Ilaiyaraaja Birthday Special : ஞானதேசிகன் இசைஞானியாக மாறிய கதை! இது வெறும் பெயரல்ல; தமிழர்களின் எமோஷன்!

Ilaiyaraaja Birthday Special : இசைஞானி இளையராஜாவின் பிறந்தநாளான இன்று அவருடைய பெயர் குறித்த சுவாராசிய தகவல்களையும், பிறந்தநாள் மாற்றத்தின் பின்னணி குறித்தும் சுவைபட காண்போம்.

Image Credit : CHATGPT

இளையராஜா எனும் ‘மந்திரச் சொல்’

உலகத் தமிழர்களின் இதய சிம்மாசனத்தில் அரை நூற்றாண்டு காலமாக தன்னிகரில்லாத பேரரசராக வீற்றிருப்பவர் இசைஞானி இளையராஜா. தமிழ், தெலுங்கு, மலையாளம், கன்னடம், இந்தி உள்ளிட்ட பல மொழிகளில் 1,500-க்கும் மேற்பட்ட திரைப்படங்களுக்கு இசையமைத்து, 8000-க்கும் அதிகமான பாடல்களை உருவாக்கி, உலகமெங்கும் ஆயிரக்கணக்கான மேடைக் கச்சேரிகளை நடத்திய பெருமை இவருக்கு உண்டு.

இன்று உலகமே வியந்து பார்க்கும் ‘இளையராஜா’ என்ற மந்திரச் சொல் அவருக்கு எப்படி வந்தது தெரியுமா? அதைப் பற்றி இளையராஜாவே பல்வேறு சுவாரசியமான நிகழ்வுகளில் பகிர்ந்து கொண்ட தகவல்களின் விரிவான தொகுப்பு இதோ!

Image Credit : facebook

தந்தையிட்ட இரு பெயர்கள்

தேனி மாவட்டம் பண்ணைப்புரத்தில் பிறந்த இளையராஜாவின் தந்தை, அவருக்கு இரண்டு பெயர்களைச் சூட்டினார். ஒன்று, ஜாதகத்தைப் பார்த்து வைத்த ‘ஞானதேசிகன்’. மற்றொன்று, பள்ளியில் சேர்க்கும்போது சுருக்கமாகவும் எளிமையாகவும் இருக்க வேண்டும் என்பதற்காக வைத்த ‘ராஜய்யா’ (ராசய்யா) என்ற பெயர். பள்ளிப் பருவத்திலும், ஊரிலும் அனைவரும் அவரை ‘ராஜய்யா’ என்றே அழைத்து வந்தனர்.

Image Credit : Twitter

‘ராஜய்யா’ ‘ராஜா’வாக மாறிய தருணம்

இசை மீது கொண்ட தீராத தாகத்தால், எட்டாம் வகுப்பு வரை மட்டுமே படித்திருந்த ராஜய்யா, கையில் பணமே இல்லாமல் வெற்று நம்பிக்கையை மட்டுமே முதலீடாகக் கொண்டு சென்னைக்கு ரயில் ஏறினார். சென்னைக்குக் கிளம்பும்போது, "பணமில்லாமல் என்ன செய்வாய்?" என்று தாய் கேட்க, "லைட் மியூசிக்கில் வாசிப்பேன், அதுவும் கிடைக்காவிட்டால் பிளாட்பாரத்தில் உட்கார்ந்தாவது ஹார்மோனியம் வாசித்துப் பிழைப்பேன்" என்று தன்னம்பிக்கையோடு கூறிவிட்டு வந்தவர் ராஜா.

சென்னைக்கு வந்தவுடன் மேற்கத்திய இசையைக் கற்றுக்கொள்வதற்காக, தன்ராஜ் மாஸ்டரிடம் சென்றார். அன்றைய காலகட்டத்தில் எம்.எஸ்.விஸ்வநாதன், எஸ்.வி.வெங்கட்ராமன், சி.ஆர்.சுப்பராமன் போன்ற ஆளுமைகளின் இசைக் கலைஞர்களுக்குப் பயிற்சியளித்தவர் தன்ராஜ் மாஸ்டர்.

ராஜய்யாவிடம் மாஸ்டர் பெயரைப் பற்றிக் கேட்க, அவர் ‘ராஜய்யா’ என்று கூறியுள்ளார். அந்தப் பெயர் நன்றாக இல்லை எனக் கருதிய தன்ராஜ் மாஸ்டர், அதைச் சுருக்கி ‘ராஜா’ என்று மாற்றி வைத்தார்.

Image Credit : our own

அன்னக்கிளி தந்த வரலாற்றுப் பெயர்!

திரைத்துறையில் நுழைவதற்கு முன்பு, இளையராஜா ‘கோவர்த்தனன்’ என்ற இசையமைப்பாளருடன் இணைந்து ‘வரப்பிரசாதம்’ என்ற படத்தில் பணியாற்றினார். அதனால், தனது பெயரை ‘கோவர்த்தன் - ராஜா’ என்று போட வேண்டும் என்று நினைத்திருந்தார்.

அதே நேரத்தில், ராஜா கம்போஸ் செய்த பாடல்களைக் கேட்டு வியந்த பிரபல தயாரிப்பாளரும் கதாசிரியருமான பஞ்சு அருணாசலம், அந்தப் பாடல்களுக்காகவே ஒரு கிராமத்துப் பின்னணிக் கதையை உருவாக்கி, ‘அன்னக்கிளி’ (1976) என்ற திரைப்படத்தைத் தயாரித்தார்.

அப்போது ஒரு லாட்ஜ் அறையில் ஹார்மோனியம் கூட இல்லாமல், வெறும் மேஜையின் மீது தாளமிட்டபடி, ‘மச்சான பாத்தீங்களா...’, ‘அன்னக்கிளி உன்ன தேடுதே...’, ‘சுத்தச் சம்பா பச்ச நெல்லு...’ ஆகிய பாடல்களை ராஜா வரிசையாகப் பாடிக்காட்டினார்.

படம் முடிந்து டைட்டிலில் பெயர் போடும் நேரம் வந்தது. ராஜா, பஞ்சு அருணாசலத்திடம், "சார், கோவர்த்தன் - ராஜா என்று பெயர் போடுங்கள்" என்றார். ஆனால் பஞ்சு அருணாசலமோ, "நான் உனக்குத்தான் வேலை தருகிறேன், உனது பெயரை மட்டுமே போடுவோம். ‘ராஜா’ என்றே போடலாம்" என்றார்.

அதற்கு ராஜா, "திரைத்துறையில் ஏற்கனவே புகழ்பெற்ற ‘ஏ.எம். ராஜா’ இருக்கிறார். ‘ராஜா’ என்று போட்டால் ரசிகர்களுக்குக் குழப்பம் ஏற்படும்" என்று கூறி, தங்களின் குழுவான ‘பாவலர் பிரதர்ஸ்’ (பாவலர் சகோதரர்கள்) என்ற பெயரைப் பரிந்துரைத்தார். ஆனால், அது பழைய பாணியில் இருப்பதாகக் கூறி பஞ்சு அருணாசலம் மறுத்துவிட்டார்.

இறுதியாக, "ஏற்கனவே ஒரு பெரிய ராஜா இருக்கிறார்; நீ வயதில் சிறியவன், அதனால் உனக்கு ‘இளையராஜா’ என்று பெயர் வைக்கிறேன்" என்று பஞ்சு அருணாசலம் அறிவித்தார். "சரி, போனால் போகிறது, நீங்கள் எப்படி வேண்டுமானாலும் கூப்பிட்டுக் கொள்ளுங்கள்" என்று இளையராஜாவும் அதை ஏற்றுக்கொண்டார். அதுவே, காலத்தால் அழியாத வரலாற்றுப் பெயராக நிலைத்து நின்றது.

Image Credit : our own

ஆன்மீகத் திருப்புமுனையும் இசையும்

1974-ல் உதவி இசையமைப்பாளராக இருந்தபோது, கடவுள் நம்பிக்கையற்றவராக இருந்த இளையராஜா, கொல்லூர் மூகாம்பிகை கோயிலுக்குச் சென்றார். அங்கு முதல் அடி எடுத்து வைத்தபோதே, நெஞ்சில் ஒரு மின்னல் தாக்கியது போன்ற உணர்வைப் பெற்று ஆன்மீகப் பாதைக்குத் திரும்பினார். "எனது இசை செவியோடு போவது கிடையாது, அது உள்ளே இறங்கி நெஞ்சைத் தைக்கும்; எனது பாடல்கள் அனைத்துமே ஒரு வகையில் பக்திப் பாடல்கள்தான். இசைதான் ஆன்மீகம், ஆன்மீகம்தான் இசை" என்பது அவரது அசைக்க முடியாத தத்துவமாகும்.

Image Credit : our own

பிறந்தநாள் மாற்றத்தின் பின்னணி

இளையராஜா பிறந்தது 1943, ஜூன் 3 ஆம் தேதி ஆகும். தமிழக முன்னாள் முதல்வர் மு.கருணாநிதியின் பிறந்தநாளும் அதே ஜூன் 3 தான். கருணாநிதி தமிழ் மொழிக்கு ஆற்றிய மாபெரும் பணிக்கு மரியாதை செலுத்தும் விதமாகவும், ஒரே நாளில் இரண்டு பெரிய கொண்டாட்டங்கள் வேண்டாம் என்பதற்காகவும், இளையராஜா தனது பிறந்தநாளை ஒரு நாள் முன்னதாக, அதாவது ஜூன் 2 ஆம் தேதியே கொண்டாட முடிவு செய்தார். இளையராஜாவுக்குப் புகழ்பெற்ற ‘இசைஞானி’ என்ற பட்டத்தை வழங்கியவர் கருணாநிதி என்பது குறிப்பிடத்தக்கது. அதேபோல, லண்டனின் ராயல் ஃபில்ஹார்மோனிக் ஆர்கெஸ்ட்ரா இவருக்கு ‘மேஸ்ட்ரோ’ என்ற சர்வதேச அங்கீகாரப் பட்டத்தையும் வழங்கியது.

வறுமை மற்றும் எளிய பின்னணியில் இருந்து வந்து, பெயர்கள் பல மாறி, தன் அசாத்திய தன்னம்பிக்கையாலும், உழைப்பாலும் இன்று உலகத் தமிழர்களின் ஆன்மாவோடு கலந்திருக்கும் இசைப்பேரரசு இளையராஜா!