Namitha : பிறந்தநாளன்று கர்ப்பமாக இருப்பதை அறிவித்த நமீதா - குவியும் வாழ்த்துக்கள்

குஜராத்தை பூர்வீகமாக கொண்டவர் நமீதா. மாடலிங் துறையில் சிறந்து விளங்கி வந்த இவர், கடந்த 2003-ம் ஆண்டு விஜயகாந்த் நடிப்பில் வெளியான எங்கள் அண்ணா படம் மூலம் நடிகையாக அறிமுகமானார். இதையடுத்து ஏய், இங்கிலீஷ்காரன், பம்பர கண்ணாலே, கோவை பிரதர்ஸ், நான் அவன் இல்லை போன்ற படங்களில் கிளாமர் ரோல்களில் நடித்ததன் மூலம் கவர்ச்சி நடிகையாக வலம் வந்தார்.

இவருக்கு திருப்புமுனையாக அமைந்த படம் பில்லா. இவர் தமிழைப்போல் இந்தி, தெலுங்கு, கன்னடம் போன்ற பிறமொழி படங்களிலும் நடித்துள்ளார். உடல் எடை கூடியதன் காரணமாக பட வாய்ப்புகளை இழந்த நமீதா, சின்னத்திரை நடன நிகழ்ச்சிகளில் நடுவராகவும் பங்கேற்று வந்தார். பிக்பாஸ் நிகழ்ச்சியின் முதல் சீசனிலும் பங்கேற்றுள்ளார்.

இவ்வாறு மக்கள் மத்தியில் பிரபலமான நமீதா, சமீப காலமான அரசியலில் ஆர்வம் காட்டத் தொடங்கினார். கடந்த 2016-ம் ஆண்டு அப்போதைய முதல்வர் ஜெயலலிதா முன்னிலையில் அதிமுக-வில் இணைந்த நமீதா, அக்கட்சியின் நட்சத்திர பேச்சாளராக வலம் வந்தார். இதையடுத்து கடந்த 2019-ம் ஆண்டு பாஜக-வில் இணைந்த நமீதா, அதில் முக்கிய பொறுப்பு வகித்து வருகிறார்.

நடிகர் வீரா என்பவரை கடந்த 2017-ம் ஆண்டு காதலித்து திருமணம் செய்துகொண்டார் நமீதா, திருமணத்துக்கு பின்னர் உடல் எடை அதிகரித்ததால் படங்களில் நடிப்பதை குறைத்துக்கொண்ட அவர், குடும்பத்தை கவனித்து வந்தார். இன்று 41-வது பிறந்தநாள் கொண்டாடும் நமீதாவுக்கு வாழ்த்துக்கள் குவிந்த வண்ணம் உள்ளன.

இந்நிலையில், பிறந்தநாளன்று முக்கிய அறிவிப்பை வெளியிட்டுள்ளார் நமீதா. அதன்படி, தான் கர்ப்பமாக இருப்பதாக அறிவித்துள்ள அவர், தாய்மை எனும் புதிய அத்தியாயத்தை தொடங்கி உள்ளதாக நெகிழ்ச்சியுடன் பதிவிட்டுள்ளார். மேலும் கர்ப்பமான வயிற்றுடன் எடுத்த புகைப்படங்களை ஷேர் செய்துள்ளார். இதைப்பார்த்த ரசிகர்கள் அவருக்கு வாழ்த்துக்களை தெரிவித்து வருகின்றனர்.

இதையும் படியுங்கள்... Ira Khan Birthday : பிகினி உடையில் பிறந்தநாள் கொண்டாடிய அமீர்கான் மகள்... வைரலாகும் பர்த்டே கிளிக்ஸ்