ஐபிஎல் வரலாற்றில் 3 முறை அதிக ஸ்கோர் எடுத்ததற்காக ஆரஞ்ச் கேப் பெற்ற அதிரடி பிளேயர் டேவிட் வார்னர் 2025 வீரர் ஏலத்தில் அன்சோல்டு பிளேயராகியுள்ளார்.
ஐபிஎல் கிரிக்கெட் தொடரின் 18வது சீசன் வருகின்ற 2025ம் ஆண்டு நடைபெற உள்ளது. 2025 தொடரை முன்னிட்டு வீரர்களுக்கான ஏலம் சவுதி அரேபியாவில் நடைபெற்று வருகிறது. இன்றைய ஏலத்தில் பல முன்னணி வீரர்கள் வரலாற்றில் இல்லாத வகையில் அதிக தொகைக்கு ஏலம் எடுக்கப்பட்டுள்ளனர். அந்த வகையில் இந்திய அணியின் நட்சத்திர ஆட்டக்காரரான ரிஷப் பண்ட் ரூ.27 கோடிக்கு லக்னோ அணியாலும், மற்றொரு அதிரடி வீரரான ஸ்ரேயாஸ் ஐயர் பஞ்சாப் கிங்ஸ் அணியால் ரூ.26.75 கோடிக்கும் ஏலம் எடுக்கப்பட்டுள்ளனர்.
ஆனால் இவை அனைத்திற்கும் மத்தியில், ஐபிஎல் வரலாற்றில் மிகவும் வெற்றிகரமான பேட்ஸ்மேன் விலைபோகாமல் இருக்கிறார், இது ரசிகர்கள் மத்தியில் அதிர்ச்சியை ஏற்படுத்தி உள்ளது. எனவே ஐபிஎல் 2025 ஏலத்தில் விற்பனையாகாமல் இருந்த பேட்ஸ்மேன் பற்றி தெரிந்து கொள்வோம்.
ஆஸ்திரேலியா கிரிக்கெட் அணியின் புகழ்பெற்ற தொடக்க ஆட்டக்காரர் டேவிட் வார்னர் இன்றைய ஏலத்தில் விலைபோகவில்லை. ஐபிஎல்.ன் பல போட்டிகளில் தனது அதிரடியால் எதிரணியினரை கலங்கடித்த டேவிட் வார்னரை எந்த அணியும் ஏலம் எடுக்கவில்லை. ஐபிஎல் வரலாற்றில் 3 முறை ஆரஞ்சு தொப்பியை வென்ற ஒரே பேட்ஸ்மேன் இவர்தான் என்பது குறிப்பிடத்தக்கது.
கடந்த ஆண்டு ஐபிஎல் தொடரில் டெல்லி அணிக்காக விளையாடிய டேவிட் வார்னர் மொத்தமாக 8 இன்னிங்ஸ்களில் விளையாடி வெறும் 168 ரன்களை மட்டுமே சேர்த்துள்ளார். கடந்த ஆண்டு அவருடைய சராசரி வெறும் 21 தான். பெரிய அளவில் சோபிக்காத நிலையில் அவரை அணி நிர்வாகம் அணியில் இருந்து விடுவித்தது. இந்நிலையில் தற்போது அவர் எந்த அணியாலும் வாங்கப்படவில்லை.
இன்றைய ஏலத்தில் அவர் எந்த அணியாலும் வாங்கப்படவில்லை என்றாலும் இரண்டாவது நாள் ஏலத்தில் அவர் அடிப்படை தொகைக்கு ஏதேனும் ஒரு அணியால் வாங்கப்படலாம் என்று நம்பப்படுகிறது.
IPL வரலாற்றில் டேவிட் வார்னர்
38 வயதான டேவிட் வார்னர் 184 ஐபிஎல் போட்டிகளில் 40.52 என்ற வலுவான சராசரியுடன் 6565 ரன்கள் எடுத்து சாதனையை படைத்துள்ளார். மேலும் 139.77 ஸ்டிரைக் ரேட்டில் ரன் குவித்து அதிரடி காட்டியுள்ளார். ஐபிஎல்லில் மொத்தம் 4 சதங்கள் மற்றும் 62 அரைசதங்கள் விளாசிய வார்னர் ஐபிஎல் வரலாற்றில் அதிக ரன் குவித்த நான்காவது வீரராக உள்ளார்.
சேனலை கிளிக் செய்து பின்தொடரவும்