பெற்றோர்கள் முன்னிலையில் நடந்த வெங்கடேஷ் ஐயர் – ஸ்ருதி ரகுநாதன் திருமணம்!

ஐபிஎல் கிரிக்கெட் மூலமாக இந்திய அணியின் இடம் பெற்றவர் வெங்கடேஷ் ஐயர். கடந்த 2021 ஆம் ஆண்டு நடந்த ஐபிஎல் தொடரில் கொல்கத்தா நைட் ரைடர்ஸ் அணியில் இடம் பெற்று சிறப்பாக விளையாடினார். இதில், 10 போட்டிகளில் விளையாடி 370 ரன்கள் குவித்தார். அதிகபட்சமாக 67 ரன்கள் எடுத்தார். இதில், 37 பவுண்டரி, 14 சிக்ஸர்கள் அடங்கும். இந்த ஐபிஎல் தொடரில் சிறப்பாக விளையாடியதன் மூலமாக இந்திய அணியில் இடம் பெற்றார்.

நியூசிலாந்திற்கு எதிரான டி20 போட்டியின் மூலமாக டி20 தொடரில் இடம் பெற்றார். இதுவரையில் 9 டி20 போட்டிகளில் 133 ரன்கள் எடுத்துள்ளார். அதிகபட்சமாக 35 ரன்கள் எடுத்துள்ளார். பேட்டிங் மட்டுமின்றி பவுலிங்கிலும் சிறப்பாக விளையாடிய வெங்கடேஷ் ஐயர் 23 ரன்கள் கொடுத்து 2 விக்கெட்டுகள் கைப்பற்றியுள்ளார்.

இதே போன்று 2 ஒரு நாள் போட்டிகளில் விளையாடி 24 ரன்கள் எடுத்துள்ளார். ஆனால், பெரிதாக ஒன்றும் சோபிக்காத நிலையில், அவருக்கு வாய்ப்பு வழங்கப்படவில்லை. அதன் பிறகு நடந்த 2022 ஐபிஎல் தொடரில் 12 போட்டிகளில் விளையாடி 182 ரன்கள் மட்டுமே எடுத்துள்ளார். நடந்து முடிந்த 2023 ஆம் ஆண்டு ஐபிஎல் தொடரில் 14 போட்டிகளில் விளையாடி 2 அரைசதம், ஒரு சதம் உள்பட 404 ரன்கள் எடுத்துள்ளார். இதில் அதிகபட்சமாக 104 ரன்கள். மேலும், 86 பவுண்டரியும், 42 சிக்ஸர்களும் விளாசியுள்ளார்.

கடந்த ஆண்டு நவம்பர் மாதம் வெங்கடேஷ் ஐயருக்கும், ஸ்ருதி ரங்கநாதனுக்கும் திருமண நிச்சயதார்த்தம் நடந்துள்ளது. இது தொடர்பான புகைப்படங்களை தனது இன்ஸ்டாகிராம் பக்கத்தில் பகிர்ந்த வெங்கடேஷ் ஐயர், என் வாழ்க்கையில் அடுத்த அத்தியாயம் என்று குறிப்பிட்டுள்ளார். இந்த நிலையில் தான், வெங்கடேஷ் ஐயர் மற்றும் ஸ்ருதி ரகுநாதன் திருமணம் இன்று நடந்துள்ளது.

திருமண நிச்சயதார்த்தம் நடந்து 6 மாதங்கள் ஆன நிலையில் இன்று காலை வெங்கடேஷ் ஐயர் திருமணம் நடந்துள்ளது. இவர்களது திருமணத்தில் பெற்றோர்கள் மற்றும் குடும்பத்தினர் என்று பலரும் கலந்து கொண்டுள்ளனர். நடந்து முடிந்த ஐபிஎல் 2024 கிரிக்கெட் தொடரில் கொல்கத்தா நைட் ரைடர்ஸ் வீரர் வெங்கடேஷ் ஐயர் 14 போட்டிகளில் விளையாடி 370 ரன்கள் எடுத்துள்ளார்.