வீட்டிலேயே ஹோட்டல் ஸ்டைலில் பூரி செய்யலாம். அதற்கு உதவும் சில எளிய சமையல் குறிப்புகளை இங்கே பார்க்கலாம்.
Oil-Free Poori : பூரி சுட தண்ணி போதும்! எண்ணெய் வேண்டாம்! சத்தான பூரி ரெசிபி!
மாவை பிசையும்போதே இந்த விஷயத்தை செய்யுங்கள்
பூரி மாவை தயாரிக்கும்போது கோதுமை மாவில் தண்ணீர் சேர்ப்பதற்கு முன்பாக சிறிதளவு எண்ணெய் அல்லது நெய் சேர்த்து நன்றாக கலக்கவும். அதன் பிறகு தேவையான அளவு தண்ணீர் ஊற்றி மாவை பிசைய வேண்டும். மேலும், சுவையை அதிகரிக்க சிறிதளவு உப்பு, ஓமம் மற்றும் மிளகாய்த்தூள் சேர்க்கலாம். மாவு மிகவும் மென்மையாக இல்லாமல், சற்று கெட்டியான பதத்தில் இருக்க வேண்டும். சப்பாத்தி மாவு போல சாஃப்டாக பிசைந்துவிட்டால் பூரி நன்றாக உப்பாமல் போக வாய்ப்புள்ளது. மாவை பிசைந்தவுடன் உடனடியாக பூரி செய்யாமல், சுமார் 15 முதல் 20 நிமிடங்கள் மூடி வைத்து ஓய்வெடுக்க விடுவது நல்லது.
மொறுமொறுப்பான பூரிக்கு ரவை உதவும்
பூரி வெளிப்புறத்தில் லேசாக கிரிஸ்பியாக இருக்க வேண்டும் என்றால் மாவில் சிறிதளவு ரவை சேர்க்கலாம். கோதுமை மாவுடன் சுமார் 3 முதல் 4 ஸ்பூன் ரவை சேர்த்தால் பூரிக்கு நல்ல பதமும் மொறுமொறுப்பான தன்மையும் கிடைக்கும். ஆனால் ரவையை அதிகமாக சேர்ப்பதை தவிர்க்க வேண்டும். அளவுக்கு அதிகமாக ரவை சேர்த்தால் பூரி மிகவும் கடினமாக மாறி, சாப்பிடும்போது சிரமமாக இருக்கலாம். மாவுக்கு கூடுதல் வாசனையும் சுவையும் வேண்டுமென்றால் சிறிதளவு கசூரி மேத்தியை கைகளால் நன்றாக நசுக்கி சேர்க்கலாம். இதனால் பூரிக்கு நல்ல மணமும் வித்தியாசமான சுவையும் கிடைக்கும்.
பூரி மாவின் பதம்தான் முக்கியம்
பூரி வெற்றிகரமாக வருவதில் மாவின் பதம் முக்கிய பங்கு வகிக்கிறது. மாவு மிகவும் தளர்வாக இருந்தால் பூரியை தேய்க்கும்போது சிரமமாக இருக்கும். அதேபோல், அதிகமாக கெட்டியாக இருந்தாலும் பூரி சரியாக வராது. எனவே, சற்று கெட்டியான பதத்தில் மாவை பிசைவது சிறந்தது. சிறிய உருண்டைகளாகப் பிரித்து, தேவையான அளவு மாவுத் தூள் அல்லது எண்ணெய் பயன்படுத்தி சமமாக தேய்க்கலாம். பூரியை மிகவும் மெல்லியதாக தேய்க்காமல், நடுத்தர தடிமனில் வைத்தால் எண்ணெயில் போடும்போது நன்றாக உப்பி வருவதற்கான வாய்ப்பு அதிகம்.
எண்ணெய் நன்றாக காய்ந்த பிறகே பொரிக்கவும்
பூரி நன்றாக உப்புவதற்கு எண்ணெயின் வெப்பநிலை மிகவும் முக்கியம். வாணலியில் போதுமான அளவு எண்ணெய் ஊற்றி நன்றாக சூடாக்கிய பிறகுதான் தேய்த்த பூரியை போட வேண்டும். எண்ணெய் போதுமான அளவு சூடாக இல்லாத நிலையில் பூரியைப் போட்டால் அது எண்ணெயை அதிகமாக உறிஞ்சி, உப்பாமல் போகலாம். சரியான சூட்டில் பூரியை எண்ணெயில் விட்டவுடன், லேசாக அழுத்தி மேலே வரும் எண்ணெயை அதன் மீது ஊற்றினால் பூரி நன்றாக புஸ்ஸென்று உப்பும். பூரி முழுமையாக எண்ணெயில் மூழ்கும் அளவுக்கு எண்ணெய் இருப்பதும் அவசியம். சரியான மாவு பதம், அளவான ரவை, கசூரி மேத்தியின் வாசனை மற்றும் சரியான எண்ணெய் சூடு ஆகிய நான்கையும் கவனித்தால் வீட்டிலேயே ஹோட்டல் ஸ்டைலில் மொறுமொறுப்பான பூரியை சுலபமாக செய்யலாம்.
