'பெருமைப்படுகிறேன் தியா' மகளின் திறமையை கண்டு மெய் சிலிர்க்கும் சூர்யா, ஜோதிகா ஜோடி

தமிழ் சினிமாவின் ஸ்டார் ஜோடியான சூர்யா, ஜோதிகா இணை இன்றளவும் தங்களை பிசியாக வைத்துக்கொண்டு உள்ளனர். தனிப்பட்ட வாழ்க்கை முறை மற்றும் தொழில் வாழ்க்கையிலும் இருவரும் இன்றளவும் ஜொலித்துக் கொண்டு தான் இருக்கின்றனர். இவர்களுக்கு தியா என்ற மகளும், தேவ் என்ற மகனும் உள்ளனர். மகன் தேவ் பள்ளி அளவில் நடைபெற்ற தற்காப்பு கலைக்கான போட்டி ஒன்றில் வெற்றி பெற்றதை அண்மையில் இணையதளத்தில் பகிர்ந்து தந்தை சூர்யா பாராட்டி இருந்தார்.

இந்நிலையில் தற்போது மகள் தியா ஆவணப்படம் ஒன்றை இயக்கி உள்ளார். மேலும் அப்படத்திற்கு விருதும் வழங்கப்பட்டுள்ள நிலையில், இதனை அவரது தாயாரும், நடிகையுமான ஜோதிகா இன்ஸ்டாகிராம் பக்கத்தில் பெருமையுடன் பகிர்ந்து வாழ்த்து தெரிவித்துள்ளார். தியார் சூர்யா தனது பள்ளியில் நடைபெற்ற போட்டிக்காக லீடிங் லைட் என்ற ஆவணப்படம் ஒன்றினை எடுத்து விருது பெற்றுள்ளார். 

இது தொடர்பாக நடிகை ஜோதிகா வெளியிட்டுள்ள சமூக வலைதளப்பதிவில், “திரைத்துறையில் ஒளிப்பதிவு தொடர்பான பணிகளில் ஈடுபடும் பெண்களுக்கு ஏற்படும் நிகழ்வுகளை ஆவணப்படமாக தயாரித்ததற்கு பெருமைப்படுகிறேன் தியா. இதே போன்று தொடர்ந்து செயல்படு. இதுபோன்ற சம்பவங்களில் வெளிச்சம் பாய்ச்சியதற்கு நன்றி” என்று குறிப்பிட்டுள்ளார்.

தாய், தந்தையர் திரைத்துறையில் நடிகர்களாக பிசியாக உள்ள நிலையில், சினிமாவை பொழுதுபேக்கு தளமாக மட்டும் அல்லாமல் ஆவணங்களான இடமாகவும் பயன்படுத்தி உள்ளதற்கு தியாவுக்கு பலரும் பாராட்டுகளை தெரிவித்து வருகின்றனர்.