தலைவர் 173 படத்தை இயக்கும் அட்லீயின் சிஷ்யன்... யாரும் எதிர்பாரா கூட்டணியில் ரஜினிகாந்த்...!

கமல்ஹாசன் தயாரிப்பில் சூப்பர்ஸ்டார் ரஜினிகாந்த் நடிக்க உள்ள தலைவர் 173 திரைப்படத்தின் இயக்குநர் யார் என்பதை படக்குழு அதிகாரப்பூர்வமாக அறிவித்து உள்ளது. அதைப்பற்றி பார்க்கலாம்.

Image Credit : X

Thalaivar 173 Movie Director Announced

தமிழ் திரையுலகின் இருபெரும் ஆளுமைகளாக ரஜினிகாந்த் மற்றும் கமல்ஹாசன் உள்ளனர். இவர்கள் இருவரும் இணைந்து பல படங்களில் நடித்திருந்தாலும், முதன்முறையாக கமல்ஹாசன் தயாரிப்பில் ரஜினிகாந்த் நடிக்க இருப்பதாக கடந்த நவம்பர் மாதம் ஒரு அறிவிப்பு வெளியானது. அந்த அறிவிப்பில் ரஜினிகாந்தின் 173-வது படத்தை கமலின் ராஜ்கமல் பிலிம்ஸ் நிறுவனம் தயாரிப்பதாகவும், குறிப்பிடப்பட்டு இருந்தது. அப்படத்தை சுந்தர் சி இயக்க உள்ளதாகவும் அறிவித்து இருந்தனர். இதையடுத்து கமல், ரஜினி, சுந்தர் சி ஆகியோர் சந்தித்த வீடியோவும் வெளியிடப்பட்டு இருந்தது.

Image Credit : X

விலகிய சுந்தர் சி

தலைவர் 173 படத்தின் அறிவிப்பு வெளிவந்த ஒரே வாரத்தில் அப்படத்தில் இருந்து விலகுவதாக அறிவித்தார் சுந்தர் சி. ரஜினிக்கு கதையில் திருப்தி இல்லாததால் அவர் இப்படத்தில் இருந்து விலகியதாக கூறப்பட்டது. பின்னர் தலைவர் 173 படத்தை யார் இயக்குவார் என்பதை தெரிந்து கொள்ள ரசிகர்கள் ஆர்வம் காட்டி வந்தனர். இதனிடையே இப்படத்தை பார்க்கிங் பட இயக்குநர் ராம்குமார் இயக்க உள்ளதாக பேச்சு அடிபட்டது. பின்னர் டிராகன் பட இயக்குநர் அஸ்வத் மாரிமுத்து இப்படத்தை இயக்க உள்ளதாக தகவல் பரவியது. இந்த நிலையில், அந்த இயக்குனர் யார் என்பதை படக்குழுவே அதிகாரப்பூர்வமாக அறிவித்துள்ளது.

Image Credit : X

தலைவர் 173 இயக்குநர் யார்?

அதன்படி தலைவர் 173 படத்தை சிபி சக்கரவர்த்தி இயக்க உள்ளதாக அறிவித்துள்ளனர். இவர் சிவகார்த்திகேயன் நடித்து பிளாக்பஸ்டர் ஹிட்டான டான் படத்தை இயக்கியவர் ஆவார். கடந்த சில ஆண்டுகளுக்கு முன்பே ரஜினியிடம் இவர் கதை சொல்லி இருந்தார். ஆனால் அப்போது இந்த புராஜெக்ட் கைகூடாமல் இருந்தது. ஆனால் தற்போது யாரும் எதிர்பார்க்காத ஒரு அப்டேட்டாக தான் இது அமைந்துள்ளது. அந்த அளவுக்கு சிபி சக்கரவர்த்தியின் பெயர் சீக்ரெட்டாகவே வைத்திருந்தார்கள். மேலும் இப்படத்திற்கு அனிருத் இசையமைக்க உள்ளதாகவும், இப்படத்தை 2027-ம் ஆண்டு பொங்கலுக்கு ரிலீஸ் செய்ய உள்ளதாகவும் அறிவித்துள்ளனர்.

Image Credit : X

யார் இந்த சிபி சக்கரவர்த்தி?

சிபி சக்கரவர்த்தி வேறுயாருமில்லை, இயக்குநர் அட்லீயின் சிஷ்யன் தான். அட்லீ இயக்கிய தெறி, மெர்சல், பிகில் போன்ற படங்களில் உதவி இயக்குனராக பணியாற்றிய சிபி சக்கரவர்த்தி, சிவகார்த்திகேயன் நடிப்பில் கடந்த 2022-ம் ஆண்டு ரிலீஸ் ஆன டான் திரைப்படம் மூலம் இயக்குனராக அறிமுகமானார். முதல் படமே பிளாக்பஸ்டர் வெற்றியை ருசித்தார் சிபி. இப்படம் பாக்ஸ் ஆபிஸில் ரூ.125 கோடி வசூலித்து மாஸ் காட்டியது. இப்படத்தின் வெற்றியை தொடர்ந்து அவர் மீண்டும் சிவகார்த்திகேயன் உடனே கூட்டணி அமைக்க உள்ளதாக பேச்சு அடிபட்ட நிலையில், தற்போது ரஜினி பட வாய்ப்பை தட்டிதூக்கி இருக்கிறார்.