FIFA 2026: நாக்-அவுட்டில் அமெரிக்கா.. முதல் வெற்றியுடன் பிரேசில் மாஸ் கம்பேக்!
FIFA 2026: உலகக் கோப்பை கால்பந்து போட்டியில் ஆஸ்திரேலியாவை வீழ்த்திய அமெரிக்கா நாக்-அவுட் இடத்தை உறுதி செய்தது. ஹைட்டியை வீழ்த்திய பிரேசில் அணி தனது முதல் வெற்றியை பதிவு செய்தது.
FIFA உலகக் கோப்பை; அமெரிக்கா நாக்-அவுட் சுற்றுக்கு தகுதி
FIFA உலகக் கோப்பை கால்பந்து போட்டியில் நட்சத்திர வீரர் கிறிஸ்டியன் புலிசிச் இல்லாமலேயே, அமெரிக்க அணி நாக்-அவுட் சுற்றுக்கு தகுதி பெற்றுள்ளது. ஆஸ்திரேலியாவுக்கு எதிரான போட்டியில், போட்டியை நடத்தும் அமெரிக்கா 2-0 என்ற கோல் கணக்கில் வெற்றி பெற்றது. வெறும் 2 போட்டிகளில் விளையாடி அமெரிக்கா நாக்-அவுட் இடத்தை உறுதி செய்வது இதுவே முதல் முறையாகும்.
போட்டியின் 11-வது நிமிடத்திலேயே ஆஸ்திரேலிய வீரர் கேமரூன் பர்கெஸ் தவறுதலாக சொந்த அணிக்கு எதிராக கோல் அடித்ததால் (own goal), அமெரிக்காவுக்கு ஆரம்பத்திலேயே முன்னிலை கிடைத்தது. 43-வது நிமிடத்தில், அன்டோனியோ ஃப்ரீமன் அடித்த கோல் அமெரிக்காவுக்கு 2-0 என வலுவான முன்னிலையை தந்தது. இரண்டாம் பாதியிலும் இந்த முன்னிலையைத் தக்கவைத்துக்கொண்ட அமெரிக்கா, போட்டியில் வென்று 32 அணிகள் மோதும் இறுதிச் சுற்றுக்கு முன்னேறியது.
65 வினாடிகளில் கோல் அடித்து பராகுவே வெற்றி
துருக்கிக்கு எதிரான போட்டியில் பராகுவே அணி 1-0 என்ற கோல் கணக்கில் வெற்றி பெற்றது. இந்த போட்டி தொடங்கிய வெறும் 65 வினாடிகளிலேயே மத்தியாஸ் கலார்சா கோல் அடிக்க பராகுவே அணி 1-0 என்ற கோல் கணக்கில் வெற்றி பெற்றது. இந்த உலகக் கோப்பையில் அடிக்கப்பட்ட அதிவேக கோல் இதுவாகும். தொடர்ச்சியாக இரண்டாவது தோல்வியைச் சந்தித்த துருக்கி, இந்த தொடரிலிருந்து வெளியேறியது.
ஸ்காட்லாந்தை வீழ்த்திய மொராக்கோ
தனது முதல் உலகக் கோப்பையில் விளையாடும் இஸ்மாயில் சைபரி அடித்த கோலின் உதவியுடன், ஸ்காட்லாந்துக்கு எதிராக மொராக்கோ 1-0 என்ற கோல் கணக்கில் வெற்றி பெற்றது. இதன் மூலம், நாக்-அவுட் சுற்றுக்கு தகுதி பெறும் தனது நம்பிக்கையை மொராக்கோ உயிர்ப்புடன் வைத்துள்ளது. சைபரி, போட்டியின் 21-வது நிமிடத்தில் இந்த கோலை அடித்தார்.
பிரேசிலுக்கு முதல் வெற்றி
5 முறை சாம்பியனான பிரேசில், 2026 FIFA உலகக் கோப்பையில் தனது முதல் வெற்றியைப் பதிவு செய்துள்ளது. ஹைட்டிக்கு எதிராக சனிக்கிழமை நடந்த போட்டியில் 3-0 என்ற கோல் கணக்கில் பிரேசில் அபார வெற்றி பெற்றது. 1974-க்குப் பிறகு முதல் முறையாக உலகக் கோப்பைக்கு தகுதி பெற்ற ஹைட்டி, தொடர்ச்சியாக 2 தோல்விகளுடன் இந்த தொடரிலிருந்து வெளியேறும் முதல் அணி என்றானது.
பிரேசில் வீரர் மத்தியாஸ் குன்ஹா 23 மற்றும் 36-வது நிமிடங்களில் கோல் அடித்தார். வினிசியஸ் ஜூனியர் 45+3-வது நிமிடத்தில் அணியின் 3-வது கோலை அடித்தார். முதல் பாதியிலேயே 3-0 என முன்னிலை பெற்ற பிரேசில், இரண்டாம் பாதியில் கோல் எதுவும் அடிக்கவில்லை. கணுக்கால் காயத்திலிருந்து இன்னும் முழுமையாக மீளாத நெய்மர், தொடர்ச்சியாக இரண்டாவது போட்டியிலும் விளையாடவில்லை.
