ரசிகரிடம் மன்னிப்பு கேட்ட நடிகர் சூரி; ஷூட்டிங் ஸ்பாட்டில் நடந்தது என்ன?

Soori Apologizes to Fan Over Bouncer Misconduct: நடிகர் சூரி, ஷூட்டிங் ஸ்பாட்டில் நடந்த சம்பவத்திற்காக தற்போது ரசிகர்களிடம் மன்னிப்பு கேட்டுள்ளது, அவரின் மனித நேயத்தை பறைசாற்றும் விதத்தில் அமைந்துள்ளது.

Image Credit : X

சூரியின் வளர்ச்சி:

தமிழ் சினிமா உலகில், பல போராட்டங்களை கடந்து ஒரு காமெடி நடிகராக வளர்ந்தவர் நடிகர் சூரி. ஆரம்பத்தில் எந்தப் படத்திலும் இரண்டு நிமிடம் கூட தலைகாட்டாத கதாபாத்திரம் கிடைத்தாலும், அது அவருக்கு பெரிய சந்தோஷமாக இருந்தது. தன்னுடைய தனித்துவமான டயலாக் டெலிவரி மூலம் மெதுவாக மக்கள் மனதில் இடம் பிடிக்க தொடங்கினார் சூரி.

Image Credit : X

மக்கள் மனதில் இடம்பிடித்த காமெடி:

குறிப்பாக காமெடி கதாப்பாத்திரங்களின் மூலம் சூரி பிரபலமானார். அவருடைய எளிமையான முகம், கிராமத்து நகைச்சுவை, இயல்பான அசைவுகள்ரசிகர்களின் மனதில் நன்றாகப் பதிந்துவிட்டது. எந்தப் படத்திலும் சூரி வரும்போதும் மக்கள் உடனே சிரிக்கத் தொடங்குவார்கள். அந்த அளவுக்கு அவரது பாணி தனித்துவமாக இருந்தது.

Image Credit : X

ஹீரோவாக வெற்றிகண்ட சூரி:

ஆனால், அவர் காமெடியில் மட்டுமே அடைக்கலம் தேடாமல், நாயகனாகவும் தன்னை நிரூபிக்க வேண்டும் என்பது ஒரு பெரிய கனவு. அந்த கனவை நிறைவேற்றும் வகையில், சில ஆண்டுகளாக கதாநாயகன் ரோல்களில் நடிக்க ஆரம்பித்தார். கடைசியாக வெளியான மாமன் படம், சூரியை மாறுபட்ட கோணத்தில் காட்டியது. பிரசாந்த் பாண்டிராஜ் இயக்கிய இந்த படம், குடும்ப உணர்வுகளும், கதையின் உண்மைத் தன்மையும் காரணமாக நல்ல வரவேற்பைப் பெற்றது. சூரி நடித்த விதம் பலரையும் ஆச்சரியப்பட வைத்தது. “காமெடி தான் அவருக்கு சரி” என்று நினைத்த ரசிகர்களும், “சூரியிடம் ஹீரோ கெட்டப்பும் சரி, நடிப்பும் இன்னும் சரி” என பாராட்டு தெரிவித்தனர்.

Image Credit : X

மண்டாடி திரைப்படம்:

இப்போது, அவர் நடிக்கும் அடுத்த படம் மண்டாடி. மதிமாறன் புகழேந்தி இயக்கும் இந்த படத்தில் சூரிக்கு இணையாக மகிமா நம்பியார் நடிக்கிறார். மேலும், சுஹால் முக்கியமான வேடத்தில் நடித்துவருகிறார். இந்த படம் மீனவர்களின் வாழ்க்கையை மையமாகக் கொண்டு உருவாகி வருகிறது. குறிப்பாக கடலில் நடைபெறும் படகு பந்தயம், அதைப் பின்னணியாகக் கொண்டு நடக்கும் சண்டைகள், உறவுகள், வெற்றிக்கான போராட்டம்—இவை எல்லாமே கதையின் முக்கிய தளம்.

Image Credit : X

படப்பிடிப்பில் நடந்தது என்ன?

படப்பிடிப்பு தற்போது விறுவிறுப்பாக நடந்து வருகிறது. சில நேரங்களில் இரவு நேரங்களிலும் படப்பிடிப்பு செய்ய வேண்டி வருகிறது. இதை பார்த்து மகிழ்ச்சியுடன் அங்குள்ள ஊர் மக்கள் கூடி நின்று படப்பிடிப்பைப் பார்ப்பதும் வழக்கமானதே. அந்த நேரத்தில் ஒரு ரசிகர், “எங்கள் ஊரில் உங்கள் படப்பிடிப்பு நடப்பது பெருமை. ஆனால் இரவில் படப்பிடிப்பு பார்க்க வருகிற எங்கள் ஊர்காரர்களிடம் உங்கள் பவுன்சர்கள் கொஞ்சம் கடுமையாக நடந்து கொள்கிறார்கள். இதைப் பார்த்து வருத்தமாக இருந்தது,” என்று சமூக ஊடகத்தில் பதிவு செய்தார். இந்தப் பதிவைப் பார்த்த உடனே நடிகர் சூரி தன்மையோடு அவருக்கு பதில் கொடுத்துள்ளார்.

Image Credit : X

மன்னிப்பு கேட்ட சூரி:

அதில் “தம்பி, உங்கள் அன்புக்கும் ஆதரவுக்கும் மனமார்ந்த நன்றி. படப்பிடிப்பு நேரத்தில் ஏற்பட்ட தவறுக்கு மன்னிக்கவும். இது பற்றி தயாரிப்பு குழுவுக்கும், பவுன்சர் சகோதரர்களுக்கும் சொல்கிறேன். இனிமேல் எங்கள் அணியெல்லாம் அதிக கவனத்துடன் இருப்பார்கள். எப்போதும் போல நீங்கள் தரும் அன்பே எங்களுக்குப் பெரிய பலம். மீண்டும் நன்றி.” என கூறியுள்ளார்.

Image Credit : Google

நெகிழ்ந்து போன ரசிகர்கள்:

சூரியின் இந்த பதில் ரசிகர்களிடம் நெகிழ்ச்சியை ஏற்படுத்தியுள்ளது. பொதுவாக சில நடிகர்கள் இப்படிப் பட்ட கருத்துகளை புறக்கணித்துவிடுவார்கள். ஆனால் சூரி, தன் ரசிகர்களின் உணர்வுகளை புரிந்துகொண்டு உடனடியாக மன்னிப்பு கேட்டு, சரியான நடவடிக்கை எடுப்பதாக உறுதி அளித்தது, அவரின் எளிமைக்கும் மனிதநேயத்திற்கும் இன்னொரு சான்றாக அமைந்தது. சினிமா உலகில் பணிவும் மனித நேயமும் கலந்த சில முகங்கள் மட்டுமே இருக்கும். அதில் சூரி முன்னணியில் இருப்பார் என்பதில் ரசிகர்களுக்கு எந்த சந்தேகமும் இல்லை. மண்டாடி படத்தின் மூலம் அவர் இன்னொரு மாறுபட்ட கதாநாயகனாக ரசிகர்களை ஆச்சர்யப்படுத்தப் போகிறார் என்பதும் உறுதியாக தெரிகிறது.