- Home
- Business
- FASTag Annual Pass: இனி வெறும் ரூ.1500 தான்..! 1ம் தேதி முதல் புதிய விதி.. யாருக்கெல்லாம் தெரியுமா?
FASTag Annual Pass: இனி வெறும் ரூ.1500 தான்..! 1ம் தேதி முதல் புதிய விதி.. யாருக்கெல்லாம் தெரியுமா?
தேசிய நெடுஞ்சாலைகளில் FASTag வருடாந்திர கட்டணம் ரூ.3075ஆக உள்ள நிலையில், தற்போது தகுதி உடைய பயனாளர்கள் இதனை ரூ.1500க்கு பெற்றுக் கொள்ளும் வகையில் விதிமுறைகளில் திருத்தம் செய்யப்பட்டுள்ளது.
நவம்பர் 1 முதல் அமலுக்கு வரும் புதிய விதிகள்
தேசிய நெடுஞ்சாலைகளில் உள்ள சுங்கச்சாவடிகளைக் கடந்து அடிக்கடி பயணம் செய்யும் வாகன உரிமையாளர்களுக்கு பலன் அளிக்கும் வகையில் புதிய அதிரடி மாற்றம் கொண்டுவரப்பட்டுள்ளது. மத்திய சாலைப் போக்குவரத்து மற்றும் நெடுஞ்சாலைத் துறை அமைச்சகம், அக்டோபர் 26, 2026 அன்று இதற்கான அறிவிக்கையை வெளியிட்டுள்ளது.
தேசிய நெடுஞ்சாலைக் கட்டண நிர்ணயம் மற்றும் வசூல் விதிகள், 2008-இல் ஐந்தாவது திருத்தமாக இந்தப் புதிய விதிகள் அறிவிக்கப்பட்டுள்ளன. இதன்படி, குறிப்பிட்ட சுங்கச்சாவடிக்கு அருகில் வசிக்கும் தகுதியான தனியார் வாகன உரிமையாளர்கள் ஆண்டுக் கட்டணம் செலுத்தி சலுகை பாஸ் பெறலாம்.
ஆண்டு பாஸ் கட்டணம் எவ்வளவு?
சுங்கச்சாவடி அமைந்துள்ள இடத்தைப் பொறுத்து ஆண்டு பாஸ் கட்டணம் மாறுபடும்.
• நகராட்சி அல்லது உள்ளாட்சி எல்லைக்கு வெளியே: ஆண்டுக்கு ரூ.1,500.
• நகராட்சி அல்லது உள்ளாட்சி எல்லைக்குள்: ஆண்டுக்கு ரூ.3,000.
இந்தக் கட்டணங்கள் நவம்பர் 1, 2026 முதல் அமலுக்கு வரும் என அறிவிக்கப்பட்டுள்ளது. இருப்பினும், அறிவிக்கையில் குறிப்பிடப்பட்டுள்ள பிற தகுதி மற்றும் பயன்பாட்டு நிபந்தனைகளையும் பூர்த்தி செய்ய வேண்டும்.
யாரெல்லாம் இந்தப் பாஸ் பெறலாம்?
இந்தச் சலுகையைப் பெறுவதற்கு சில முக்கிய நிபந்தனைகள் உள்ளன.
• சுங்கச்சாவடியில் இருந்து 20 கி.மீ. சுற்றளவுக்குள் வசிப்பவராக இருக்க வேண்டும்.
• வாகனம் வணிகப் பயன்பாட்டுக்கானதாக இருக்கக் கூடாது.
• வாகனத்தில் செல்லுபடியாகும், முறையாகச் செயல்படும் ஃபாஸ்டேக் (FASTag) இருக்க வேண்டும்.
• சம்பந்தப்பட்ட சுங்கச்சாவடிக்கும் வாகனத்துக்கும் பொருந்தும் அரசு விதிகளைப் பூர்த்தி செய்ய வேண்டும்.
முக்கியமாக, இந்த ஆண்டு பாஸ் குறிப்பிட்ட ஒரு சுங்கச்சாவடிக்கு மட்டுமே செல்லுபடியாகும். இதைப் பயன்படுத்தி நாடு முழுவதும் உள்ள அனைத்து சுங்கச்சாவடிகளையும் கட்டணமின்றி கடக்க முடியாது.
📢 Live Within 20 km of a Toll Plaza? Know the New Local Pass Rules!
The Government of India has introduced a Concessional Local Pass for eligible private vehicle owners residing within 20 km of a National Highway fee plaza, effective 1 November 2026, under the National Highways Fee (Determination of Rates and Collection) (Fifth Amendment) Rules, 2026.
Eligible vehicle owners with valid, functional FASTags registered for non-commercial use can opt for an annual pass for the specific toll plaza at the following rates:
🛣️ ₹1,500 per annum for toll plazas outside municipal or local town limits.
🏙️ ₹3,000 per annum for toll plazas within municipal or local town limits.
The pass is subject to specified conditions. It will not be available on National Highways or Expressways using a closed user fee collection system, or where a service road or alternative road is available for use.
📄 Read the official notification for complete details: https://t.co/khgErWhgtT
@PMOIndia @MORTHIndia @PIBMoRTH #NHAI #BuildingANation
— NHAI (@NHAI_Official) October 27, 2026
20 கி.மீ. தூரத்தில் வசித்தாலும் சலுகை கிடைக்காதா?
ஆம். சுங்கச்சாவடியில் இருந்து 20 கி.மீ. சுற்றளவுக்குள் வசிப்பது மட்டுமே இந்தச் சலுகையைப் பெறுவதற்குப் போதுமான தகுதி அல்ல.
தேசிய நெடுஞ்சாலைகள் அல்லது விரைவுச்சாலைகளில், குறிப்பிட்ட மூடப்பட்ட பயனர் கட்டண வசூல் முறையின் (Closed User Fee Collection System) கீழ் சுங்கக் கட்டணம் வசூலிக்கப்படும் இடங்களில் இந்தச் சலுகை பொருந்தாது.
மேலும், சேவைச் சாலை (Service Road) அல்லது மாற்றுப் பாதை (Alternative Route) பயன்பாட்டுக்கு இருக்கும் இடங்களிலும் இந்தச் சலுகை கிடைக்காது என அறிவிக்கப்பட்டுள்ளது.
வாகன உரிமையாளர்கள் கவனிக்க வேண்டியது என்ன?
அருகிலுள்ள சுங்கச்சாவடியைத் தொடர்ந்து பயன்படுத்தும் வாகன உரிமையாளர்கள், தங்கள் வாகனம் மற்றும் சம்பந்தப்பட்ட சுங்கச்சாவடி புதிய விதிகளுக்கு உட்படுகிறதா என்பதை உறுதிப்படுத்திக் கொள்ள வேண்டும். ஃபாஸ்டேக் செல்லுபடியாகவும் செயல்பாட்டிலும் இருக்க வேண்டும்; வாகனம் வணிகப் பயன்பாட்டுக்கானதாக இருக்கக் கூடாது.
முக்கியமாக, நவம்பர் 1 முதல் இந்த வசதி கிடைக்கும் என்றாலும், அனைவருக்கும் தானாகவே பாஸ் வழங்கப்படாது. சுங்கச்சாவடியின் அமைவிடம், மாற்றுப் பாதை வசதி மற்றும் பிற தகுதி நிபந்தனைகளைச் சரிபார்த்த பிறகே சலுகை பெற முடியும்.
எனவே, அடிக்கடி சுங்கச்சாவடியைக் கடக்கும் வாகன உரிமையாளர்கள், ஆண்டு பாஸ் பெறுவதற்கு முன் சம்பந்தப்பட்ட சுங்கச்சாவடி அல்லது தேசிய நெடுஞ்சாலைத் துறையிடம் நடைமுறையில் உள்ள விதிகளை உறுதிப்படுத்திக் கொள்வது நல்லது.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
