அரசியலுக்கு வந்தே ஆகணும்! ரஜினி ரசிகர்களுக்கு ஆதரவு தெரிவிக்கும் விஜய் - அஜித் ரசிகர்கள்!

சூப்பர் ஸ்டார் ரஜினிகாந்த் தன்னுடைய உடல் நிலையை கருத்தில் கொண்டு, இனி அரசியலுக்கு வரப்போவதில்லை என அறிக்கை வெளியிட்டு தெரிவித்த போதிலும், இவரது அரசியல் வருகைக்காக காத்திருக்கும் ரஜினி ரசிகர்கள் இன்று தங்களுடைய அறப்போராட்டம் மூலம் தலைவருக்கு அரசியல் அழைப்பு விடுத்து வருகிறார்கள். ரஜினி ரசிகர்களின் போராட்டத்திற்கு ஆதரவு தெரிவிக்கும் விதத்தில், விஜய் மற்றும் அஜித் ரசிகர்களும் இந்த போராட்டத்திற்கு குரல் கொடுத்து வருகிறார்கள்.
 

பல ஆண்டுகளாக ரஜினி கட்சி ஆரம்பிப்பார் என காத்திருந்த ரசிகர்களுக்கு, டிசம்பர் 31 ஆம் தேதி 2020 - ல் அரசியல் கட்சி குறித்து அறிவிக்க உள்ளதாக நம்பிக்கை கொடுத்தார் ரஜினிகாந்த். ரசிகர்களும் தலைவர் கட்சி குறித்து அறிவித்து,  இம்முறை சட்டமன்ற தேர்தலை சந்திப்பார் என காத்திருந்தனர்.

இந்த நிலையில் தான் கொரோனா பாதுகாப்புக்கு மத்தியில் நடந்த 'அண்ணாத்த' படப்பிடிப்பில் இருந்த படக்குழுவினர் 4 பேருக்கு கொரோனா தொற்று உறுதியானது. ரஜினிகாந்துக்கு கொரோனா பரிசோதனை செய்ததில் நெகடிவ் என வந்த போதிலும் ரத்த அழுத்தத்தில் மாறுதல் இருந்தது.
 

இதை தொடர்ந்து, படப்பிடிப்பு ரத்து செய்யப்பட்டது. மேலும் ஹைதராபாத்தில் உள்ள அப்பல்லோ மருத்துவமனையில் மூன்று நாள் அனுமதிக்கப்பட்ட ரஜினிகாந்த், ரத்த அழுத்த மாறுபாடு சீரான பின்னர் டிஸ்சார்ஜ் செய்யப்பட்டார்.
 

கட்சி துவங்குவதாக அறிவித்த... டிசம்பர் 31 ஆம் தேதிக்கு முன்னரே, திடீர் என 3 பக்க அறிக்கை ஒன்றை வெளியிட்ட ரஜினிகாந்த், உடல் நலன் கருதி, இனி அரசியலுக்கு வர போவதில்லை என தெரிவித்தார். இது ரஜினிகாந்த் அரசியலுக்கு வருவார் என ஏங்கி கொண்டிருந்த ரசிகர்களுக்கு பெருத்த ஏமாற்றத்தை கொடுத்தது.

ரஜினியின் முடிவுக்கு பிரபலங்கள் மற்றும் சில ரசிகர்கள் ஆதரவு தெரிவித்த போதிலும், இவருடைய முடிவு ஏற்க கூடியதாக இல்லை என, பல ரசிகர்கள் தங்களுடைய கருத்தை முன்வைத்து வந்தனர். ரஜினிகாந்த் வீட்டு முன்பும் போராட்டத்திலும் ஈடுபட்டனர்.

இன்றைய தினம், ரஜினியின் முடிவில் உடன்பாடு இல்லாத 1000 திற்கும் மேற்பட்ட ரசிகர்கள் ஒன்று கூடி, தங்களுடைய, ரஜினி அரசியலுக்கு வரவேண்டும் என அழைப்பு விடுத்து வருகிறார்கள்.

இவர்களது போராட்டம் இன்று மாலை 4 மணிவரை நடைபெறும் என கூறப்படுகிறது. கைகளில் ரஜினியின் புகைப்படங்கள், போஸ்டர்கள், பதாதைகளை ஏந்தி தங்களது கருத்தை வலுயுறுத்தி வருகிறார்கள். சில ரசிகர்கள் ரஜினிகாந்தின் உடல்நலம் பெற, முடியை காணிக்கை செலுத்தியும் உள்ளனர்.

இந்த போராட்டத்தில் கலந்து கொண்டுள்ள ரஜினி ரசிகர்களுக்கு ஆதரவு கொடுக்கும் விதத்தில் விஜய் மற்றும் அஜித் ரசிகர்களும் தங்களுடைய ஆதரவை தெரிவித்து வருகிறார்கள்.

இதுகுறித்த புகைப்படங்களும் தற்போது சமூக வலைத்தளத்தில் வைரலாகி வருகிறது. ரஜினி அரசியலுக்கு வர வேண்டும் என, எழுச்சி நடத்தி வரும் ரசிகர்களின் கோரிக்கைக்கு தலைவர் செவி சாய்ப்பாரா? மீண்டும் ரஜினியின் அரசியல் வருகை ஏற்படுமா? என்பதை பொறுத்திருந்து தான் பார்க்க வேண்டும்.

மேலும் சுவாரஸ்யமான செய்திகளுக்கு ஏசியாநெட்நியூஸ் தமிழ் வாட்ஸ்அப் சேனலை கிளிக் செய்து பின்தொடரவும்