Watch : திருட்டு மாடுகளுடன் தில்லாக டீசல் போடும் வடமாநில கொள்ளை கும்பல்? சி.சி.டி.வி., காட்சியில் அம்பலம்!

மதுரை மாநகர் மற்றும் முக்கிய சாலைப் பகுதிகளில் மாடுகளை உரிமையாளர்கள் அவிழ்த்து விடுவதால் தொடர்ந்து விபத்து ஏற்படுகிறது. அதே போல் ஆதரவற்ற கால்நடைகளும் சாலை ஓரங்களில் படுத்து விபத்திற்கு காரணமாக மாறுகிறது. இவ்வாறு விபத்துக்கள் ஒரு பக்கம் அரங்கேறி வரும் சூழலில் கால்நடைகளை திருடும் சம்பவங்களும் மற்றொரு பக்கம் அதிகரித்து வருகிறது.

இந்நிலையில் சாலை ஓரம் படுத்திருந்த மாட்டை கொள்ளையர்கள் திருடிச்செல்லும் சி.சி.டி.வி., காட்சி வெளியாகி அதிர்ச்சியை ஏற்படுத்தியது. மதுரை விளாச்சேரி பகுதியில் மாடு ஒன்று சாலை ஓரம், படுத்திருந்தது இதனை கொள்ளையர்கள் சிலர் தங்களது மாட்டை அழைத்துச் செல்வது போல் இழுத்துச் சென்றனர்.

இதையடுத்து இந்த மாட்டை இரண்டு நாட்களுக்கு முன் உரிமையாளர் மீட்டுவிட்டார். கடந்த சில நாட்களுக்கு முன் மாட்டை திருடிச்செல்லும் சி.சி.டி.வி., காட்சி வெளியானது பரபரப்பை ஏற்படுத்தியது. இந்நிலையில் கால்நடைகளை திருடிச்செல்லும் வட மாநில இளைஞர்கள் பெட்ரோல் பங்கில் மாடுகளை வண்டியில் வைத்துக் கொண்டே டீசல் போடும் காட்சி வெளியாகியுள்ளது.

அதில் மாட்டை திருடிய கும்பலை சேர்ந்த இளைஞர் அச்சத்துடன் சி.சி.டி.வி.,யை கண்காணிக்கும் காட்சியும் பரபரப்பை ஏற்படுத்தியுள்ளது. எனவே இவர்களை பிடித்து காவல்துறை விசாரணை நடத்த வேண்டும் என கோரிக்கை எழுந்துள்ளது.