தங்கம் விலை தொடர்ந்து அதிகரித்து, 1 சவரன் 90,000 ரூபாயை நெருங்கியுள்ளது, இது நடுத்தர மக்களை கவலையடையச் செய்துள்ளது. உலகப் பொருளாதார நிச்சயமற்ற தன்மை, டாலர் மதிப்பு சரிவு போன்ற சர்வதேச, உள்ளூர் தேவைகளும் இந்த விலை உயர்வுக்குப் பின்னால் உள்ளன.
தினமும் அதிகரிக்கும் தங்கம் விலை
தங்கம் விலை மேலும் மேலும் அதிகரித்து வருவதால் நடுத்த மக்கள் கவலை அடைந்துள்ளனர். 1 சவரன் தங்கம் விலை 90 ஆயிரம் ரூபாயை நெருங்கியுள்ளதால் நகை கடைகள் வெறிச்சோடி காணப்படுகின்றன. தற்போது தங்கம் விலை ராக்கெட் வேகத்தில் அதிகரித்து வரும் நிலையில், திருமண ஏற்பாடு செய்துள்ளவர்கள் தவித்து வருகின்றனர்.
சென்னையில் ஆபரணத்தங்கம் விலை கிராமுக்கு 75 ரூபாய் அதிகரித்து 11200 ரூபாயாக உள்ளது. சவரனுக்கு 600 அதிகரித்து 89,600 ரூபாயாக உள்ளது. வெள்ளி விலை மாற்றம் இல்லாமல் 1 கிராம் 167 ரூபாயாகவும் 1 கிலோ பார்வெள்ளி 1 லட்சத்து 67 ஆயிரம் ரூபாயாகவும் உள்ளது.
தங்கம் தற்போது உச்சத்தை தொட்டதற்கு பல்வேறு காரணங்கள் உள்ளன. உலகளவில் பொருளாதார அசாதாரணங்கள் அதிகரித்துள்ளதால் முதலீட்டாளர்கள் பாதுகாப்பான தளமாக தங்கத்தைத் தேர்வு செய்கிறார்கள். அமெரிக்க டாலரின் மதிப்பு பல இடங்களில் பலவீனமடைந்திருப்பதும் தங்கத்திற்கான கேள்வியை அதிகரிக்கச் செய்கிறது. அதே நேரத்தில் வட்டி விகிதங்கள் குறைந்த நிலையில் இருப்பதால் வருமானம் தராத சொத்து என்றாலும் தங்கம் அதிக கவர்ச்சியாக மாறியுள்ளது. மேலும் மத்திய வங்கிகள் தங்கள் வெளிநாட்டு நாணயச் சேமிப்பில் தங்கத்தின் பங்கைக் கூட்டி வருவது சர்வதேச சந்தையில் தேவை உயர்வுக்கு வழிவகுக்கிறது.
Related Articles
இந்தியாவில் சந்தையில் தங்கம்
இந்தியாவில் குறிப்பாக பண்டிகை மற்றும் திருமண காலங்களில் நகை வாங்கும் பழக்கம் அதிகரிப்பதால் உள்ளூர் சந்தை விலையும் உயரும். இதனுடன் இறக்குமதி வரி, சுங்க கட்டணங்கள் போன்ற அரசின் விதிமுறைகளும் தங்க விலையை அதிகரிக்கக் காரணமாகின்றன. கூடுதலாக, சில முதலீட்டாளர்கள் தங்க சந்தையில் வேகமான விலை உயர்வை முன்னேற்றமாகப் பார்த்து கூடுதலாக வாங்குவதும் விலையை மேலும் உச்சத்துக்கு கொண்டு சென்றுள்ளது.
தங்கம் விலை எப்போது குறையும்?!
தங்கம் விலை எப்போது குறையும் என்பதைத் துல்லியமாகச் சொல்ல முடியாவிட்டாலும், சில சூழ்நிலைகளில் அது குறைய வாய்ப்பு அதிகமாகும். குறிப்பாக மத்திய வங்கிகள் வட்டி விகிதங்களை உயர்த்தினால், வட்டி தரும் முதலீடுகள் கவர்ச்சியாக மாறுவதால் தங்கத்தின் தேவை குறையும். அதேபோல் பணவீக்கம் குறைந்தாலோ, அமெரிக்க டாலர் வலுவடைந்தாலோ தங்கம் வாங்கும் ஆர்வம் குறையும். உலக பொருளாதாரம் நிலையான வளர்ச்சியுடன் இருந்தால் முதலீட்டாளர்கள் பங்குகள் போன்ற அதிக வருமானம் தரும் சொத்துகளுக்கு செல்லக்கூடும், இதனால் தங்கம் விலை சலனமாக குறையும். மேலும் மத்திய வங்கிகள் அல்லது பெரிய வணிகர்கள் அதிக அளவில் தங்கத்தை விற்றாலோ, நகை சந்தையில் கோரிக்கை குறைந்தாலோ விலை வீழ்ச்சி ஏற்படும். உலக அரசியல் பதற்றங்கள் தணிந்து அமைதியான சூழல் நிலவினாலும் தங்கம் விலை குறையும் சாத்தியம் உண்டு.