சிவகார்த்திகேயனின் 'பராசக்தி' புதிய போஸ்டருடன் வெளியான அப்டேட்!

நடிகர் சிவகார்த்திகேயன் நடிப்பில் உருவாகி வரும் 'பராசக்தி' திரைப்படத்தின் டீசர் ரிலீஸ் குறித்த அப்டேட் தற்போது வெளியாகி உள்ளது.  

அமரன் பட வெற்றியை தொடர்ந்து சிவகார்த்திகேயன் நடிக்கும் பராசக்தி:

தொடர்ந்து வித்யாசமான கதைகளத்திலும், ரசிகர்களை கவர்ந்திழுக்கும் கதாபாத்திரங்களிலும், நடித்து வருபவர் சிவகார்த்திகேயன். கடந்த ஆண்டு தீபாவளிக்கு இவர் நடிப்பில் வெளியான 'அமரன்' திரைப்படம் சிவகார்த்திகேயனை ரூ.300 கோடி வசூல் நாயகனாக மாற்றியது. மேலும் இந்த படத்தை தயாரித்த உலகநாயகன் கமலஹாசனுக்கும், மிகப்பெரிய லாபத்தை பெற்று தந்தது.

அதேபோல் இயக்குனர் ராஜ்குமார் பெரியசாமி, இந்த படத்தின் மூலம் தன்னுடைய தனித்துவமான படைப்பை இயக்கி இருந்தார். தமிழகத்தை சேர்ந்த மறைந்த ராணுவ வீரர் முகுந்த் வரதராஜனின் வாழ்க்கை வரலாற்றை மையப்படுத்தி எடுக்கப்பட்ட இந்த திரைப்படம், ரூ.150 முதல் ரூ.160 கோடி பட்ஜெட்டில் எடுக்கப்பட்டு, ரூ.340 கோடி வரை லாபம் ஈட்டியது.

சம்பளத்தை உயர்த்திய சிவகார்த்திகேயன்

சிவகார்த்திகேயனையே தூக்கி சாப்பிடும் அளவுக்கு மிகவும் நேர்த்தியான நடிப்பை, நடிகை சாய் பல்லவியும் வெளிப்படுத்தி இருந்தார். இந்த படத்தின் வெற்றிக்கு பின்னர், சிவகார்த்திகேயன் தன்னுடைய சம்பளத்தை அதிரடியாக உயர்த்தி விட்டதாக கூறப்படும் நிலையில், அடுத்தடுத்து இவரை வைத்து இயக்க பல முன்னணி இயக்குனர்கள் போட்டி போட்டு வருகின்றனர். அந்த வகையில் இயக்குனர் ஏ ஆர் முருகதாஸ் இயக்கத்தில் ஒரு படத்தில் நடிக்கும் சிவகார்த்திகேயன், இதைத் தொடர்ந்து 'சூரரைப் போற்று' திரைப்படத்திற்கு தேசிய விருது பெற்று, சுதா கங்கோரா இயக்கத்தில் உருவாகி வரும் படத்திலும் நடித்து வருகிறார்.

வில்லனாக நடிக்கும் ரவி மோகன்

இந்த படத்தை டான் பிக்சர்ஸ் நிறுவனம் சார்பில் ஆகாஷ் பாஸ்கரன் மற்றும் ரெட் ஜெயிண்ட் மூவிஸ் நிறுவனம் இணைந்து தயாரித்து வருகிறது. இந்த படத்தின் மூலம் இதுவரை ரொமாண்டிக் மற்றும் அதிரடி ஆக்சன் ஹீரோவாக இருந்த நடிகர் ரவி மோகன் வில்லனாக நடிக்கப் போவதாக கூறப்படுகிறது. இவரை தவிர முக்கிய கதாபாத்திரத்தில் அதர்வா நடிக்க, சிவகார்த்திகேயனுக்கு ஜோடியாக பிரபல தெலுங்கு நடிகை ஸ்ரீலீலா நடிக்கிறார்.

பராசக்தி டீசர் நாளை மாலை 4 மணிக்கு:

ஜிவி பிரகாஷ் இந்த படத்திற்கு இசையமைக்க உள்ளார். இந்த படத்தின் படப்பிடிப்பு தற்போது பரபரப்பாக நடந்து வரும் நிலையில், சமீபத்தில் இந்த படத்தின் டைட்டிலை படக்குழு வெளியிட்டது. இப்படத்திற்கு 'பராசக்தி' என பெயரிடப்பட்டுள்ள நிலையில், சில சிவாஜி ரசிகர்கள் இந்த படத்தின் தலைப்பை மாற்ற வேண்டும் என போர்க்கொடி தூக்கி வருகின்றனர். தற்போது இந்த படம் குறித்த மற்றொரு அப்டேட் வெளியாகி உள்ளது. அதன்படி இந்த படத்தின் டீசர் நாளை மாலை 4 மணிக்கு வெளியாகும் என புதிய போஸ்டருடன் படக்குழு அறிவித்துள்ளது. அந்த போஸ்டரில் "தீ பரவட்டும் நாளை மாலை 4 மணி முதல்" என வாசகம் இடம்பெற்றுள்ளது. சிவகார்த்திகேயன் ஒரு போராளி போல் கையில் பாட்டில் நின்று கொண்டிருக்க அவரை வைத்திருக்கும் பாட்டிலில் நெருப்பு எரிந்து கொண்டிருக்கிறது.  இந்த போஸ்டரே படம் மீதான எதிர்பார்ப்பை தூண்டி உள்ளது.