'வாழு வாழ விடு தல'... எங்க வேலையை நாங்க பார்க்கிறோம்: ரேஸுக்கு ஆதரவு கேட்ட அஜித்தை வச்சு செய்யும் ரசிகர்கள்!

நடிகர் அஜித்குமார் தனது கார் பந்தய அணி அக்டோபர் 9, 10 தேதிகளில் போர்ச்சுகலில் நடைபெற உள்ள போட்டியில் பங்கேற்க இருப்பதாகவும், அதற்கு ரசிகர்கள் அனைவரும் ஆதரவளிக்க வேண்டும் என்றும் கோரி வீடியோ ஒன்றை வெளியிட்டார்.

Image Credit : pinterest

போர்ச்சுகல் கார் ரேஸ் ஆதரவு வீடியோவுக்கு பதிலடி!

முதலில் உங்க குடும்பத்தை பாருங்கள்... நேரம் கிடைத்தால் என் படத்தைப் பாருங்கள் என்று ரசிகர்களிடம் சொல்லி வந்த நடிகர் அஜித்தே, இப்போது தனது கார் ரேஸுக்கு ஆதரவு கேட்டு வீடியோ வெளியிட்டிருக்கிறார். இதைப் பார்த்த ரசிகர்கள் சிலர், சாரி தல... குடும்பத்தைப் பார்க்க வேண்டியது இருக்கு என்று அஜித்துக்கே அவரது பழைய வார்த்தைகளைத் திருப்பிக் கொடுத்து வருகின்றனர். இந்த மீம்ஸ்களும் பதிவுகளும் தற்போது சமூக வலைதளங்களில் கவனம் பெற்று வருகின்றன.

Image Credit : Asianet News

அஜித் குமார் வெளியிட்ட வீடியோவால் வெடித்த சர்ச்சை

நடிகர் அஜித்குமார் சினிமாவுக்கு அப்பாற்பட்டு கார் பந்தயத்திலும் தீவிர கவனம் செலுத்தி வருகிறார். அவரது அணி அடுத்ததாக போர்ச்சுகலில் நடக்க இருக்கும் கார் பந்தயத்தில் பங்கேற்கிறது. அக்.9, 10-ம் தேதிகளில் போட்டி நடைபெற உள்ளது. இதையொட்டி அஜித் தனது ரசிகர்களிடம் ஆதரவு கேட்டு வீடியோவை வெளியிட்டிருக்கிறார். அந்த வீடியோவில் அஜித் மிக எளிமையாக, நான் அஜித்குமார். 9,10-ம் தேதிகளில் போர்ச்சுகலில் நடக்கும் கார் பந்தயத்தில் நமது அணி பங்கேற்கிறது. நீங்க அனைவரும் அதற்கு ஆதரவு அளிக்க வேண்டும் என்று பேசியிருக்கிறார்.

அவருடைய இந்த வேண்டுகோள் வீடியோ வெளியானதும் அஜித் ரசிகர்கள் பலரும் அதை பகிர்ந்து தங்களுடைய ஆதரவை தெரிவித்து வருகின்றனர். ஆனால் அதே நேரத்தில் இன்னொரு தரப்பினர், இந்த வீடியோவை வைத்து அஜித்தையே கலாய்க்க ஆரம்பித்துவிட்டார்கள். அதற்குக் காரணம் அஜித் பல வருடங்களாக தனது ரசிகர்களிடம் சொல்லி வந்த ஒரு விஷயம்தான்.

Image Credit : Asianet News

வாழு வாழ விடு தல என ரசிகர்கள் பதிலடி

ரசிகர்கள் தன்னைச் சுற்றியே வாழ்க்கையை வைத்துக்கொள்ளக்கூடாது, முதலில் தங்களுடைய குடும்பத்தைக் கவனிக்க வேண்டும், படிப்பு மற்றும் வேலைக்கு முக்கியத்துவம் கொடுக்க வேண்டும் என்று அஜித் தொடர்ந்து அறிவுரை சொல்லி வந்திருக்கிறார். அஜித் வாழ்க, விஜய் வாழ்க என்று சொல்லிக்கொண்டிருந்தால் நீங்கள் எப்போது வாழப்போகிறீர்கள்? என்று கூட அவர் ரசிகர்களிடம் பேசியிருக்கிறார்.

Image Credit : x

ரசிகர்களின் அதிரடி கமெண்ட்ஸ்களும் மீம்ஸ்களும்!

அதனால் இப்போது அவரது ரேஸ் வீடியோவுக்கு கீழே சில ரசிகர்கள், சாரி தல... எங்களுக்கு வேலை இருக்கு, குடும்பத்தைப் பார்க்கணும் என்று அவரது பழைய அறிவுரையையே கிண்டலாகத் திருப்பிக் கொடுத்திருக்கிறார்கள். இன்னும் சிலர், நீங்க வாழுங்க... நாங்க எப்போ வாழ்வது? எங்க வாழ்க்கையை நாங்க பார்க்கணும் என்ற ரீதியில் மீம்ஸ் போட்டிருக்கிறார்கள். பார்த்தால் சிரிப்பாகத்தான் இருக்கிறது. ஆனால் இந்தக் கலாய்ப்புக்கு பின்னால் ஒரு பழைய அஜித்-ரசிகர் உறவும் இருக்கிறது.

ஏனென்றால் அஜித் மற்ற நடிகர்களைப் போல ரசிகர் மன்றத்தைப் பெரிதாக்குவதில் ஆர்வம் காட்டாமல், 2011-ம் ஆண்டிலேயே தனது ரசிகர் மன்றங்களைக் கலைத்தவர். அதன்பிறகும் உங்க குடும்பத்தைப் பாருங்கள், உங்க வாழ்க்கையைப் பாருங்கள் என்பதையே தொடர்ந்து சொல்லி வந்தார். இப்போது கதை கொஞ்சம் தலைகீழாகிவிட்டது.

Image Credit : @TrollywoodX

அஜித் சொன்ன அட்வைஸே பதிலாகப் போச்சு!

அஜித், எங்கள் அணிக்கு உங்களுடைய அன்பும் ஆதரவும் வேண்டும் என்று கேட்கிறார். ரசிகர்களோ, நீங்களேதானே குடும்பத்தைப் பார்க்க சொன்னீங்க? என்று அதையே வைத்து அவரைக் கலாய்க்கிறார்கள். இதோடு, இன்னொரு பழைய சம்பவத்தையும் சிலர் இப்போது மீண்டும் எடுத்து வருகிறார்கள். சமீபத்தில் இங்கிலாந்தின் சில்வர்ஸ்டோனில் நடைபெற்ற மிச்செலின் லீ மான்ஸ் கப் போட்டியில் அஜித் கலந்து கொண்டார். அந்தப் போட்டியை தொடங்கி வைப்பதற்காக தமிழக முதல்வர் விஜய் அங்கு சென்றிருந்தார். இருவரும் சந்தித்து கட்டிப்பிடித்த காட்சிகள் பெரிய அளவில் வைரலானது.

அதே நிகழ்ச்சியின் போது, அஜித்திடம் செல்ஃபி எடுக்க முயற்சி செய்தபோது ஒருசில ரசிகர்களிடம் அவர் எரிச்சலாக நடந்து கொண்ட வீடியோவும் பின்னர் சமூக வலைதளங்களில் வைரலானது. போர்ச்சுகல் ரேஸுக்கு ஆதரவு கேட்டு அஜித் வீடியோ வெளியிட்டிருக்கும் நிலையில், அந்த சம்பவத்தையும் சிலர் சேர்த்து பேச ஆரம்பித்திருக்கிறார்கள்.