பிக் பாஸ் புகழ் ஜூலி, தற்போது அம்மன் தாயி எனும் பக்தி படத்தில் நடித்து வருகிறார். என்ன தான் பிக் பாஸ் மூலம் எதிர்மறையான புகழை அவர் சம்பாதித்திருந்தாலும் இன்று திரைத்துறையில் அவர் நினைத்தபடி தொடந்து முன்னேறி கொண்டு தான் இருக்கிறார். 

ஒரு தனியார் சேனலில் தொகுப்பாளினியாக இருக்கும் இவரின் கைவசம் சில திரைப்படங்களும் இருக்கின்றன. கேசவ் புரொடக்ஷன்ஸ் தயாரிப்பில், மகேஷ்வரன் மற்றும் சந்திரஹாசன் என இரண்டு இயக்குனர்கள் இந்த அம்மன் தாயி படத்தை இயக்கி வருகின்றனர். இந்த படத்தில் ஜூலி தான் முக்கிய வேடத்தில் நடித்திருக்கிறார். அதுவும் அம்மனாக. 

ரம்யா கிருஷ்ணன், கே.ஆர்.விஜயா போன்றோரை அம்மனாக பார்த்து பழகிய எங்களுக்கு இப்படி ஒரு சோதனையா என்று பிக் பாஸ் ரசிகர்கள் ஒரு பக்கம் வருத்தப்பட்டாலும், ஜூலி ஆர்மிக்கு இதெல்லாம் கொண்டாட்டமாக தான் இருக்கிறது. இந்த அம்மன் தாயி படத்தில் பிரமோ வீடியோ பாடல் ஒன்று தற்போது வெளியாகி இருக்கிறது. இந்த வீடியோவில் ஜூலி சம்பந்தப்பட்ட காட்சிகள் தான் அதிகம் இடம் பெற்றிருக்கிறது. 

எல்.ஆர்.ஈஸ்வரியின் கண்ணீர் குரலில் “அழைக்கட்டுமா தாயே?” என தொடங்கும் இந்த பாடல் கேட்கும் போதே அருள் பொங்குகிறது. 
பாடலில் இடம் பெற்றிருக்கும் ஒவ்வொரு காட்சியிலும் ஜூலி வலுவாக நடித்திருக்கிறார். அதேசமயம் மீம்ஸ் கிரியேட்டர்களின் கண்களுக்கும் இந்த வீடியோ மிக சிறப்பாக தெரிந்ததால், மீம்ஸ் போட்டு கலாய்த்து வருகின்றனர். எது எப்படியோ ஜூலியின் அம்மன் தாயி பிரமோ, மக்கள் மத்தியில் போய் சேர்ந்துடுச்சே என படக்குழு மகிழ்ச்சி அடைந்திருக்கிறது.