ஆஸ்கரில் புது வரலாறு படைத்த சிங்கப்பெண்... ‘சின்னர்ஸ்’ ஒளிப்பதிவாளர் ஆகபாவ்-வின் மெர்சல் சாதனை பற்றி தெரியுமா?

'சின்னர்ஸ்' படத்திற்காக சிறந்த ஒளிப்பதிவாளர் விருதை வென்ற ஆகபாவ், ஆஸ்கர் வரலாற்றில் இந்த விருதை வெல்லும் முதல் பெண் மற்றும் முதல் கறுப்பினப் பெண் என்ற இரட்டை சாதனையை அவர் படைத்துள்ளார்.

Image Credit : X

Autumn Durald Arkapaw Record in Oscars

98வது ஆஸ்கர் விருது வழங்கும் விழாவில், 'சின்னர்ஸ்' என்ற சூப்பர்நேச்சுரல் ஹாரர்-த்ரில்லர் திரைப்படம் தொடர்ந்து விருதுகளைக் குவித்து சாதனை படைத்துள்ளது. சிறந்த நடிகர், சிறந்த திரைக்கதை, சிறந்த ஒரிஜினல் ஸ்கோர், சிறந்த ஒளிப்பதிவு ஆகிய விருதுகளை வென்ற இந்தப் படம், இப்போது மேலும் ஒரு பெரிய பெருமையை பெற்றுள்ளது.

இந்த படத்தின் ஒளிப்பதிவாளர் ஆட்டம் டரால்டு ஆகபாவ் (Autumn Durald Arkapaw), சிறந்த ஒளிப்பதிவுக்கான ஆஸ்கர் விருதை வென்று, விருது விழாவில் புதிய வரலாறு படைத்துள்ளார். இந்த வெற்றியின் மூலம், ஆஸ்கர் வரலாற்றில் இந்த பிரிவில் விருது வென்ற முதல் பெண் என்ற சாதனையை அவர் படைத்துள்ளார். பிலிப்பைன்ஸ் மற்றும் ஆப்பிரிக்க அமெரிக்க கிரியோல் வம்சாவளியைச் சேர்ந்த ஆகபாவ், இந்த வத்தைப் பெறும் முதல் கறுப்பினப் பெண் என்பதும் குறிப்பிடத்தக்கது.

Image Credit : X

ஆகபாவ் சாதனை

2018-ல் 'Mudbound' படத்திற்காக ரேச்சல் மோரிசன், 2021-ல் 'The Power of the Dog' படத்திற்காக ஆரி வெக்னர், மற்றும் 2022-ல் 'Elvis' படத்திற்காக மாண்டி வாக்கர் ஆகியோர் பரிந்துரைக்கப்பட்டிருந்தனர். 'சின்னர்ஸ்' படத்தில் பணியாற்றியபோது ஆகபாவ் மற்றொரு சாதனையையும் படைத்தார். IMAX 65mm மற்றும் Ultra Panavision கேமராக்களைப் பயன்படுத்தி ஒரு திரைப்படத்தை படமாக்கிய முதல் பெண் ஒளிப்பதிவாளர் என்ற பெருமையையும் அவர் பெற்றார்.

விருதை பெற்றுக்கொண்டபோது பேசிய ஆகபாவ், திரைப்படத்துறையில் உள்ள மற்ற பெண்களுக்கு நன்றி தெரிவித்தார். குறிப்பாக, ஒளிப்பதிவாளர் ரேச்சல் மோரிசனை அவர் குறிப்பிட்டுப் பேசினார். "இந்த விருது விழாவின் போது சக பெண்களிடமிருந்து நான் மிகுந்த அன்பை உணர்ந்தேன். பலரை சந்திக்க வாய்ப்பு கிடைத்தது. உங்களால் தான் இது போன்ற தருணங்கள் சாத்தியமாகின்றன. அதற்காக நான் உங்களுக்கு நன்றி சொல்ல விரும்புகிறேன்," என்று அவர் கூறினார்.

Image Credit : X

ஆஸ்கர் விருது விழா

ஆஸ்கர் விருதுக்கு முன்பு, பாஃப்டா (BAFTA) விருதுகள், பிரிட்டிஷ் சொசைட்டி ஆஃப் சினிமாட்டோகிராஃபர்ஸ் மற்றும் அமெரிக்கன் சொசைட்டி ஆஃப் சினிமாட்டோகிராஃபர்ஸ் விருதுகளுக்கும் ஆகபாவ் பரிந்துரைக்கப்பட்டிருந்தார். ஆனால், ஆஸ்கர் இரவுக்கு முன்பு அந்த விருதுகள் எதையும் அவர் வெல்லவில்லை. ஆஸ்கர் விழாவில், 'Train Dreams' படத்திற்காக அடோல்ஃபோ வெலோசோ, 'One Battle After Another' படத்திற்காக மைக்கேல் பாமன், 'Frankenstein' படத்திற்காக டான் லாஸ்ட்ஸன், மற்றும் 'Marty Supreme' படத்திற்காக டேரியஸ் கோண்ட்ஜி ஆகியோருடன் அவர் பரிந்துரைக்கப்பட்டிருந்தார்.

இயக்குநர் ரியான் கூக்லருடன் ஆகபாவ் பணியாற்றும் இரண்டாவது படம் 'சின்னர்ஸ்' ஆகும். இருவரும் இதற்கு முன்பு 'Black Panther: Wakanda Forever' படத்தில் இணைந்து பணியாற்றியுள்ளனர்.

Image Credit : X

16 பிரிவுகளில் பரிந்துரை

'சின்னர்ஸ்' திரைப்படம் சிறந்த படம், இயக்குநர், சிறந்த நடிகர் (மைக்கேல் பி. ஜோர்டான்), சிறந்த துணை நடிகை (வுன்மி மொசாகு), சிறந்த துணை நடிகர் (டெல்ராய் லிண்டோ), சிறந்த திரைக்கதை, காஸ்டிங், தயாரிப்பு வடிவமைப்பு, ஒளிப்பதிவு, ஆடை வடிவமைப்பு, படத்தொகுப்பு, ஒப்பனை மற்றும் சிகை அலங்காரம், ஒலி, விஷுவல் எஃபெக்ட்ஸ், சிறந்த பின்னணி இசை மற்றும் "I Lied to You" என்ற சிறந்த பாடல் உட்பட மொத்தம் 16 பிரிவுகளில் ஆஸ்கருக்கு பரிந்துரைக்கப்பட்டு வரலாறு படைத்திருந்தது குறிப்பிடத்தக்கது.