Coconut Milk Pancake: பஞ்சுபோன்ற தேங்காய்பால் பேன் கேக் செய்வது இவ்வளவு ஈஸியா? சுவையான ரெசிபி இதோ!

Coconut Milk Pancake: பஞ்சுபோன்ற தேங்காய்ப்பால் பான் கேக் செய்வது எப்படி? தேங்காய், வெல்லம், முந்திரி, பாதாம் சேர்த்து சுவையான இனிப்பை வீட்டிலேயே எளிதாகச் செய்ய முழு செய்முறையைப் பாருங்கள்.

Image Credit : Gemini Ai

பஞ்சுபோன்ற தேங்காய்ப்பால் பான் கேக்

தேங்காயின் இயற்கையான மணம், தேங்காய்ப்பாலின் மிருதுவான சுவை, வெல்லத்தின் இனிப்பு, ஏலக்காயின் நறுமணம், முந்திரி மற்றும் பாதாமின் மொறுமொறுப்பான சுவை என அனைத்தும் ஒன்றாக இணைந்தால் எப்படி இருக்கும்? சுவையிலும் மணத்திலும் மனதை மயக்கும் ஓர் அற்புதமான இனிப்புப் பலகாரமாக இருக்கும்.

வீட்டிலேயே எளிதாகத் தயாரிக்கக்கூடிய இந்த பஞ்சுபோன்ற தேங்காய்ப்பால் பான் கேக், குழந்தைகள் முதல் பெரியவர்கள் வரை அனைவரும் விரும்பிச் சாப்பிடும் வகையில் அமைந்துள்ளது.

கடையில் வாங்கும் இனிப்புகளை மறக்கச் செய்யும் அளவுக்கு வீட்டிலேயே மணமும் சுவையும் நிறைந்த இந்தப் பான் கேக்கைத் தயாரிக்கலாம். மாலை நேரச் சிற்றுண்டியாகவும், குழந்தைகளுக்கான சிறப்பு உணவாகவும், விருந்தினர்களுக்குப் பரிமாறும் இனிப்பாகவும் இதைச் செய்து அசத்துங்கள்.

தேவையான பொருள்கள்

• தேங்காய் - 1 பெரியது
• கோதுமை மாவு - 1 கப்
• முட்டை - 1
• உப்பு - ஒரு சிட்டிகை
• மஞ்சள்தூள் - 1\4 தேக்கரண்டி அல்லது சிறிதளவு
• எண்ணெய் - 1 தேக்கரண்டி
• நெய் - தேவையான அளவு
• துருவிய தேங்காய் - 1 கப்
• வெல்லம் - 1\2 முதல் 3\4 கப் வரை
• முந்திரி - 2 மேசைக்கரண்டி
• துருவிய பாதாம் - 2 மேசைக்கரண்டி
• ஏலக்காய்த்தூள் - 1\2 தேக்கரண்டி

Image Credit : Gemini Ai

செய்முறை - படி 1

தேங்காய்ப்பால் தயாரித்தல்

தேங்காயை உடைத்து, உள்ளே இருக்கும் தேங்காயைத் துருவி எடுத்துக்கொள்ளவும். துருவிய தேங்காயுடன் சிறிதளவு வெதுவெதுப்பான நீர் சேர்த்து மிக்சியில் நன்றாக அரைக்கவும். அரைத்த கலவையை வடிகட்டி அல்லது சுத்தமான மெல்லிய துணியில் பிழிந்து தேங்காய்ப்பாலை எடுத்துக்கொள்ளவும்.

Image Credit : Gemini Ai

படி 2

பான் கேக் மாவு தயாரித்தல்

மிக்சி ஜாரில் ஒரு முட்டையை உடைத்து ஊற்றவும். அதனுடன் கோதுமை மாவு, உப்பு, மஞ்சள்தூள் மற்றும் ஒரு தேக்கரண்டி எண்ணெய் சேர்க்கவும். தயாரித்து வைத்துள்ள தேங்காய்ப்பாலைச் சிறிது சிறிதாக ஊற்றவும். கட்டிகள் இல்லாமல் மிருதுவாகும் வரை நன்றாக அரைக்கவும்.

அரைத்த மாவை வடிகட்டி ஒரு பாத்திரத்தில் எடுத்துக்கொள்ளவும். மாவு மிகவும் கெட்டியாக இருந்தால் சிறிதளவு தேங்காய்ப்பால் சேர்த்து, தோசை மாவைவிடச் சற்று தளர்வான பதத்திற்குக் கொண்டு வரவும். மாவை 10 -15 நிமிடங்கள் ஓய்வெடுக்க விடவும்.

Image Credit : Gemini Ai

படி 3

வெல்லம் கலந்த தேங்காய்ப் பூரணம் தயாரித்தல்

ஒரு கடாயில் ஒரு மேசைக்கரண்டி நெய் சேர்த்து மிதமான தீயில் சூடாக்கவும். ஏலக்காய்த்தூள், ஒரு சிட்டிகை உப்பு, முந்திரி மற்றும் துருவிய பாதாமைச் சேர்த்து லேசாக வறுக்கவும்.

அடுத்தது துருவிய தேங்காயைச் சேர்த்து ஓரிரு நிமிடங்கள் வதக்கவும். வெல்லத்தைத் துருவி அல்லது பொடித்து அதனுடன் சேர்க்கவும். வெல்லம் உருகித் தேங்காயுடன் நன்றாகக் கலக்கும்வரை கிளறவும். பூரணம் சற்று கெட்டியாகி, ஒன்றாகச் சேர்ந்து வரும் பதத்தில் அடுப்பை அணைக்கவும்.

Image Credit : Gemini Ai

படி 4

பான் கேக்கைச் சுடுதல்

கடாயை மிதமான தீயில் சூடாக்கி சிறிதளவு நெய்யைத் தடவவும். தயாரித்து வைத்துள்ள மாவை எடுத்து கடாயின் நடுவில் ஊற்றவும். கடாயை மெதுவாகச் சுழற்றி மாவை மெல்லிய வட்டமாகப் பரப்பவும்.

பான் கேக்கின் மேற்பரப்பு ஈரப்பதம் குறைந்து, ஓரங்கள் கடாயிலிருந்து சற்று விலகத் தொடங்கும் வரை வேகவிடவும்.மெதுவாகத் திருப்பி மறுபுறமும் வேகவைக்கவும். இருபுறமும் லேசான பொன்னிறம் வந்ததும் எடுத்துவைக்கவும்.

Image Credit : Gemini Ai

படி 5

பூரணம் வைத்து மடித்துச் சுருட்டுதல்

சுட்ட பான் கேக்கை ஒரு தட்டில் வைக்கவும். அதன் நடுப்பகுதியில் நீளவாக்கில் தயாரித்து வைத்துள்ள தேங்காய்ப் பூரணத்தை வைக்கவும். பூரணம் வெளியே வராதபடி இருபுற ஓரங்களையும் லேசாக உள்நோக்கி மடிக்கவும்.

பின்னர் ஒரு முனையிலிருந்து மறுமுனை வரை மெதுவாக உருட்டவும். இதே முறையில் மீதமுள்ள பான் கேக்குகளையும் தயாரிக்கவும். இதோ, மென்மையான தேங்காய்ப்பால் பான் கேக் தயார்.

சுவையும் மென்மையும் அதிகரிக்க சில ரகசியக் குறிப்புகள்

மென்மைக்கு: மாவை 10 -15 நிமிடங்கள் ஓய்வெடுக்க விடுங்கள்.

நல்ல மணத்திற்கு: பூரணத்தில் ஏலக்காய்த்தூளுடன் சிறிதளவு நெய் சேர்க்கவும்.

சரியான இனிப்பிற்கு: வெல்லத்தின் அளவை உங்கள் சுவைக்கு ஏற்ப மாற்றிக்கொள்ளலாம். பூரணத்தை அளவோடு வைத்து உருட்டவும். பான் கேக்கை அதிக நேரம் வேகவைக்க வேண்டாம்.

தேங்காய்ப்பாலின் மணமும், வெல்லத்தின் இனிப்பும், முந்திரி, பாதாமின் சுவையும் இணைந்து உருவாகும் இந்தப் பஞ்சுபோன்ற தேங்காய்ப்பால் பான் கேக், வீட்டிலேயே எளிமையாகச் செய்து மகிழக்கூடிய ஓர் அருமையான இனிப்பு வகையாகும்.

சரியான பதத்தில் மாவைத் தயாரித்து, மிதமான தீயில் மென்மையாகச் சுட்டு, சுவையான பூரணத்தை நிரப்பினால் அனைவரும் விரும்பும் பான் கேக் கிடைக்கும். ஒருமுறை செய்து பாருங்கள். தேங்காயின் மணமும் இனிப்பின் சுவையும் உங்கள் வீட்டையே நிறைக்கட்டும்.