GP Muthu: ஃபர்ஸ்ட் கார், செகண்ட் மூவி, அப்புறம் ஹோம் டூர்: புது வீட்டில் பால் காய்ச்சிய ஜிபி முத்து!

புதிய வீடு கட்டியுள்ள ஜிபி முத்து பிரபலங்கள் யாரையும் அழைக்காமல் வீட்டிற்கு பால் காய்ச்சியுள்ளார்.  

கடந்த 1985 ஆம் ஆண்டு மார்ச் 29 ஆம் தேதி தூத்துக்குடி மாவட்டம் உடன்குடியில் கணேசன் என்பவருக்கு மகனாக பிறந்தார். பேச்சிமுத்து என்ற தனது பெயரை ஜிபி முத்து என்று மாற்றிக் கொண்டார்.

கடந்த 2010 ஆம் ஆண்டு அஜிதா என்பவரை ஜிபி முத்து திருமணம் செய்து கொண்டார். இவர்களுக்கு மனு, விஷ்ணு, நித்யா மற்றும் முத்து என்று 2 மகன், 2 மகள்கள் இருக்கின்றனர்.

யூடியூப் மற்றும் டிக்டாக்கில் பிரபலமாவதற்கு முன்னதாக தந்தையின் நகைக்கடையில் வேலை செய்துள்ளார். அந்த தொழில் தோல்வியாக, கார்பெண்டர் வேலை செய்து வந்தார். கொரோனா காலகட்டத்தில் இந்த தொழிலும் பாதிக்கப்பட்டது.

கடந்த 2020 ஆம் ஆண்டு டிக்டாக் மூலம் 15 முதல் 20 வீடியோக்களை வெளியிட்டு வந்தார். ரௌடி பேபி சூர்யாவுடன் இணைந்து பல பாடல்களுக்கு டான்ஸ் ஆடி டிக்டாக் செய்திருந்தார். அது போன்று பல வீடியோக்களை வெளியிட்டிருந்தார். எத்தனை எத்தனையோ விமர்சனங்கள், கேலி, கிண்டல்கள் வந்தாலும் அதைப் பற்றியெல்லாம் கவலைப்படாமல் தொடர்ந்து வீடியோக்களை மட்டுமே வெளியிட்டு வந்தார்.

ஒரு கட்டத்தில் டிக்டாக்கிற்கு தடை விதிக்கப்பட்ட நிலையில், வீடியோ வெளியிட முடியாமல் மன அழுத்தத்திற்கு உள்ளாகி மருத்துவமனையில் சிகிச்சை பெற்று வந்தார். அதன் பிறகு கடந்த 2021 ஆம் ஆண்டு என்ன வாழ்க்க டா என்ற தமிழ் பாடலில் நடித்திருந்தார்.

இந்த ஆண்டு முதலில் ஹூண்டாய் வேரியண்டில் புதிய கார் ஒன்று வாங்கினார். தற்போது ஒளிபரப்பாகி வரும் பிக்பாஸ் தமிழ் சீசன் 6 நிகழ்ச்சியில் முதல் போட்டியாளராக கலந்து கொண்டு ரசிகர்களை வியக்க வைத்தார். அதோடு, முதல் நாளில் அவர் மட்டுமே தனியாக இருந்த போது நடந்த சம்பவங்கள் பார்த்தவர்களை ரசிக்க வைத்தது என்றே சொல்லலாம்.

ஆனால், இந்நிகழ்ச்சியிலிருந்து பாதியிலேயே வெளியேறினார். அதன் பிறகு ஓ மை கோஸ்ட் படத்தின் புர்மோஷன் நிகழ்ச்சியில் சன்னி லியோன் உடன் இணைந்து டான்ஸ் ஆடியிருந்தார். டிக் டாக், யூடியூப் மூலமாக ஏகப்பட்ட வெளிநாட்டு ரசிகர்களையும் கவர்ந்துள்ளார்.

இந்த நிலையில், தற்போது ஜிபி முத்து புதிதாக வீடு ஒன்றை கட்டியுள்ளார். நேரமும், காலமும் இல்லாத நிலையில், பிரபலங்களுக்கும் அழைப்பில்லாமல் அவசர அவசரமாக வீட்டில் பால் காய்ச்சியுள்ளார்.

மின்சார அடுப்பில் பால் காய்ச்சி ஹாலில் வைத்து பூஜை போடப்பட்டுள்ளது.

சாமி படைத்த பிறகு குடும்பத்துடன் பூஜை செய்கிறார். அப்புறம் என்ன மகன், மகள்களுக்கு இனிப்பு ஊட்டி விடுகிறார். ஜிபி முத்துவின் வீடானது 2 ரூம், ஒரு கிச்சன் மற்றும் ஒரு ஹால் கொண்டதாக கட்டப்பட்டுள்ளது என்பது குறிப்பிடத்தக்கது.