மணிகண்டன், இயக்கத்தில் விஜய் சேதுபதி, நல்லாண்டி, யோகி பாபு உள்ளிட்ட பலர் நடித்துள்ள ‘கடைசி விவசாயி’ படத்தின் அதிகாரப்பூர்வ ரிலீஸ் தேதி அறிவிக்கப்பட்டு உள்ளது.
காக்கமுட்டை திரைப்படம் மூலமாக இயக்குநராக அறிமுகமாகி திரையுலகினரின் கவனம் ஈர்த்தவர் மணிகண்டன். இந்த திரைப்படம் வசூல் மற்றும் விமர்சன ரீதியாக நல்ல வரவேற்பை பெற்றதோடு தேசிய விருதையும் வென்று அசத்தியது. அதன் பின்னர் குற்றமே தண்டனை மற்றும் ஆண்டவன் கட்டளை போன்ற படங்களை இயக்கினார் மணிகண்டன். இந்த இரு படங்களும் கலவையான விமர்சனங்களை பெற்றன.
இதையடுத்து இயக்குனர் மணிகண்டன், இயக்கத்தில் உருவாகி உள்ள புதிய திரைப்படம் கடைசி விவசாயி. இப்படத்தில் நாயகனாக நல்லாண்டி என்ற முதியவர் நடித்துள்ளார். அவருடன் விஜய் சேதுபதி, யோகி பாபு உள்ளிட்ட பலர் நடித்துள்ளனர். இப்படத்துக்கு முதலில் இளையராஜா இசையமைத்து வந்தார் பின்னர் சில காரணங்களால் அவருக்கு பதிலாக சந்தோஷ் நாராயணன் இசையமைப்பாளராகப் பணிபுரிந்துள்ளார். இதனை இயக்குனர் மணிகண்டனே தயாரித்துள்ளார்.
படப்பிடிப்பு முடிந்து நீண்ட நாட்களாக முடங்கிக் கிடந்த இப்படத்தை கைப்பற்றி நேரடியாக ஓடிடியில் வெளியிட சில நிறுவனங்கள் முயன்றன. ஆனால் அதற்கெல்லாம் செவிசாய்க்காத படக்குழு, தியேட்டரில் வெளியிடும் முனைப்போடு இருந்தது. தற்போது அதற்கான அறிவிப்பும் வெளியாகி உள்ளது.
இப்படத்தின் அதிகாரப்பூர்வ ரிலீஸ் தேதியை படக்குழு அறிவித்துள்ளது. அதன்படி கடைசி விவசாயி திரைப்படம் வருகிற பிப்ரவரி 11-ந் தேதி திரையரங்குகளில் வெளியாகும் என அதிகாரப்பூர்வமாக அறிவித்துள்ளனர். விவசாயி படும் கஷ்டத்தை, விவசாயத்தை அழிக்க நடத்தப்படும் சூழ்ச்சிகளையும் தோலுரித்துக் காட்டும் விதமாக இப்படத்தின் திரைக்கதை இருக்கும் என கூறப்படுகிறது.