- Home
- உடல்நலம்
- உணவு
- Green Chilli Chicken Fry : பச்சை மிளகாய் கோழி வறுவல்.. மணமும் சுவையும் அள்ளும் அசத்தலான ரெசிபி!
Green Chilli Chicken Fry : பச்சை மிளகாய் கோழி வறுவல்.. மணமும் சுவையும் அள்ளும் அசத்தலான ரெசிபி!
Green Chilli Chicken Fry : புதினா, கொத்தமல்லி, பச்சை மிளகாய் சேர்த்து காரசாரமான பச்சை மிளகாய் கோழி வறுவல் செய்வது எப்படி? தேவையான பொருட்கள், எளிய செய்முறை, சுவையை அதிகரிக்கும் குறிப்புகள் என முழு ரெசிபியை இங்கே தெரிந்துகொள்ளுங்கள்.
பச்சை மிளகாய் கோழி வறுவல்
சிக்கன் என்றாலே சில்லி சிக்கன், பெப்பர் சிக்கன், சிக்கன் 65 என ஒரே மாதிரியான உணவுகளைச் செய்து சாப்பிட்டுப் போரடித்துவிட்டதா? அப்படியானால், இந்த முறை வீட்டில் பச்சை மிளகாய் கோழி வறுவல் செய்து பாருங்கள்.
பச்சை மிளகாயின் காரம், புதினா மற்றும் கொத்தமல்லியின் மணம், இஞ்சி பூண்டின் சுவை என ஒவ்வொரு பொருளும் சேர்ந்து சிக்கனுக்கு ஒரு தனித்துவமான ருசியைக் கொடுக்கும்.
வழக்கமான மிளகாய்த்தூள் சேர்க்காமல், பச்சை மிளகாயை முதன்மையாக வைத்து தயாரிக்கப்படும் இந்த உணவு, சாதம், சப்பாத்தி, பரோட்டா எனப் பல உணவுகளுக்கும் அருமையான சைடிஷாக இருக்கும்.
வீட்டிலேயே எளிய பொருட்களை வைத்து ஹோட்டல் பாணியில் இந்த பச்சை மிளகாய் கோழி வறுவலை எப்படிச் செய்வது என்று பார்க்கலாம்.
பச்சை மிளகாய் கோழி வறுவல்: தேவையான பொருட்கள்
சிக்கன் ஊறவைக்க
- சிக்கன் - 500 கிராம்
- புதினா தழை - 1\2 கப்
- கொத்தமல்லி தழை - 1\2 கப்
- பெரிய வெங்காயம் - 1
- பூண்டு - 6 பல்
- இஞ்சி - 1 சிறிய துண்டு
- பச்சை மிளகாய் - 4 முதல் 6 வரை
- தயிர் - 3 மேசைக்கரண்டி
- மஞ்சள்தூள் - 1\4 தேக்கரண்டி
- உப்பு - தேவையான அளவு
தாளிக்கவும் சமைக்கவும்
- நல்லெண்ணெய் - 3 மேசைக்கரண்டி
- பட்டை - 1 சிறிய துண்டு
- கிராம்பு - 3
- சோம்பு - 1\2 தேக்கரண்டி
- பெரிய வெங்காயம் - 1
- பச்சை மிளகாய் - 2
- கரம் மசாலாத்தூள் - 1\2 தேக்கரண்டி
- எலுமிச்சை பழம் - 1\2
- தண்ணீர்- தேவையான அளவு
பச்சை மிளகாய் கோழி வறுவல் செய்முறை - படி 1
பச்சை மசாலா அரைக்கவும்
மிக்ஸி ஜாரில் புதினா தழை, கொத்தமல்லி தழை, ஒரு பெரிய வெங்காயம், பூண்டு, இஞ்சி, பச்சை மிளகாய் மற்றும் தயிர் சேர்த்து நைசாக அரைத்துக்கொள்ளவும். தேவையெனில் சிறிதளவு தண்ணீர் சேர்த்துக்கொள்ளலாம்.
படி 2
சிக்கனை ஊறவைக்கவும்
சுத்தம் செய்து வைத்துள்ள சிக்கனில் அரைத்த பச்சை மசாலாவைச் சேர்க்கவும். அதனுடன் உப்பு, மஞ்சள்தூள் சேர்த்து நன்றாகக் கலக்கவும். குறைந்தது 20 நிமிடங்கள் ஊறவைக்கவும்.
படி 3
தாளித்து வெங்காயம் வதக்கவும்
ஒரு கடாயில் நல்லெண்ணெய் ஊற்றி சூடானதும் பட்டை, கிராம்பு, சோம்பு சேர்த்துத் தாளிக்கவும். பின்னர் நறுக்கிய வெங்காயம், கீறிய பச்சை மிளகாய் சேர்த்து வெங்காயம் பொன்னிறமாகும் வரை வதக்கவும்.
படி 4
ஊறவைத்த சிக்கனைச் சேர்க்கவும்
இப்போது ஊறவைத்த சிக்கனை மசாலாவுடன் சேர்த்து நன்றாகக் கிளறவும். கரம் மசாலாத்தூள் சேர்த்து மிதமான தீயில் சில நிமிடங்கள் வதக்கவும். சிக்கனில் மசாலா நன்றாகப் படியும்படி கிளறுவது முக்கியம்.
படி 5
சிக்கனை வேகவைக்கவும்
சிக்கன் வேகத் தேவையான அளவு தண்ணீர் சேர்த்து மூடி வைத்து மிதமான தீயில் சுமார் 20 நிமிடங்கள் வேகவைக்கவும். இடையிடையே கிளறிவிடவும். சிக்கன் முழுமையாக வெந்ததும் மூடியைத் திறந்து, தேவையெனில் கூடுதல் தண்ணீரை வற்றவிட்டு மசாலா சிக்கனில் நன்றாகப் பிடிக்கும்படி வதக்கவும்.
படி 6
எலுமிச்சைச் சாறு சேர்த்து இறக்கவும்
இறுதியாக அரை எலுமிச்சை பழத்தின் சாற்றைப் பிழிந்து சேர்த்து நன்றாகக் கிளறவும். ஒரு நிமிடம் கழித்து அடுப்பை அணைக்கவும். சுவையான பச்சை மிளகாய் கோழி வறுவல் தயார்.
எதனுடன் சேர்த்துச் சாப்பிடலாம்?
இந்தப் பச்சை மிளகாய் கோழி வறுவலைச் சூடான சாதம், சப்பாத்தி, பரோட்டா, தோசை அல்லது இடியாப்பத்துடன் சேர்த்துச் சாப்பிடலாம். குறிப்பாக, மசாலா சிக்கனில் நன்றாகப் பிடித்திருக்கும் பதத்தில் தயாரித்தால் ஒவ்வொரு துண்டும் சுவையாக இருக்கும்
பச்சை மிளகாய் கோழி வறுவல் சுவையாக வர சில குறிப்புகள்
காரத்தை கவனிக்கவும்: பச்சை மிளகாயின் காரம் ஒவ்வொரு வகையிலும் மாறுபடும். முதலில் 3- 4 மிளகாய்களைச் சேர்த்து, தேவைக்கேற்ப அதிகரிக்கலாம்.
மசாலா மணத்திற்கு: புதினா, கொத்தமல்லி தழைகளைப் புதியதாகப் பயன்படுத்தினால் நல்ல மணம் கிடைக்கும்.
சிக்கன் உலராமல் இருக்க: அதிக தண்ணீர் சேர்க்க வேண்டாம். சிக்கன் வேகத் தேவையான அளவு மட்டும் சேர்த்து, கடைசியில் தண்ணீரை வற்றவிடவும்.
வறுவல் பதம் வேண்டுமா? சிக்கன் முழுமையாக வெந்த பிறகு மூடியைத் திறந்து மிதமான தீயில் கிளறிக்கொண்டே வதக்கினால் மசாலா நன்றாக ஒட்டிக்கொள்ளும்.
வீட்டில் வழக்கமாகச் செய்யும் சிக்கன் ரெசிபிகளிலிருந்து கொஞ்சம் வித்தியாசமாக ஏதாவது முயற்சி செய்ய நினைத்தால், இந்தப் பச்சை மிளகாய் கோழி வறுவலை ஒருமுறை செய்து பாருங்கள். புதினா, கொத்தமல்லி, பச்சை மிளகாய் ஆகியவற்றின் மணமும் காரமும் சேர்ந்து உங்கள் மதிய அல்லது இரவு உணவுக்கு நல்ல சுவையைக் கொடுக்கும்.
