Lokesh Kanagaraj : தற்கால கோலிவுட் சினிமா வரலாற்றில் இளைஞர்களால் பெரிதும் விரும்பப்படும் ஒரு இயக்குனர் என்றால் அது லோகேஷ் கனகராஜ் தான் என்றால் அது மிகையல்ல.
சினிமா பின்புலம் என்பதே இல்லாமல் ஒரு சுயம்புவாக தனது திறமையின் மூலம் தமிழ் திரை உலகில் கொடிகட்டி பறக்கும் எத்தனையோ முன்னணி கலைஞர்களின் ஒருவர் தான் லோகேஷ் கனகராஜ். குறும்படங்களின் மூலம் தனது பயணத்தை துவங்கி, அதில் பற்பல வெற்றிகளை கண்டு, அதன்பிறகு மாநகரம் என்கின்ற திரைப்படத்தின் மூலம், தான் யார் என்பதை கோலிவுட் உலகிற்கு பறைசாற்றியவர் அவர்.
கடந்த 2012 ஆம் ஆண்டு "அச்சம் தவிர்" என்கின்ற குறும்படத்தின் மூலம் தான் பலரின் கவனத்தை லோகேஷ் கனகராஜ் ஈர்த்தார். குறும்படங்களுக்கு என்று நடத்தப்படும் விழாக்களில் பல விருதுகளை "அச்சம் தவிர்" திரைப்படம் பெற்றிருக்கிறது என்பது குறிப்பிடத்தக்கது. அதன் பிறகும் தொடர்ச்சியாக நல்ல பல குறும்படங்களை எடுத்து வந்த லோகேஷ் கனகராஜுக்கு கிடைத்த முதல் வாய்ப்பு தான் மாநகரம்.
அதனைத் தொடர்ந்து கார்த்தி நடிப்பில் "கைதி" என்கின்ற திரைப்படத்தை இயக்கி மீண்டும் வெற்றி கண்டார். அதன் பிறகு இவருடைய இயக்கத்தில் தளபதி விஜய் அவர்கள் நடிப்பில் வெளிவந்த "மாஸ்டர்" என்கின்ற திரைப்படம் அவரை உச்ச நட்சத்திரமாக மாற்றிய நிலையில், தனது கனவு நாயகனான உலகநாயகன் கமல்ஹாசன் அவர்களை வைத்து "விக்ரம்" என்கின்ற மாபெரும் கமர்சியல் ஹிட் திரைப்படத்தை கொடுத்தார்.
அதன் பிறகு வெளியான "லியோ" திரைப்படத்தின் வெற்றி உலக அளவில் அனைவரும் அறிந்ததே. இன்றளவும் கேரள உலகில் பல கோடி ரூபாய் வசூல் செய்த முதல் தமிழ் திரைப்படமாக "லியோ" திகழ்ந்து வருவது குறிப்பிடத்தக்கது. ஏற்கனவே பல வெற்றி புகைப்படங்களை கொடுத்த அவர் இப்பொழுது தமிழ் சினிமாவின் முன்னணி நடிகரான சூப்பர் ஸ்டார் ரஜினிகாந்த் அவர்களை வைத்து தரமான படமொன்றை இயக்கி வருகின்றார்.
