Suresh Gopi: அமைச்சர் பதவியில் இருந்து விலகுகிறேனா? உண்மை இதுதான்... சுரேஷ் கோபி அதிரடி விளக்கம்!

மத்திய இணை அமைச்சராக பொறுப்பேற்றுள்ள நடிகர் சுரேஷ் கோபி, அமைச்சர் பதவியில் இருந்து விலக உள்ளதாக சமூக வலைதளத்தில் ஒரு தகவல் காட்டு தீ போல் பரவி வந்த நிலையில், இது குறித்து தற்போது அவரே விளக்கம் கொடுத்துள்ளார். 

Suresh Gopi

நம் இந்தியாவின் பிரதமரை தேர்வு செய்வதற்கான பாராளுமன்ற மக்களவைத் தேர்தல் சமீபத்தில் நடந்து முடிந்த நிலையில், அதன் முடிவுகள் ஜூன் 4-ஆம் தேதி வெளியானது. இந்த தேர்தலில் எந்த கட்சியும் தங்களுடைய பெரும்பான்மையை நிரூபிக்காத நிலையில், கூட்டணி கட்சிகளின் உதவியுடன் பாஜக மத்தியில் ஆட்சியை அமைத்துள்ளது. 

நேற்று நம் நாட்டின் பிரதமராக நரேந்திர மோடி மூன்றாவது முறையாக பதவி ஏற்று கொண்டார். அவருடன் சேர்ந்து 73 பேர் இணை அமைச்சர்களாக பதவியேற்று கொண்டனர். இதில் கேரள மாநிலம் திருச்சூர் தொகுதியில் போட்டியிட்டு சுமார் 4 லட்சத்திற்கும் மேற்பட்ட வாக்குகளை பெற்று வெற்றி பெற்ற நடிகர் சுரேஷ் கோபியும் ஒருவர்.

சுரேஷ் கோபியின் மூலம் கேரளாவிலும் கால் பதித்துள்ளது பாஜக. எனவே சுரேஷ் கோபிக்கு மத்திய இணை அமைச்சர் பதவி வழங்கப்பட்டது. இவர் நேற்று நடைபெற்ற பதவியேற்பு விழாவில் கலந்து கொண்ட நிலையில், இன்று காலை முதலே சமூக வலைதளத்தில் ஒரு தகவல் தீயாக பரவி வந்தது.

அதாவது சுரேஷ் கோபி அடுத்தடுத்து பல படங்களில் நடிக்க கமிட் ஆகி உள்ளதால், அமைச்சர் பதவி தனக்கு வேண்டாம் என தெரிவித்துள்ளதாகவும்... விரைவில் அவரை அமைச்சர் பதவியில் இருந்து பாஜக விடுவிக்கும் என கூறப்பட்டது. இதைத் தொடர்ந்து தற்போது சுரேஷ் கோபி இது குறித்து தன்னுடைய விளக்கம் ஒன்றை சமூக வலைதளத்தில் வெளியிட்டுள்ளார்.

அதில் மோடி அரசின் அமைச்சர்கள் குழுவில் இருந்து நான் விலகப்போவதாக சில ஊடகங்கள் தவறான செய்திகளை வெளியிட்டு வருகின்றன. இது முற்றிலும் தவறானது. பிரதமர் தலைமையில் நரேந்திர மோடி ஜி கேரளாவிலும் வளர்ச்சி மற்றும் செழிப்பை கொண்டுவர நாங்கள் கடமைப்பட்டுள்ளோம் என தெரிவித்துள்ளார். இதன் மூலம் அமைச்சர் பதவியில் இருந்து சுரேஷ்கோபி விலகவில்லை வெளியாகும் தகவலில் உண்மை இல்லை என்பது தெளிவாகிறது.