விடாமல் வெளுத்து வாங்கும் கனமழை.. பள்ளி கல்லூரிகளுக்கு விடுமுறை அறிவிப்பு..!

தொடர் கனமழை காரணமாக திருவனந்தபுரம் மாவட்டத்தில் உள்ள அனைத்து பள்ளி கல்லூரிகளுக்கும் விடுமுறை அறிவிக்கப்பட்டுள்ளது. 

அரபிக்கடலில் உருவாகியுள்ள காற்றழுத்த தாழ்வு மண்டலத்தின் தாக்கம் காரணமாக கேரளாவில் பரவலாக அனைத்து மாவட்டங்களிலும் கடந்த சில நாட்களாகவே கனமழை வெளுத்து வாங்கி வருகிறது. இதன் காரணமாக ஆறுகளில் வெள்ளப்பெருக்கு ஏற்பட்டுள்ளது. மேலும், ஏராளமான மரங்கள் வேரொடு சாய்ந்தன. பல வீடுகளில் சுற்றுச்சுவர்கள் இடிந்து விழுந்தன. கனமழையால் மக்கள் வெளியே செல்ல முடியாமல் வீட்டிலேயே முடங்கினர்.

இந்நிலையில், கேரளாவில் அடுத்த 5 நாட்களுக்கு இடி, மின்னலுடன் கனமழை தொடரும் என இந்திய வானிலை ஆய்வு மையம் தெரிவித்துள்ளது. திருவனந்தபுரத்தில் ஆரஞ்சு அலர்ட் மற்றும் கொல்லம், பத்தனம்திட்டா மற்றும் ஆலப்புழா மாவட்டங்களில் மஞ்சள் எச்சரிக்கை விடுக்கப்பட்டுள்ளது.

திருவனந்தபுரத்தில் ஆரஞ்சு அலர்ட் விடுத்திருக்கும் நிலையில் அங்கு விடாமல் கனமழை கொட்டி வருகிறது. இதன் காரணமாக அம்மாவட்டத்தில் உள்ள பள்ளி, கல்லூரிகளுக்கு  விடுமுறை அறிவித்து மாவட்ட நிர்வாகம் உத்தரவிட்டுள்ளது.