FIFA World Cup : 2026 ஃபிஃபா உலகக் கோப்பையில் 40 வயதைக் கடந்த 8 வீரர்கள் பங்கேற்க உள்ளனர். ரொனால்டோ, மெஸ்ஸி போன்ற ஜாம்பவான்களுடன், ஸ்காட்லாந்தின் 43 வயது கோல்கீப்பர் கிரேக் கார்டனும் இந்த பட்டியலில் இடம்பெற்றுள்ளார்.
Oldest football players : கனடா, மெக்சிகோ, மற்றும் அமெரிக்கா இணைந்து நடத்தும் 2026 ஃபிஃபா உலகக் கோப்பை கால்பந்து போட்டியில் ஒரு புதிய வரலாறு படைக்கப்பட உள்ளது. இந்தத் தொடரில், 40 வயதைக் கடந்த எட்டு வீரர்கள் அணிகளில் இடம்பெற உள்ளனர். இதுவரை நடந்துள்ள 22 உலகக் கோப்பை தொடர்களில் மொத்தமாக இடம்பெற்ற 40+ வயது வீரர்களின் எண்ணிக்கையை விட இது ஒன்று அதிகம் என்பது குறிப்பிடத்தக்கது.
இந்த வீரர்களில் மிகவும் வயதானவர் ஸ்காட்லாந்து கோல்கீப்பர் கிரேக் கார்டன். அவருக்கு அப்போது 43 வயதாகும். ஒருவேளை அவர் களமிறங்கினால், உலகக் கோப்பை வரலாற்றில் விளையாடிய இரண்டாவது வயதான வீரர் என்ற பெருமையைப் பெறுவார். இதற்கு முன்பு, 2018-ல் எகிப்தின் எஸாம் எல் ஹடாரி தனது 45-வது வயதில் சவுதி அரேபியாவுக்கு எதிராக விளையாடியதே சாதனையாக உள்ளது. இருப்பினும், கார்டன் முதல் தேர்வு கோல்கீப்பரான அங்கஸ் கன்னுக்கு மாற்று வீரராகவே இருப்பார் என எதிர்பார்க்கப்படுகிறது.
கால்பந்து உலகக் கோப்பை
அதே சமயம், களத்தில் விளையாடும் வீரர்களில் மிகவும் வயதானவராக கிறிஸ்டியானோ ரொனால்டோ இருப்பார். அவருக்கு 41 வயதாகும். இது அவருக்கு ஆறாவது உலகக் கோப்பையாகும். இந்த சாதனையை அவர் 40 வயதான மெக்சிகோ கோல்கீப்பர் கில்லர்மோ ஒச்சோவா மற்றும் லியோனல் மெஸ்ஸி ஆகியோருடன் பகிர்ந்து கொள்கிறார். மெஸ்ஸிக்கு இந்த மாதம் இறுதியில் 39 வயது ஆகிறது.
Related Articles
இந்த தொடரில் 40 வயதைக் கடந்த மற்ற வீரர்கள்: கேப் வெர்டே அணியின் அறிமுக கோல்கீப்பர் வோசின்ஹா, 2014-ல் உலகக் கோப்பையை வென்ற ஜெர்மனி வீரர் மானுவல் நியூயர் ஆகியோர் அடங்குவர். நியூயர் தற்போது கன்றுக்கால் தசைப் காயத்திலிருந்து மீண்டு, ஹூஸ்டனில் ஞாயிற்றுக்கிழமை குராசோவுக்கு எதிரான போட்டியில் விளையாட இலக்கு வைத்துள்ளார்.
இதற்கிடையில், உருகுவே கோல்கீப்பர் பெர்னாண்டோ முஸ்லெரா, மியாமியில் சவுதி அரேபியாவுக்கு எதிராக உருகுவே தனது குரூப் H பயணத்தைத் தொடங்கிய அடுத்த நாள், அதாவது வரும் செவ்வாய்க்கிழமை தனது 40வது பிறந்தநாளைக் கொண்டாடுவார்.
2026 உலகக் கோப்பையில் முன்னெப்போதும் இல்லாத அளவுக்கு அணிகள், வீரர்கள் மற்றும் போட்டிகள் இடம்பெறும் என ஃபிஃபா உறுதி செய்துள்ளது. இந்த விரிவாக்கப்பட்ட தொடரில் 48 நாடுகளைச் சேர்ந்த 1,248 வீரர்கள் பங்கேற்கின்றனர்.
கத்தாரில் 2022-ல் நடந்த உலகக் கோப்பையை வென்ற அர்ஜென்டினாதான் தற்போதைய சாம்பியன். லியோனல் மெஸ்ஸி தலைமையிலான அந்த அணி, கூடுதல் நேரத்திற்குப் பிறகு 3-3 என சமநிலையில் முடிந்த பரபரப்பான இறுதிப் போட்டியில், பிரான்சை பெனால்டியில் (4-2) வீழ்த்தியது.
