நேற்று வெளியான ‘தலைவர் 169’ (Thalaivar 169) பட புரோமோவில் ரஜினியின் ஸ்டைலான, கெத்தான தோற்றமும், அனிருத்தின் மாஸான பின்னணி இசையும் இடம்பெற்று இருந்தது.
தமிழ் திரையுலகில் சூப்பர் ஸ்டாராக வலம் வருபவர் ரஜினிகாந்த் (Rajinikanth). இவர் நடிப்பில் அண்மையில் வெளியான படம் அண்ணாத்த. சிவா இயக்கியிருந்த இப்படத்தில் நயன்தாரா, குஷ்பு, மீனா, கீர்த்தி சுரேஷ் என மிகப்பெரிய நட்சத்திர பட்டாளமே நடித்திருந்தது. இருப்பினும் இப்படம் எதிர்பார்த்த வெற்றியை பெறவில்லை. இதனால் அடுத்த பட தேர்வில் மிகவும் கவனமாக இருந்த ரஜினி பல்வேறு இயக்குனர்களிடம் கதை கேட்டு வந்தார்.
அந்த வகையில் ரஜினிகாந்தின் அடுத்த படத்தை இயக்குபவர்கள் பட்டியலில் 'கண்ணும் கண்ணும் கொள்ளையடித்தால்' படத்தின் இயக்குனர் தேசிங்கு பெரியசாமி, கேஎஸ் ரவிக்குமார், கார்த்திக் சுப்புராஜ், பாண்டிராஜ், வெங்கட்பிரபு, மிஷ்கின் என பல்வேறு பெயர்கள் அடிபட்ட வண்ணம் இருந்தன.
இந்த லிஸ்டில் கடைசியாக சேர்ந்தவர் நெல்சன் (Nelson). தற்போது விஜய்யின் பீஸ்ட் (Beast) படத்தை இயக்கி முடித்துள்ள நெல்சன், அண்மையில் ரஜினியை சந்தித்து ஒரு கதையை கூறியுள்ளார். அந்தக்கதை ரஜினிக்கு மிகவும் பிடித்துப்போக, காத்திருந்த இயக்குனர்களையெல்லாம் கழட்டிவிட்டு, நெல்சனுக்கு ஓகே சொல்லிவிட்டார் ரஜினி.
இதற்கான அதிகாரப்பூர்வ அறிவிப்பு நேற்று வெளியானது. சன் பிக்சர்ஸ் தயாரிக்க உள்ள இப்படத்திற்கு அனிருத் (Anirudh) இசையமைக்க உள்ளார். நேற்று வெளியான புரோமோவில் ரஜினியின் ஸ்டைலான, கெத்தான தோற்றமும், அனிருத்தின் மாஸான பின்னணி இசையும் இடம்பெற்று இருந்தது. இந்த வீடியோ சமூக வலைதளங்களில் செம்ம வைரல் ஆனது.
இந்நிலையில், இந்த வீடியோவை பார்த்த நடிகையும், பிரபல தொகுப்பாளினியுமான டிடி (DD), டுவிட்டரில் நெகிழ்ச்சியுடன் பதிவிட்டுள்ளார். அதில், “என்னால அழுகைய அடக்கவே முடியலடா நெல்சா... தலைவர் சிங்கம் மாதிரி இருக்காரு. அனிருத்தின் பிஜிஎம் வெறித்தனமாக இருக்கு” என புகழ்ந்துள்ள அவர், இறுதியில் ‘போங்கப்பா ரொம்ப ஹாப்பி’ என டுவிட்டை முடித்துள்ளார். நெல்சனும், டிடி-யும் நெருங்கிய நண்பர்கள் என்பது குறிப்பிடத்தக்கது.
