“வில்லனா நடிச்சாலும் நீங்க கிரேட் சார்”... ஏழைகளுக்கு உதவுவதற்காக யாரும் செய்யாத காரியத்தை செய்த சோனு சூட்...!

விவசாயி ஒருவர் தனது நிலத்தை உழுவதற்கு காளை மாடுகளை வாடகைக்கு எடுக்க கூட பணம் இல்லாமல் இரண்டு மகள்களை ஏரில் பூட்டி உழுத நிலையில் அடுத்த நாளே அவருக்கு டிராக்டர் வாங்கிக் கொடுத்தார். 

சாப்ட்வேர் இன்ஜினியர் பணியை இழந்து காய்கறி வியாபாரம் செய்த இளம்பெண்ணுக்கு அடுத்த நாளே சாப்ட்வேர் இன்ஜினியர் பணி வாங்கி கொடுத்தார். 
 

ரஷ்யாவில் மருத்துவம் படித்து வந்த தமிழக மாணவர்கள் 900க்கும் மேற்பட்டோர் சொந்த ஊர் திரும்ப விமானம் ஏற்பாடு செய்து கொடுத்தார். 

ஹரியானா மாநிலத்தில் செல்போன் சிக்னல் கிடைக்காததால் மாணவி ஒருவர் மரத்தின் மீதேறி கல்வி பயிலும் வீடியோவை பார்த்த சோனு சூட், தனது சொந்த செலவில் செல்போன் டவர் கட்டிக் கொடுத்தார். 

தற்போது வரை சோனு சூட்டிற்கு சோசியல் மீடியா மூலமாக ஆயிரக்கணக்கான மக்கள் உதவி கேட்டு வருகின்றனர். அவர்களுக்கு அடுத்தடுத்து உதவிக்கரம் நீட்டி வரும் சோனு சூட்டிற்கு பொருளாதார நெருக்கடி ஏற்பட்டுள்ளது. 

ஆம்... அடுத்தடுத்து உதவி கேட்போருக்கு கொடுப்பதற்காக தனது பெயரிலும், மனைவி சோனாலி பெயரிலும் உள்ள 2 கடைகள் 6 குடியிருப்புகள் என மொத்தம் 8 சொத்துக்களை 10 கோடிக்கு அடமானம் வைத்துள்ளார். 

அதுமட்டுமின்றி மும்பையில் செயல்படும் இன்டர்நேஷனல் வங்கி ஒன்றில் சுமார் 10 கோடிக்கு லோன் வாங்க செப்டம்பர் 15ம் தேதி ஒப்பந்தத்தில் கையெழுத்திட்டு, நவம்பர் 24ம் தேதி பதிவு செய்துள்ளதாகவும் நேஷனல் மீடியாக்கள் பலவற்றிலும் செய்தி பரவி வருகிறது. 

சினிமாவில் முரட்டு வில்லனாக நடித்தாலும் கோடிகளை கொட்டி வைத்துக் கொண்டு கொடுக்க மனமில்லாதவர்கள் எங்கே?... அய்யோ கேட்பவருக்கு உதவ முடியவில்லையே என சொத்துக்களை அடகு வைக்கும் சோனு சூட் எங்கே? என சோசியல் மீடியாவில் பாராட்டு மழை பொழிந்து வருகிறது.