சூப்பர் ஸ்டார், அல்டிமேட் ஸ்டார் போல்... ஹீரோவாக அறிமுகமான டிடிஎஃப் வாசனுக்கு இப்படி ஒரு அடைமொழியா..?

யூடியூபரான டிடிஎஃப் வாசன், சினிமாவில் ஹீரோவாக அறிமுகமாகி இருக்கிறார். அவர் ஹீரோவாக நடித்துள்ள ஐபிஎல் திரைப்படத்தில் அவருக்கு அடைமொழி ஒன்று வைக்கப்பட்டு உள்ளது. அதைப்பற்றி பார்க்கலாம்.

Image Credit : youtube

TTF Vasan Debut as Hero

அதிவேகமாக பைக் ஓட்டுவது, அதில் சாகசம் செய்வது போன்ற வீடியோக்களை பதிவிட்டதன் மூலம் யூடியூப்பில் பிரபலமானவர் தான் டிடிஎஃப் வாசன். இளைஞர்களை சீரழிக்கும் வகையில் அவர் வீடியோ வெளியிடுவதாக கூறி ஏராளமானோர் எதிர்ப்பும் தெரிவித்து வந்தனர். ஒரு கட்டத்தில் அடுத்தடுத்து சர்ச்சைகளில் சிக்கிய வாசன், அதிவேகமாக பைக் ஓட்டி விபத்திலும் சிக்கினார். அதுதொடர்பான வீடியோ காட்சி வெளியான நிலையில், அதை அடிப்படையாக கொண்டு அவர் மீது வழக்கு தொடரப்பட்டது. இதையடுத்து அவரின் ஓட்டுநர் உரிமத்தை 10 ஆண்டுகளுக்கு ரத்து செய்ய நீதிமன்றம் உத்தரவிட்டதோடு, அவரை சிறையில் அடைக்கவும் ஆணையிட்டது.

Image Credit : youtube

ஹீரோவான டிடிஎஃப் வாசன்

பின்னர் சில மாதங்கள் சிறைவாசம் அனுபவித்த டிடிஎஃப் வாசன், வெளியே வந்ததும் சினிமாவில் நடிக்க ஆயத்தமானார். அவர் முதன்முதலில் கமிட்டான படம் மஞ்சள் வீரன். அப்படத்தை செல் அம் என்பவர் இயக்க இருந்தார். ஆனால் சில காரணங்களால் அப்படத்தின் ஷூட்டிங் தொடங்கும் முன்னரே அதிலிருந்து நீக்கப்பட்டார் டிடிஎஃப் வாசன். பின்னர் தான், அப்படத்தின் இயக்குனர் தன்னிடம் பல லட்சம் காசு வாங்கி ஏமாற்றிய விஷயத்தை கூறினார். அவர் தனக்கு துரோகம் செய்துவிட்டதாக தெரிவித்தார். தற்போது மஞ்சள் வீரன் படத்தில் அதன் இயக்குனர் செல் அம் தான் ஹீரோவாக நடிக்கிறார்.

Image Credit : youtube

ஐபிஎல் டீசர்

மஞ்சள் வீரன் படத்தில் இருந்து நீக்கப்பட்ட பின்னர் டிடிஎஃப் வாசன் கமிட்டான படம் தான் ஐபிஎல். இப்படத்தை கருணாநிதி என்பவர் இயக்கி உள்ளார். இப்படத்தில் டிடிஎஃப் வாசனுக்கு ஜோடியாக குஷிதா நடித்துள்ளார். மேலும் கிஷோர், சிங்கம்புலி, அபிராமி, ஆடுகளம் நரேன், ஜான் விஜய், போஸ் வெங்கட், ஜனனி என மிகப்பெரிய நட்சத்திர பட்டாளமே நடித்துள்ள இப்படத்தை ராதா பிலிம் நிறுவனம் சார்பாக மதன் கிருஷ்ணன் தயாரித்துள்ளார். இப்படத்திற்கு அஷ்வின் விநாயகமூர்த்தி இசையமைத்துள்ளார். இப்படத்தின் டீசரை படக்குழு வெளியிட்டிருந்தது. அந்த டீசர் 1 மில்லியனுக்கும் மேல் பார்வைகளை பெற்று யூடியூப்பில் வைரலாகி வருகிறது.

Image Credit : youtube

ரேஸிங் ஸ்டார் டிடிஎஃப்

இந்த நிலையில், அந்த டீசரில் ஒரு முக்கிய விஷயமும் ஒளிந்திருக்கிறது. அது என்னவென்றால், டிடிஎஃப் வாசனுக்கு கொடுக்கப்பட்டுள்ள அடைமொழி தான். அதன்படி அவருக்கு ரேஸிங் ஸ்டார் என்கிற பட்டம் கொடுக்கப்பட்டு இருக்கிறது. ரஜினிக்கு சூப்பர்ஸ்டார், அஜித்துக்கு அல்டிமேட் ஸ்டார், விஜய்க்கு தளபதி போன்ற பட்டங்களெல்லாம் அவர்கள் சினிமாவில் ஒரு உயரத்தை அடைந்த பின்னர் வழங்கப்பட்டது. ஆனால் டிடிஎஃப் வாசன் ஹீரோவாக அறிமுகமான முதல் படத்திலேயே தனக்கென ஒரு அடைமொழி உடன் களமிறங்கி இருப்பது பலரையும் ஆச்சர்யத்தில் ஆழ்த்தி உள்ளது.