- Home
- Business
- 40% முதல் 60% ஐடி வேலைகள் காலி? ஏ.ஐ சகாப்தத்தில் தப்பிக்கப் போகும் 'டாப்' ஸ்கில்ஸ் என்னென்ன?
40% முதல் 60% ஐடி வேலைகள் காலி? ஏ.ஐ சகாப்தத்தில் தப்பிக்கப் போகும் 'டாப்' ஸ்கில்ஸ் என்னென்ன?
2026-ஆம் ஆண்டில் இந்திய ஐடி துறை ஏ.ஐ தொழில்நுட்பத்தின் அசுர வளர்ச்சியால் மிகப்பெரிய கட்டமைப்பு மாற்றத்தைச் சந்தித்து வருகிறது. வழக்கமான திறன்கள் மதிப்பிழந்து, புதிய தொழில்நுட்பப் பணிகளுக்கான தேவை வேகமாக அதிகரித்து வருகிறது.
ஐடி துறை வேலைவாய்ப்பு
சர்வதேச அளவில் முன்னணி தொழில்நுட்ப நிறுவனங்களில் தொடர்ச்சியாக அறிவிக்கப்படும் பணிநீக்கங்கள் அடிக்கடி தலைப்புச் செய்திகளாகி வரும் நிலையில், 2026-ஆம் ஆண்டில் இந்திய ஐடி துறை ஒரு மிகப்பெரிய கட்டமைப்பு மாற்றத்தைச் சந்தித்து வருகிறது. இந்த மாற்றம் வழக்கமான பொருளாதாரச் சுழற்சியால் ஏற்படுவது அல்ல. ஏ.ஐ தொழில்நுட்பத்தின் அசுர வளர்ச்சியால் பழைய வேலைகளும், வழக்கமான திறன்களும் மதிப்பிழந்து புதிய பணிகளுக்கான தேவை உருவாகி வருவதன் வெளிப்பாடாகும். ஏ.ஐ தொழில்நுட்பமானது சில பணிகளை முற்றிலுமாக ஒழிப்பதுடன் நிற்காமல், நிறுவனங்கள் வழங்கி வந்த வழக்கமான ஐடி சேவைகளின் தேவையையே மாற்றி அமைத்து, அவற்றின் ஒட்டுமொத்த வணிக மாதிரியையும் மாற்ற வேண்டிய கட்டாயத்தை ஏற்படுத்தியுள்ளது.
இதன் எதிரொலியாக நடப்பு நிதியாண்டில் புதிய வேலைவாய்ப்புகள் மந்தமாகவே இருக்கும் என்றும், நிறுவனத்தை விட்டு விலகும் ஊழியர்களின் இடங்களை உடனடியாக நிரப்புவதற்குப் பதிலாகத் தேவையான திறன்களுக்கு மட்டுமே முன்னுரிமை அளிக்கப்படும் என்றும் கணிக்கப்பட்டுள்ளது. குறிப்பாக, நடுத்தரப் பதவிகளிலும் வழக்கமான பணிகளிலும் உள்ள ஆட்குறைப்பைச் செய்யும் நிறுவனங்கள், அதே நேரத்தில் திறமையான ஃப்ரெஷ்ஷர்களையும் ஏஐ துறை சார்ந்த வல்லுநர்களையும் பணியமர்த்துவதில் தீவிரம் காட்டி வருகின்றன.
மறைமுக பணிநீக்கங்களும் தற்போதைய சூழலும்
இந்தியத் தகவல் தொழில்நுட்பத் துறையைப் பொறுத்தவரை ஒரு நிம்மதியான விஷயம் என்னவென்றால், ஆயிரக்கணக்கானோரை ஒரே நேரத்தில் வேலையிலிருந்து தூக்கும் பொதுவான பணிநீக்க நடவடிக்கைகள் முடிவுக்கு வந்துவிட்டன. ஆனால், குறிப்பிட்ட சில பணிகளை மட்டும் குறிவைத்து வெளியேற்றுவது, கட்டமைப்பு மாற்றங்கள் காரணமாக சில பொறுப்புகளை ரத்து செய்வது போன்ற மறைமுக நடவடிக்கைகள் தொடர்ந்து கொண்டேதான் இருக்கின்றன.
இதுகுறித்து 'டீம்லீஸ் டிஜிட்டல்' (TeamLease Digital) நிறுவனத்தின் தலைமை நிர்வாக அதிகாரி நீதி சர்மா கூறுகையில், முன்பு போல் ஊடகங்களில் தலைப்புச் செய்தியாகும் பிரமாண்ட பணிநீக்கங்கள் இப்போது குறைந்துவிட்டன. ஆனால், செயல்திறன் மதிப்பீடுகளைக் கடுமையாக்குவது, நடுத்தர மேலாண்மைப் பிரிவைக் குறைப்பது, விலகியவர்களின் இடங்களை மெதுவாக நிரப்புவது போன்ற நடவடிக்கைகள் தொடர்கின்றன. இந்தியாவின் டாப் 5 ஐடி நிறுவனங்கள் 2025-ஆம் நிதியாண்டில் சுமார் 12,700 ஊழியர்களைச் சேர்த்த நிலையில், 2026-ஆம் நிதியாண்டில் அவற்றின் ஒட்டுமொத்த ஊழியர் எண்ணிக்கை கிட்டத்தட்ட 7,000 குறைந்துள்ளது, என்று தெரிவித்தார்.
உற்பத்தித் திறனை அதிகரிக்கும் புதிய உத்திகள்
தொழில்நுட்பப் பணியமர்த்தல் நிறுவனமான 'எக்ஸ்பெனோ'வின் (Xpheno) இணை நிறுவனர் அனில் எத்தனூர் இதுபற்றிக் குறிப்பிடுகையில், பெருந்தொற்றுக்குப் பிந்தைய அதீத தேவையால் நிறுவனங்கள் அளவுக்கு அதிகமாக ஆட்களைச் சேர்த்தன என்றும், அதைச் சரிசெய்யவே 2022, 2023-ல் கடுமையான ஆட்குறைப்பு நடத்தப்பட்டது என்றும் தெரிவிக்கிறார்.
தற்போது நிறுவனங்கள் செலவைக் குறைப்பதற்காக மட்டும் ஆட்களைக் குறைக்கவில்லை. மாறாக நிறுவனத்தின் உற்பத்தித் திறனை அதிகரிப்பதே அவற்றின் முக்கிய நோக்கமாக உள்ளது. இதனால் மொத்தமாகப் பணிநீக்கம் செய்வதற்குப் பதிலாக, 'செயல்திறன் மேம்பாட்டுத் திட்டம்' மூலம் ஊழியர்களுக்கு வாய்ப்பளித்து, அதில் தேர்ச்சியடையாதவர்களை மட்டும் வெளியேற்றும் நடைமுறையை நிறுவனங்கள் பின்பற்றுகின்றன. ஊழியர்களை மொத்தமாகத் துரத்துவதை விட, வாடிக்கையாளர்களின் புதிய தேவைகளுக்கும் ஏ.ஐ சார்ந்த நவீன தொழில்நுட்பத் திட்டங்களுக்கும் ஏற்ப ஆட்களை மறுசீரமைப்பதே ஐடி நிறுவனங்களின் தற்போதைய உத்தியாக மாறியுள்ளது.
யாருடைய வேலைகளுக்கு அதிக ஆபத்து?
இந்த மாற்றத்தால் யாருடைய வேலைகளுக்கு அதிக ஆபத்து என்ற கேள்விக்கு, வழக்கமான, ஒரே மாதிரியான விதிமுறைகளைக் கொண்ட பணிகளே பெரும் அச்சுறுத்தலைச் சந்தித்து வருகின்றன என்பதுதான் பதிலாக உள்ளது.
பாதிக்கப்படும் பணிகள் - அடிப்படை லெவல் கோடிங், வழக்கமான சாப்ட்வேர் டெஸ்டிங், எளிய அப்ளிகேஷன் பராமரிப்பு, ஒரே மாதிரியான டேட்டா புரோசசிங் பணிகள்தான் இதில் அதிகம் பாதிக்கப்படுகின்றன. அதேபோல் மேலாண்மை ரீதியாக ஒருங்கிணைப்புப் பணிகளை மட்டுமே செய்துவந்த நடுத்தரப் பொறுப்புகளும் தற்போது சுருக்கப்பட்டு வருகின்றன.
கார்ப்பரேட் ஏ.ஐ தளங்கள் - பாலன்டிர் (Palantir), ஆந்த்ரோபிக் (Anthropic) போன்ற அடுத்த தலைமுறை கார்ப்பரேட் ஏஐ தளங்கள், மனிதர்கள் செய்துவந்த சிக்கலான பணிகளையும் மிக நேர்த்தியாகச் செய்யத் தொடங்கியுள்ளன. இதன் காரணமாக எளிய, நடுத்தர அளவிலான தொழில்நுட்பப் பணிகளில் ஈடுபட்டுள்ள 40% முதல் 60% வரையிலான ஊழியர்களின் வேலைவாய்ப்பு இந்த ஏ.ஐ தளங்களால் கடுமையாகப் பாதிக்கப்பட வாய்ப்புள்ளதாக நிபுணர்கள் எச்சரிக்கின்றனர். வரும் காலங்களில் அனுபவம் வாய்ந்த சீனியர் நிபுணர்களின் பணிகளுக்கும் கூட இது சவாலாக மாறக்கூடும்.
ஐடி துறையின் எதிர்காலம்
இறுதியாகப் பார்க்கும்போது, இந்திய ஐடி துறை என்பது இனி 'அதிக ஆட்களை வைத்து வேலை வாங்கும்' அமைப்பிலிருந்து முற்றிலும் மாறி, 'அதிக உற்பத்தித் திறன் கொண்ட குறைந்த வல்லுநர்களைக் கொண்டு இயங்கும்' புதிய சகாப்தத்தை நோக்கி நகர்ந்துவிட்டது.
ஒட்டுமொத்தமாக வேலைகள் காணாமல் போய்விடவில்லை. மாறாக அந்த வேலைக்குத் தேவையான திறன்கள்தான் தலைகீழாக மாறியுள்ளன. ஏ.ஐ மென்பொருட்களைப் பயன்படுத்தும் திறன், கிளவுட், டேட்டா சயின்ஸ், சைபர் பாதுகாப்பு, வணிகரீதியான முடிவுகளை எடுக்கும் பலத்துறை ஆற்றல் கொண்டவர்களுக்கு சந்தையில் என்றும் பிரகாசமான எதிர்காலம் உண்டு.
எனவே ஐடி ஊழியர்களுக்கு இனி வேலை இருக்கிறதா இல்லையா என்பது முக்கியமல்ல; எந்த வேலைக்கு சந்தையில் மதிப்பு இருக்கிறது, நிறுவனங்கள் எதற்கு அதிக சம்பளம் கொடுக்கத் தயாராக உள்ளன என்பதைப் புரிந்து கொண்டு தங்களைத் தகவமைத்துக் கொள்வதே தற்போதைய காலத்தின் கட்டாயமாகியுள்ளது.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
